السلام عليكم ورحمة الله وبركاته
دى أول مداخلة ليه فى قسم الهوندا. أنا أساسا جديد فى المنتدى كله ليه كام شهر لكنى معجب جدا بنظامه وحوارات الشباب الجميلة واستفدت كتير من أراء الأعضاء. من كام شهر كنت قررت أشترى سيارة جديدة بين 160 و 170 ألف وكانت اختياراتى بين الكورولا والبيجو 308 sw والسكودا الفنتازيا, والشباب فى المنتدى أضافو الفورد فوكس والرينو فلوينس والنيسان قشقاى, وحيرتى زادت جدا. الكلام اللى قريته فى المنتدى على الهوندا السيفيك 2012 كان غير مشجع وخلانى أخرجها من اختياراتى.
يوم 29 مارس رحت توكيلات نيسان وتويوتا وبعدين اتجهت لمعرض الأهرام. موديلات جديدة كتير وكلها مبهرة وهايلة والاختيار كان صعب جدا. طبعا أول المدخل فى المعرض بدأت بالبيجو وشفت ال308 وال408 وكمان ال5008 وال3008 وال508 والتلات موديلات الأخيرة خرافية لكن أعلى من إمكانياتى ودخلت على الرينو وشفت الفلوينس والميجان ودخلت الفورد وشفت الفوكس. فى الوقت ده كنت أميل أكتر للبيجو 408 وكنت خلاص ماشى وأنا مقرر كده لحد ماوصلت للهوندا وقلت أتفرج لمجرد المعرفة وزوجتى تقوللى "أنا خلاص تعبت ياللا نروح بلاش تضييع وقت". قلت معلش برضه ناخد فكرة, وحصل اللى حصل. أكمل بعد شوية الحكاية لأن ورايا شغل