السلام عليكم،

أستأذنك إني أضيف رأيي المتواضع.

لا تفصل الطريقين عن بعض. إستشر الأطباء اللي السادة هنا قالوا عليهم. ده علشان نتأكد إن التلعثم ده شئ عارض و لا يمكن إعتباره أعراض مبكرة لمشكلة ما، لا قدر الله. و أيضاً كي يطمئن قلبك و تقفل باب الوسوسة.

لكن فوراً إبدأ طبعاً بالرقية الشرعية. و الله أنا قلبي إستريح لما لقيت حضرتك على علم بالفارق بين الرقية الشرعية كعلم شرعي ، و بين الشعوذة و العياذ بالله . أنصحك قبل ما تبدأ إنك تقرأ كويس عنها و عن هدي الرسول عليه الصلاة و السلام؛ و الشفاء من عند الله تعالى سواء كان المرض جسدياً أم روحياً.

كملحوظة جانبية، حكاية زيارة البلد مش عند حضرتك بس. أنا قابلت ناس كتير عندهم المشكلة دي، لكن بتختلف في أثر العين: اللي عربيته تتخبط، اللي إبنه يمرض، اللي يتخانق مع مراته، و غيرها. في واحد أعرفه سايب عربيته القديمه بس عشان ما يروحش البلد بالجديدة. واحد تاني رفض يجيب عربية إلانترا (مع إن معاه فلوسها و عاجباه) لأن شكلها الضخم سيقضي عليها في أول زيارة للبلد :). الأسباب كتير لكن معظمها يعود لإنتشار الجهل بالدين في أعماق البلاد.

شكراً، و آسف للإطالة.