المشاركة الأصلية كتبت بواسطة mostafa53
السلام عليكم ورحمة الله وبركاته
أنا ملاحظ إنكم متحاملين زيادة عن اللزوم على السيفيك الجديدة, وده زى ماقلت فى مداخلة سابقة فى قسم الهوندا نتيجة إننا دايما متوقعين من الهوندا سبق وإبهار. يعنى لو نظرنا للجيل الثامن نلاقيه متفوق على الماركات من نفس الفئة وفى العالم كله بيسموه قائد المجموعة, لكن المرة دى مش حايكون القائد إنما ماحدش يقدر يقول إن السيفيك بقت أقل من أقرانها, الكلام ده فيه تجنى كبير عليها. أنا فى الأسابيع الأخيرة كنت باعمل بحث شامل لكل الموديلات فى الفئة السعرية من 150 إلى 180 ألف ورحت معرض الأهرام وزرت معارض التوكيلات اللى ماكنتش فى الأهرام. بصراحة بالنسبة لى السيفيك لازالت فى المقدمة يمكن مش بفارق كبير, لكن خلينا نتناقش فى ملاحظاتكم. أولا الشكل اللى إنتم زعلانين منه مبقاش شبابى ولكنه بقى محافظ ومحترم (بالنسبة لكبار السن اللى زييى). ثانيا التجهيزات الداخلية البلاستيك اللى انتوا زعلانين منه طبعا عندكوا حق إنما عايز حد فيكم يقولى أى سيارة فى نفس الفئة السعرية مختلفة عن كده؟. العربية عليت ومعظم الانتقادات على الجيل الثامن إنها واطية. مش صحراء إذا كنا حنقارن مع نفس الفئة. حسب الreviews وال test drives على المواقع المحترمة التغيير فى الموتور للأحسن وال acceleration أحسن. عايزين إيه؟