السلام عليكم
اعضاء قسم فيات الكرام تحيه طيبة لحضراتكم
من فضلكم لو حد معاه الايفو يعملها تقييم كده بعد لما مشيت كيلومتر كتير
خاصة انه انا شايف ان كل التقارير كانت وقت شراء السيارة
شكرا جزيلا
عرض للطباعة
السلام عليكم
اعضاء قسم فيات الكرام تحيه طيبة لحضراتكم
من فضلكم لو حد معاه الايفو يعملها تقييم كده بعد لما مشيت كيلومتر كتير
خاصة انه انا شايف ان كل التقارير كانت وقت شراء السيارة
شكرا جزيلا
السلام عليكم ورحمة الله و بركاته
انا معايا الأيفو 2011 اوتو p2
لسه عملها الصيانة 10.000 العربية هايلة بمعني الكلمة في كل حاجة ماشاء الله ولو الواحد رجع بيه الزمن حشتريها تاني لأن مفيش وجة للمقارنة بينها وبين الكوري و الصيني من الأخر عربية جميلة لو ناوي عليها توكل علي الله و مش حتندم بس حاول تجيب الأوتو p2
والفتيس الأوتو بتاعها جامد واحسن من الأوتو العادي في الأداء وسيبك اي حد بيشتكي غالبا بتبقي مشاكل فردية وربنا يوفقك
أستاذ kik, ممكن تقوللي الأوبشن الزيادة في p2 عن p1?
زجاج فيميه خلفي
فانوس امامي فيميه
دركسيون و فتيس جلد
الفرش بيفرق بس مش عارف في ايه
البلواند مي "بلوتوث و م بيزيد عليه برنامج عملاه مايكروسوفت بالتعاون مع فيات بيدي نصايح لتحسين اداء العربية و حاجات كدا"
AUX and USB input
شيفتات في التارة
الجنط مختلف "الاتنين اسبور بس بيفرق في الشكل"
نقشة الشبكة مختلف
دا اللي انا عارفه :)
طب توافر وأسعار قطع الغيار أخبارها ايه؟
عربية حلوة بس:
قطع غيارها غالية
صيانتها غالية
توكيلها سيء
موتورها ضعيف
سعر إعادة بيعها سيء
أنا عن نفيس صرفت نظر عنها.
العربية معايا زي الفل لحد دلوقتي ماشية 25 ألف كيلو مفيهاش أي مشاكل لحد دلوقتي بعمل الصيانة العادية بس
معلومة : أنا كان عندي ايفو قبل اللي معايا وعملت بيها حادثة كانت توتال لوس وبعتها وجبتها تاني بس كسر زيرو
عربية ممتازة
راي شخصي
بس الكلام ده من شهر 9 اللي فات
الجديدة بقى من شهرين الأرْبع جنوط اتسرقو !! واحد تاني كان اتشائم منها :d
هو انا فى اعتقادى طبعا ان الفيات عربية حلوة جدا و صناعة ايطالى محترمة
لكن برضه مع احترامى الشديد ماحدش عامل بيها كيلومتر كتير و بيبقى الحكم عليها فى الاول مش دقيق
بالنسبة للديوال لوجيك بتاعها انا شايفه زيه زيى اى ايزى ترونيك فشل فى فى مصر فشل ذريع
و للعم انا جربت واحد ديوال لوجيك و عربية جديدة عاملة كيلومتر قليل اوى و مع ذلك اداء الفتيس وحش جدا كان فيه رجرجة جامدة
الحاجة التانية انه العربية كانت مغيرة اسطوانة دبرياج و مش معناه طبعا انا كل العربيات كده دى جت بالصدفة
من وجهة نظرى المانيوال افضل و مشاكله اقل
انما انا كنت عايز اعرف العربية بعد 80 الف مثلا اخبارها ايه
ايه نوعية المشاكل اللى دائما بتقابل الناس فيها
هل التوكيل بيوجد لها قطع غيار على طول و لا
حد بيشتغل فيها بره التوكيل و لا لأ
بالاضافة للاداء طبعا و اعطالها عادية و لا رخمة و صعبة
و طبعا لا انسى ان اشكر كل من قام بالرد و الافادة فى الموضوع
مغيرة Clutch-Kit على كام ألف كيلومتر؟؟ بيعمل صيانة فـ التوكيل ولا لأ؟؟
طريقة الاستخدام بتفرق جااااااااامد فـ الفتيسات دى, كده الكلام قاصر ومش واضح؟؟!!!
ومع احترامى لوجهة نظرك: المانيوال مش أفضل ولا حاجة..
- الفتيسات الـSequential بدبرياج-كهرباء زى الـDualogic/DSG/PowerShift/TCT كل دول أفضل فـ الأداء والتسارع واستهلاك الوقود...etc
بشرط مفيش سوء استخدام +صيانة منتظمة..
والا مكانتش كل الشركات دى غيرت من الفتيسات الأوتو العقيمة.. للفتيسات دى؟!!!
أصل حضرتك ماتقوليش بعد ألفا156 لمدة 120 ألف كم, بدون مشاكل.. ولسه شغالة الحمد لله (وده كان الجيل الأول Selespeed).
ودلوقتى برافو T-JET بنفس الفتيس الـDualogic, اكثر من 60 ألف كم وتمام الحمد لله.
وتيجى فـ الآخر تقوللى الفتيس فاشل؟؟؟!! :drugsneeded:
Edit: دى تجربتى انا بس, غير أصحابى ومعارفى اللى معاهم جراند/ايفو وبرافو.. وحتى الـEasytronic أنا اعرف 3 معاهم أسترا/فكترا ومفيش مشاكل..!!
:bye2:
الاخ الفاضل
مش عارف حاسس انك واخد الكلام كده بصفه شخصية
أيا كان و مش عارف جبت منين أني جربت و ماركبتش
للعلم
الاوبل موجودة معايا من الزيرو و غيرت أسطوانة دبرياج علي ٥٠٠٠٠ كلم
الكولت قعدت معايا ٦ شهور عملت بيها ١٧٠٠٠ كلم و غيرت الاسطوانة برضه علي ٦٠٠٠٠ كلم و كنت جايبها مستعملة
الايفو مش بتاعي و صاحبها غير أسطوانة علي ١٧٠٠٠ كلم
ده تجربتي الشخصية و انا مش داخل أعيب في العربية و لا حاجة انا بسال علشان اشتري
مع احترامي لرأيك طبعا و هو صحيح و مقنع جداً
لكني ضايقني جداً انك بتتكلم علي افتراض أني مش فاهم حاجة و داخل حامي اوي
بصراحة الردود اللي زيي دي هي اللي خلتني اقصر في دخول المنتدي لفترة طويلة و مع ذلك انا شايف ان الناس زيي ماهي
السلام عليكم
انا معايا ايفو باكدج 2 مانيوال بقالها معايا سنه و 9 شهور
مشيت بيها لحد دلوقتى 56000 كيلو متر تقريبا (اعتقد دى مسافه كبيره)
هحاول اتكلم عنها شويه (كمستخدم) بعيدا عن الفنيات اللى انا مفهمش فيها اى حاجه
للتوضيح: انا سواقتى داخل القاهره على الطريق الدائرى - خارج القاهره طريق بورسعيد و طريق الاسكندريه الزراعى
حتى الان السياره ممتازه (عفشه - موتور - فرامل - عزل الاصوات الخارجيه - تكييف - اطارات - الطاره المالتى فانكشن - الخامات الداخليه - الصاج الخارجى )
اعلى سرعه جبتها : 175
اعلى سرعه اخدت بيها ملف حنين: 130
اعلى سرعه اخدت بيها ملف قاسى: 85
اطول فترة قياده مستمره : 4 ساعات (مريحه)
اخر صيانه: 50000
كويس لحد كده :)
المميزات اثناء القياده من وجهة نظرى:
1- العربيه ارتفاعها عن الارض ممتاز جدا جدا (مبحكش فى مطبات)
2- الفرامل ممتازه
3- استخدام المالتى فانكشن مريح
4- الفاميه الخلفى عشان اللى بيركب ورايا من العائله
5- كمبيوتر الرحلات والاعطال
6- استهلاك البنزين ظريف جدا
طبعا مش هتكلم عن الاير باجز عشان دى اساسيات :)
نيجى للجزء المهم اللى هو ايه عيوبها (من وجهة نظرى)
1- زجاج فوانيس الشبوره (بتتكسر من اقل حاجه)
2- الابواب اللى ورا بتزيق كل 3 شهور واظبطها وانا فى التوكيل (هى مش حاجه مهمه بس الصوت سخيف اوى)
3- الطاره قشرت (قالولى هيغيروها فى الضمان و هيكلمونى لما الطاره الجديده تيجى)
نيجى للاسئله المعتاده
1- ايه رايك فى قوة الماتور؟
الاجابه المعتاده: ممتازه جدا بالنسبه لسواقتى حاليا (انا كان معايا النترا 2007 قبلها كنت بطير بيها من على الارض بس دلوقتى اتجوزت و معايا بنوته و بطلت اللى كنت بعمله الحمدلله ) - وعلى العموم العربيه بتجرى جدا لما تقرص عالموتور
2- طب سعر قطع الغيار؟
اكيد غاليه طبعا انت فاكر نفسك راكب عربيه بتترخص تاكسى :) (بس طول مانت مبتعملش حوادث او عامل تامين شامل بتسأل ليه اصلا)
3- طب و سعر اعادة البيع؟
فى حدود المسموح بيه - تقريبا يقل 10000 جنيه كل سنه بس المشكله ان المعروض قليل و المطلوب قليل
4- طيب والتوكيل ؟
سىء جدا - بس برده ربنا يخلى مراكز الخدمه المعتمده (البرقان و الاقصى)
ايه تانى ؟؟؟؟؟
مفيش حاجه فى دماغى حاليا بس لو حد عايز يسألنى فى اى حاجه انا موجود ويارب اكون قدرت افيدكم
واعذرونى على هزارى و قله خبرتى الفنيه
والله الموفق و المستعان :)
تقييم جميل و موضوعى من غير تفاصيل كتير و لخصت فيه المفيد يا باشا
انا بافكر فيها مانيوال فعلا و اظن دى فترة كافية تقدر تحكم فيها على العربية ( 56000 )
لكن من كلامك على السرعات فى الملفات هل العربية ثباتها متواضع و لا انت مش بتضغط عليها فى الملفات
و ربنا يديك خيرها و يكفيك شرها
انا عندى سوال هى الشفتات الى فى الدريكسون دى بتنقل بين d/n/r ولا اية
شكرا طيب اية رايك فى العربية فيها مشاكل ولا اية اصل انا عاوز اجبها بس خايف
.
لو سمحتو ياجماعه انا عايز راى حد معاه اوتو p2 لانى عايز اجيبها بس فى 3 اكدوا لى انى فيه اعطال كتير وانا مبفضاش اصلح
انا زيك عاوز اشتريها وهى عجبنانى ورحت شوفتها وهشتريها وخلاص بس وانا هناك فى اوماترا قال انى فى موديل جديد هينزل منها فى12 جديد قولت استنى اجبيها هى118000 فيها تكيف تاتش وزجاج كهرباء خلفى ولو عجباك هتها وخلاص وعلى فكرة مفيش عربية مفهاش عيوب...
اهم حاجة انى قطع الغيار متوافرة ولا فيها مشاكل انى الواحد يعرف يجب قطع الغيار
بعد التحيه
واضح جدا انك عارف بتقول ايه وفاهم ومتابع
فبعد اذنك ممكن تفيدنى لانى عايز اجيب بونتو ايفو اوتو 2 بس مفيش واحد قابلته الا وشتم فى الفتيس حتى التاجر اللى هيجيبهالى عايز يحولنى لكيا ريو
ياريت لو عندك تفاصيل اكتر تقولى عليها يعنى مثلا ايه المقصود بسوء الاستخدام؟؟مانتا عارف ان مفيش شارع نضيف فى البلد هل جه معناه انه يعطل مثلامن المطبات
ياريت تفيدنى لانى اجلت الشراء لان مفيش بديل مناسب الا ريو وار بى وانا مبحبهومش
العربية موتورها جيد
على السرعات القليلة بيسحب كويس
بجيب بيها 150
مع التكييف و الحمولة الكاملة بتبدأ تحس انه ضعيف لو حاططها على eco mood
غير كدا ما اشتكيتش من موتورها خالص....بالعكس على السرعات القليلة العربية عصبية جدا و بتشد جامد عشان ال max torque بيطلع عند rpm قليل
و اخبار الفتيس ايه ؟
بالنسبة للناس اللى بتسفسر عن العربية
اولا بالنسبة للثبات لابد من تحديد السيارة اللى بتقارن بيها ماينفعش نقارن بالكورى و اليابانى دفعة واحدة بالذات اليابانى انما الكورى كله ثباته عادى جدا مش ملفت و لا مبهر فى اى حاجة
انما فى العموم ثباتها حلو جدا لو قارنتها باغلب العربيات الكورى اللى ركبتها ( هيونداى اكسل و اكسنت و فيرنا و نيو اكسنت - كيا سيراتو )
مقارنة يمكن كتير مايستوعبهاش انما و عن تجربة طبعا
ثبات الجين 2 افضل من ثبات البرافو !!!!! بنسبة ضئيلة و ليس فرق شاسع
العربية تقفيلها محترم جدا جدا و فرق كبير بيها كسيارة متقفلة فى ايطاليا و سيارة تانية زيى اللينا المتقفلة فى تركيا .... و التقفيل طبعا لصالح الايطالى
بالنسبة لاداء الموتور فى السحب و الجرى
انا جربت اكثر من مرة الايفو باكيدج 2 الاوتو سحبها ضعيف مش قوى و كنت باحس بفرق كبير جدا لما اسيبها و ارجع اركب عربيتى التانية انما موتور بصراحة موفر جدا جدا فى استهلاك البنزين
البرافو اللى معايا سحبها افضل من الايفو بس برضه مازال المستوى لا يرقى الى الـ 1600 فى الكورى و اليابانى على الرغم من انها 90 حصان و الحصان الاوربى مختلف ايا كان صناعة العربية و منشأها
باختصار الفيات سيارة راقية جدا و طابع اوربى مميز فى التصميم و الاناقة و استهلاك بنزين ممتاز و قطع غيار غالية لكن معمرة و ثمنها فيها
بونتو ايفو --- جين 2 --- حيرة بينهم - لو مكاني حضرتك تختار مين بما انك مجربهم الاتنين؟
كعربية في الاجمال + توكيل + قطع غيار+ اعتمادية
و شكرا مقدما لحضرتك
جين 2 طبعا