مقارنة بجد عجيبه و صعبة شوية ...
و خليني برضه أستخدم سياسة الإقصاء زي ماقال بعض الحبايب ..

هستبعد أول شيء أكسينت RB لإنها الأقل في الكماليات ، و التوكيل الأسوأ ، و الثبات الأسوأ ، و العفشة الأنشف ، و هي فئة أقل من السيراتو و أقل من البومة ..............
بالتالي برضه هستبعد الريو مع إن شكلها و كمالياتها كويسين ، لكنها كعربية تعتبر من الفئة الأقل برضه من البومة و السيراتو و الإلنترا و السول .. فمهما قالولك عليها حلوة على السرعات العالية هيكون السيراتو أو البومة أو غيرهم أحسن منها ...
هستبعد كمان السول .. لما دخلتها من جوه لاقيتها ضيقه ، كمالياتها كمان أقل ، قطع غيارها لسه مابقتش منتشرة ، أصحابها ماشكروليش كتير في قوتها و اعتماديتها .. ارتفاعها عن الأرض مع الجنط الكبير = عدم راحة الركاب ..

في رأيي هتكون المنافسة كلها بين ( سيراتو - بومة - جين 2 أو بيرسونا إليجانس - إلنترا ) و طبعا بالنسبة للسيراتو و الإلنترا مش معاك فلوس غير للفئة الأولى أوتو ...

بالنسبة للتسارع و قوة الموتور الفعلية أعتقد هيكون الترتيب كده :
إلنترا - بومة - سيراتو - بيرسونا ................ لكن الأداء هتلايه متقارب جدا في السفر و على السرعات العالية من تجربتي الشخصية للاربع عربيات دي .
بالنسبة للثبات و الأمان :
هنستبعد الإلنترا للإنها الأخف وزنا و لما سوقتها على سرعات عالية كنت خايف منها جدا و أغلب الناس بتشكك في ثباتها و كمان انت هتجيبها من غير جنوط ولا abs لإنك هتجيب أقل فئة ..... و أعتقد العيب ده يخلينا نستبعد إلنترا خالص ، و بعد كده البيرسونا و البومة تقريبا ثباتهم واحد بعدهم السيراتو بفرق بسيط .
بالنسبة لراحة الركاب و العزل :
بيرسونا و بومة قريبين من بعض جدا .. السيراتو هي الأقل من ناحية راحة الركاب في الكنبة الخلفية .. و في العزل كلهم قريبين من بعض و ممكن تيجي البومة أقلهم في العزل أعتقد .
الكماليات :
البومة هي الأفقر في الكماليات .. و تابلوه و شكل خارجي قديم ... يمكن ده أكبر عيب ممكن يخليك تستبعدها ...... لكن برضة السيراتو أول فئة أوتو مش هتلاقي فيها كماليات ....في النقطة دي البيرسونا بشكلها الجميل و كمالياتها الداخلية هتكسب طبعا .. خصوصا لما يكون سعرها أقل منهم كلهم بنفس الأوبشنز.
التوكيل و قطع الغيار :
بيرسونا توكيل سيء .... إلنترا هي الأسوأ لكن تقدر تتغلب على التوكيل بانتشار قطع الغيار في الخارج .. البومة أفضل قطع غيار فيهم من تجربتي و الأكثر اعتمادية و الأسهل في الصيانة ، و كمان السيراتو تقريبا وصلت لنفس الدرجة مع البومة ......... لكن برضه قطع غيار البيرسونا بتلاقيها بره لكن مش كتير ، و صيانتها برضه سهلة .

* رؤية عامة ......
- لو عايز شكل جديد و جميل و مميز ، و كماليات و أوبشنز ، و راحة و أداء ، و ثبات محترم و أمان ، و كمان توفير فلوس .... لكن هتضحي بالتوكيل خالص ... تنفض للتوكيل خالص و تظبط كده مع 2 أو 3 من بتوع قطع الغيار بره قبل ماتشتري ... يبقى البيرسونا إليجانس أو الجين 2 ......
- لو انت راجل عملي جدا و رقم واحد عندك الأسرة و التوفير .. مش بتهتم بالكماليات ولا بالشكل ... بتحب الأداء الرياضي و كمان تحس إنك ماخسرتش فلوس في عربية إعادة البيع فيها وحشة .... قطع غيار رخيصة و صيانة في أي مكان ... يبقى البومة ...
- غير كده هتجيب السيراتو ، أو الإلنترا .... في رأي العربيات دي ماتشتريهاش غير علشان الكماليات ، لكن كمقارنة عربية بعربية هتلاقي بنفس الإمكانيات سعر أقل في الصني و البيرسونا و البومة و التيدا و غيرهم كتير .... لو هتجيب هاي لاين منهم هقولك أوكاي نتكلم .. لكن مش هاي لاين أعتقد بتخسر فلوس ......