ابوس ايديكم حد يساعدنى cbr 250 عادة

**timeout** · 30-03-2012 12:48 PM

واضح ان المشكلة بتاعتى عايزة حد عنده خبرة جامدة اوى فى ميكانيكا الموتوسيكلات اليابانى بس انا هحكى و خلاص لعل حد يكون عنده كلمة يفيدنى بيها . انا اشتريت موتوسيكل هوندا 250 عادة cbr من حوالى شهرين من شخص فى القاهرة و كنت راجع بيه من القاهرة الى المحافظة بتاعتى بعد ما اشتريتة و انا مش مصدق ان حلمى اتحقق بعد خمس سنين من الاحلام و انا بحوش مليم على مليم .كنت طاير من الفرحة . و كان الموتوسيكل معايا طول الطريق ببطلة و ادورة تانى عادى خالص و كنت ممكن اسيبة ساعة او ساعتين و ادوره تانى يدور . لحد ماجيت فى نهاية اليوم روحت ركنته فى الجراج و صبحت تانى يوم علشان الاقى المفاجأة .الموتوسيكل مش عايز يدور مارش ابدا . غيرت لة بوجيهات و نظفت الكربراتير و البكات و مازال العيب موجود . الموتوسيكل و هو سخن بيدور عادى لكن لما يبرد ما يدورش ابدا غير زق و بصعوبة جدا.طبعا المحافظة بتاعتى مفهاش حد متخصص فى الموتوسيكلات اليابانى . فبدأت اتصل بميكانيكيه فى القاهرة جبت ارقامهم من على النت ووصفت لهم الحالة . بعضهم قالى لازم تحل موتور و تغير اجزاء جوه الموتور و هتكلف 2000 جنية . و بعضهم قال هتحل وش سلندر و يتظبط و يركب تانى و هتكلف 500 جنية و بعضهم قال مش هتحل موتور دى عايز تتظبط بس . وانا محتار اروح لمين . انا مازلت بسدد فى ثمن الموتوسيكل . و اى تصليح هعملة هيكون بالسلف . و خايف اروح لح ياخد منى فلوس و فى الاخ ماتتصلحش . الموتوسيكل مرمى فى الجراج بقالة شهرين لانى مبعرفش ادورة زق و نفسيتى فى الحضيض . ارجوكم حد يساعدنى.

**Hesham94** · 30-03-2012 02:42 PM

ماتقلقش الحكاية دى مش صعبة

ان شاء الله خير وحد من البايكرز اللى بيفهموا فى الميكانيكة يرد عليك :))))

**yascro** · 30-03-2012 03:00 PM

اللى انت بتقوله ده على حد وصفك ملوش علاقه بالموتور
ده ليه علاقه بحجتين
يا اما البطاريه
يا اما اللاكتوفير

**bassoom007** · 30-03-2012 03:19 PM

يا باشا خير ان شاء الله ...انا بطمنك ان دى كدة مشكلة بطارية ودى تعرفها لو بتيجى تدور والمارش صوتة يقل ....لو مش بيقل وصوتة ثابت يبقى عيب فى الاكتوفاير ودى شريحة صغيرة بتركب عند التييل ورا تحت الكرسى ودى تمنها لا يتعدى 100 جنية ونصيحة متكلمش ميكانيكية فى التليفون علشان دول بيسودو الحياة
انا مرة الموتسيكل لاقيتة بينقط بنزين ..روحت مكلمهم اللى يقولى دا الكربراتير باظ واللى يقولى مش عارف اية وطلع فى الاخر خرطوم بنزيييين .....عموما لو فى حاجة كلمنى 01002550562

**DXT** · 30-03-2012 03:40 PM

متقلقش باذن الله خير ..
انا برجح كلام العمدة وبقول عيب بطارية

**karembob** · 30-03-2012 04:44 PM

دا مين المكانيكية االـ... اللي ما بيفهموش دول الموضوع دا حواد ملوش اي لزمة وبحصل كتير اوي لا تحل متور ولا حاجة واوعي تفكر تفك المتور عشان هتتعب اكتر الموضوع دا بطارية لو البطارية شغالة تمام يبقي كربترتير عاوز ضبط لو مش الكرتبرتير يبقي البوجيهات وانا برجح البوجيهات ليه بقي عشان كل البوجيهات اللي في السوق مضروبة واللي يقلك يباني اصلي يبقي بتحك عليك ودي عن تجربة

**karembob** · 30-03-2012 04:45 PM

وراجع علي اللي قلك عليه العمدة دياب اكتر واحد خبرة فينا

**alfath8** · 30-03-2012 05:13 PM

المشكلة لا تخرج عن 3 اشياء ان شاء الله
1 الكرابراتير
2 البوجيهات
3 مشاكل متعلقة بالبطارية والجزء المتعلق باعادة الشحن

**Elturkey** · 30-03-2012 07:12 PM

حضرتك انا لسة المشكلة دى كانت معايا واتركن برضة شهور و نفس احساس بالاحباط بس متقلقش ربنا بيحلها من عندة هقول لحضرتك حاجات تعملها بدل ماتروح لميكانيكى
1- هتفك الكرسى وبعض كدة هتلاقى مسمار بتاع التنك اللى تحت الكرسى ومسمار تانى قدام تحت الهاندل بار

2- هتلاقى حنفبة البنزين هتفك الخرطوم بتاعها وهتدور المكنة لو الخرطوم بيطلع بنزين كويس وداخل على الكربرتير يبقى الحنفية او طلمبة البنزين سليمة لو مش شغالة يبقى دة العيب ولازم تتغير ودى سعرها الصينى ب300 جنية واليابانى ب1000 ومستعملة

3- ممكن يكون السلانسية مش مظبوط ودة هيحتاج ميكانيكى يكشف على الكربرتير وينضفة ويظبطلك المكنة ودة حضرتك هتعرفة وانت سايق لما بتزء وتدور صوت المكنة عالية وتحس انها بتنهج وتنتش ودة هتبقى تكلفتة فى حدود 100 جنية

4- ممكن يكون حاجة اسمها حساس نابض ودة بيبقى موجود فى الوش اللى على شمال البايك (وش النابض) ودة مسئول عن الشرز و الكهرباء ودة بيبقى فى حدود 150 جنية ودة الاحتمال الاكبر

دى نمرة تليفونى 0127245638 حضرتك تتصل فى اى وقت وانا اساعدك وباذن اللة متقلقش هيتصلح وهتفتكر الايام السودة دى وتضحك

**madakomodo** · 31-03-2012 07:37 PM

السلام عليکم :
اولا متحاولش تدور المکنه کتير من غير فايده علشان متبوظش المارش وتبقي عندک مشکلتين مش واحده
ثانيا انت قلت في وسط کلامک ان المکنه لما بتکون سخنه بتدور علي طوول ولما بتبرد مبتدرش تفضل المارش يدور ولکن المکنه مش عايزه تنتظم في الدواره مش کده?
انا حفترض انک قلت ايوه
بص انا المشکله دي قابلتني کتير بس العيب هو البيکات وبک السلانسيه بالتحديد لو تعرف حد يغيره او يشوف العيب فيه ايه بالضبط يبقي اوفر وفضي التنک من البنزين وحط فيه بنزين ٩٥ علشان لو هو مسدود من ترسبات الرصاص ولا حاچه ينضف ولو متحلتش المشکله يبقي قول علشان فيمشاکل تانيه بس مکلفه شويه?
متابع باهتمام !!!!!!!!!!!!!!!!

الموضوع: ابوس ايديكم حد يساعدنى cbr 250 عادة

LinkBack

أدوات الموضوع

عرض

-

-

-

-

المواضيع المتشابهه

اجيب جى ام كام وات؟؟؟ ابوس ايديكم ردوا عليا بسرعه

أبووووووس ايديكم ساعدوني

ابوس ايديكم مساعدة لوجه الله ضرورى جدا

عربيتي امانه بين ايديكم قولولي اعمل ايه!!!!!!!!!

ساعدوني ابوس ايديكم

الكلمات الدلالية لهذا الموضوع

المفضلات

المفضلات

ضوابط المشاركة