-
هجوم سافر علي العبد لله
انا بقالي يومين في دمياط متروق في مشوار ما يعلم بيه الا ربنا ورجعت امبارح مش شايف قدامي متر ورجعت من دمياط علي الشغل بتاعي واستأذنت لاني كنت بودع وروحت مش شايف قدامي وانا سايق والواحد مدروخ وانا في طريقي للبيت الساعه 3 العصر وبلف من عند كوبري النعام وسمعت هبده في المرايه اليمين بتاعتي ووقفت لقيت واحد جاي يجري عليا وبيكلمني من ورايا وانا قاعد علي الكرسي في العربية وينفع كدا يا كابتن مش تخلي بالك وانا اقوله معلش حقك عليا وبردك عمال يخبطلي علي كتفي واصرف معلش دي منين وحسيت بحركة غريبة من نحية اليمين عندي وانا من طبعتي ايدي الشمال بكون ساندها علي الباب لاقيت نفسي لا ارادي بقفل الزجاج اليمين من مفاتيح الكهربا عندي وبلمح بعيني لقيت واحد ماسك موبيلي في ايده وانا زانق علي ايده بالزجاج قولتله انتا ماسك الموبيل ليه في ايدك بيقولي علشان متجريش قولتله سيب الموبيل يا خفيف انا مبجريش وواقف بكلمك انتا وصاحبك اهو راح ساب الموبيل من ايده وقالي خلاص يا كابتن اتكل علي الله حصل خير
اللي حسسني ان في حاجه مش مظبوطه ان الواد للي بيقول اني خبطه واقف في قفايا وبيكلمني علشان ابصله لورا ومشوفش اللي معاه وهو بيقلب العربية
المهم الموضوع عدا علي خير وربنا ستر
وانا غلط لما وقفت لان طالما مخبطش حد ببوز العربية يبقي مقفش لحد وكمان اللي ساعدني بعد ربنا ان الشارع اللي واقفين فيه في ناس كتير وفي مدرسة وشارع حيوي
ومن ساعتها بطلت امشي وازاز العربية اليمين مفتوح وسنتر العربية مفتوح وربنا يسترها علينا جميعا
-
ربنا يسترها علينا جميعا بس لازم تعرف انك مش اى حد تقفلو وغلطه كبيره انك تمشى والازاز اليمين مفتوح او السنتر
مفتوح وكويس انك اخدت بالك وهو بياخد الموبايل الموضوع ده بيتكرر كتير وخصوصا فى الاشارات بين العيال بتوع المناديل
-
الحمد الله ان ربنا سترها واخدت بالك من موضوع ان فيه حد يمينك
ولاد الحرام مخلوش لولاد الحلال حاجة منهم لله
وفعلا الواحد باه لازم يقفل زجاجه اليمين طول ماهو ماشى او يفتحه فتحة صغيرة مدخلش ايد منها
-
حمدا لله علي سلامتك
شوف ...
انا داخل المدن باتبع الاجراءات التالية خاصة لو معايا الاولاد في العربية :
1- غلق جميع الابواب من الداخل عن طريق الغلق المركزي
2- غلق الزجاج و ترك فتحة بسيطة جدا في الزجاج اليمين أو الشمال علي حسب سرعتي لمجرد تجديد الهواء و في حالة وجود الاولاد بالعربية بأقفل الزجاج من عندي
3- عند التوقف بالاشارات لا ألتفت لأي أحد يحاول يكلمني و لو كلمته يكون من خلال الزجاج المفتوح حوالي 3 سم
ناس كتير بتستغرب لما تركب معايا ليه بأقفل زجاج العربية و أشغل الهوايات فقط بدون تكييف حتي في الشتاء ....
هو ده السبب
-
الحمد لله ان ربنا سترها معاك حاجتين بعملهم اول ما اركب العربية الزجاج كله مقفول فيما عدا زجاج بابى وبفتحه حتة صغيرة للنفس وتانى حاجة السنتر واقفل على نفسي واللى يخبط يخبط طالما انا مقتنع ان انا معملتش حاجة لحد مش هاقف ولو حتى طلع يجري ورايا تانى حاجة لو حد راكب معايا فى العربية مش بخليه يفتح ازازه على الاخر وبقوله خللى بالك الحمد لله ان ربنا سترها معاك عشان انت كمان فلوسك حلال ربنا يسترها علينا جميعا
-
حمدا لله على سلامتك
موضوع قفل الزجاج ده إتعلمته ييجى من 10 - 15 سنه .. حصلت معايا نفس الحركه بس كنت فى مكرم عبيد و يومها أتسرق الموبايل فعلا
و بعد 5 دقايق بالظبط رجعت للمكان مالقتش الأشخاص اللى نفذوا العمليه
فص ملح و داب
-
نفس الحركة بنفس السيناريو حصلت معايا من حوالي اربع سنين تحت الشغل في شارع جامعة الدول العربية وبرضه الواد واقف بيكلمني من شمالي ورا علشان ماشوفش الجنب اليمين وفعلا اللي معاه سرق الموبايل بتاعي وبعد دقيقة لما خدت بالي من فقد الموبايل كانوا فص ملح وداب هما الأتنين.
-
-
حمدلله على سلامتك ,, وقدر الله ماشاء فعل ..
وربنا يستر علينا جميعاااااا .
-
حمد الله على سلامتك
والحمد لله أنها جت على قد كده بس
Content Relevant URLs by
vBSEO 3.6.0 PL2