يا جماعة انا شايف انهاردة فى ملحق السيارات بتاع الاهرام غبور حاطط الانترا ب 122 الف جنيه،
هو انا عينية فيها حاجة و لا غبور اتجنن؟
عرض للطباعة
يا جماعة انا شايف انهاردة فى ملحق السيارات بتاع الاهرام غبور حاطط الانترا ب 122 الف جنيه،
هو انا عينية فيها حاجة و لا غبور اتجنن؟
ايوة فعلا!
انا برضه لاحظت الموضوع ده. بس ممكن تكون غلطة مطبعية؟ :roll:
لأنه حاطت سعرين للالانترا بفرق 4الاف جنيه والفرق الوحيد الجنوط السبور!
لاحظ ان الاعلان عن المانيوال كمان مش اوتوماتيك.
والظريف بقى ان عنوان الصفحة الكبير فوق مفاجآت غبور تتوالى
هى فعلا مفاجآت :lol:
انا برضه ضحكتنى اوى :lol: حكاية مفاجأت غبور، بس المصيبة لحسن يكون هو يقصد اللى بيقوله، لأنى شايف ان فى ناس كتير من اللى حاجزين الانترا لسة مستلموش و بيماطلهم و كانو بيقولوا ان سعرها هيغلى، بس 30 الف ده مبلغ ظريف جدا :x :x
الزياده الكبيره دية للكماليات الجديده......... واللى هيا مش موجوده فى الموديلات الحاليه
وهى
اير باج
فرامل ABS
زجاج ملون
تكيف تاتش
الدركسيون به وظائف متعدده
الكاسيت الأصلى (مش ال JVC بتاع عشم نواره)
وكماليات زياده اخرى
اقتباس:
المشاركة الأصلية كتبت بواسطة mido777
ميدو بيتكلم صح أنا لسه متصل حالا بمبيعات مستر "غبور" وقالولي إن الزياده زي ما قال ميدو
2 إير باج
فرامل ABS
جنوط أسبور 16
كاسيت
بس ما قلوليش على موضوع التكييف التاتش ده ولا موضوع الكماليات الزياده دي
على العموم السعر ده مبالغ فيه وكده تبقى العربيه مش منافسه (من وجهة نظري)
السلام عليكم ورحمه الله
اعتقد ان غبور بتصرفه العريب هذا ممكن يخرج السياره من المنافسه السعريه للسيارات ذات السعر 120000 جنيها
لان اليابانى سوف يتفوق
تحياتى
السلام عليكم
على فكرة يا جماعة دا سعر العربية اللى فيها الأوبشن الجديد
لكن لسة الأوبشن القديم موجود يعمى بقى فيها كذا موديل
كدة العربية اغلى بمراحل من اللانسر و كذلك اغلى من الكورولا ال 1600، مستر غبور الظاهر عليه انه بيهرج :? .
هو فيه تشابه اسماء بينه وبين الهوندا
بس مش قوى كده يعنى :D
لآ أعتقد إنه لما شاف السيفك الجديدة نازله ب 140 ألف و 1600 سىسى قالك بس فرجت :) ههههه
أكيد بيحلم أحلام العصافير و الكناريا
السلام عليكم ورحمة الله وبركاتة
الكلام دة صح لأنى سألت على العربية فى الزقازيق ( انا كنت رايح أشترى لانسر) الراجل قال لى خد النترا وقال لى سعرها 120000 الكلام دة الأسبوع الماضى
اسامة عبد العزيز :roll:
هو فعلا اتجنن لأني حفضل اشتري هوندا سيفيك الجديدة عن النترا
يا جماعة الغاوى ينقط بطاقيته زى ما بيقولوا فى الأمثال
و طبعا السعر مبالغ فيه جدا وده مش جديد على المستر غبور
يعنى فى 2004 عند بداية طرح الفرنا الكورى كانت ب90 ألف كاملة أتوماتيك و لو عاوز كاملة بجد زى برة يعنى إيرباج و جنوط سبور و مانع إنغلاق فرامل و كاسيت إسطوانات أصلى قالولى ساعتها نجيبهالك ب 105 ألف و كانت الإلنترا ب 99 :!:
:lol: 8) :lol:
مع احترامي
ولكن لو حط فيها قرد عمري ما ادفع فيها 122 الف جنيه
اظن ان اى حد كان بيفكر فى الالنترا هيفكر تانى لان هى كدة سعرها مش منافس على الاطلاق وهيكون قدامه اكتر من اختيار احسن منها فى حدود السعر ده
هو القرد كده يعملوا كام يا شهبور :mrgreen:
يعني انا لما يكون قدامي لانسر 1600 كلاسيك اتوماتيك ب 93 الف خليجي بضمان 3 سنين او 60 الف كيلو
مع كل مميزات الخليجي او حتي هاف اسبورت ب 101 الف
هل ممكن اروح اخد اللنترا بتمنها المبالغ فيه ده عشان جنوط 16 ممكن اركبهم انا ولا ايه بي اس واير باج
دي الهوندا سيفيك 1600 بتخرج 140 حصان خدوا بالكم كويس قوي من الرقم ده وبضمان 125 الف كيلو
ولا ماذا 3 خليجي برضة بضمان 120 الف كيلو بتبتدي من 115 الف
لالالالالا
ده خطأ في التسعير ولازم يرجع عنة فورا
خاصة ان اعادة البيع بتاعتها هاتبقي ضعيفة جدا
لان اللي بيشتري مستعمل بيبص علي سعر منخفض مش كل الكماليات دي
كريم منير]
هيا اه فيها شبه من b m w الفئه التالته بس لدرجه انو يغلي سعرها بالمنظر دا
يا جماعه أسمحولي أقول رايي
الألنترا الجديده أساسا مش عجباني (رأيي الشخصي) سواء بسعرها القديم أو الجديد أو أي سعر يحطو سنيور "غبور"
لأني قبل كده من حوالي 10 أيام كنت في "غبور" قسم الهياكل (سمكره ودوكو) وشوفت هناك أكثر من عربيه "ألنترا" موجودين بيتصلحوا وفيهم نفس المشكله
أيه هيه المشكله ؟
المشكله إن العربيه صدرها فايبر (بلاستيك) يعني الريداتير والفوانيس والكلاكس وخلافه متعلقين على الصدر الفايبر (بلاستيك) ده وكمان الصدر من ضمن وظايفه أنه بيحمي الحوض والموتور من الصدمات في الحوادث لا قدر الله وماتهايقليش إن البلاستيك هايقدر يحمي حاجه
المهم لقيت العربيات دي موجوده وكلهم بيغيروا الصدر البلاستيك عشان متكسر (إللي ريحت عليه عربيه وإللي رخبط خبطه بسيطه و إللي .... ) المهم العربات سليمه وزي الفل لكن الصدر مكسر والريداتير واقع
ولما سالت الصدر ده بكام قالولي أنه بـ1500جنيه بالتركيب (وعلى فكره تركيبه بمسمارين 10من فوق وزيهم من تحت !!!!!)
طبعا أنا أستغربت جدا من حاجه زي كده وأزاي يبقى الصدر بلاستيك ؟؟ وسألت أحد العاملين هناك لقيته هو كمان مستاء من الحكايه دي وقاللي كل يوم التاني بيجلنا نفس العيب
طبعا أنا بعد ما رجعت من هناك كتبت إللي شوفته في منتدانا القديم ... بس لقيت بعض الزملاء إللي حاجزين العربيه زعلوا وتضايقوا من كتابتي لما رأيته هناك وقال لي أن هذا الفايبر (البلاستيك) مقوى وجامد ومعمول حسابه كويس من قبل المصمميين
وأنا حرصا على زعلهم مارضيتش أطول في الموضوع وأكتفيت فقط بنقل الصور إللي صورتها للصدر البلاستيك
المهم أنا صورت لكم وأنا هناك الصور دي والصدر إللي أنا أقصده هوه إللي لونه أسود في المقدمه
http://www.up4world.com/images/store10/0448f1b7b2.jpg
http://www.up4world.com/images/store10/dbf3b8ea11.jpg
http://www.up4world.com/images/store10/485cbf89b4.jpg
سبب التعديل :- تصحيح كلمة (سكمره) لتصبح (سمكره)
:shock: سوق السيارات في مصر سمك لبن تمهندي!!!!!!!!!!!!!!!
لأ و الظريف في الموضوع ان المعجزة بتاعته أم 122000 لازم تحجزها و تستنى 4 شهور برضه زي التانية....
حسبي الله و نعم الوكيل....
أنا شايف ان الياباني برقبتها طبعا ياجدعان
يا جماعة الموضوع دة أكيد فيه "إن" ... غبور مش أهبل أو مبتدئ و هو عارف كويس ان عربيته مستحيل تتباع بالسعر دة ... يبقى تفتكروا ليه منزلها بالسعر دة؟ أكيد عايز يبعت رسالة معينة ... ايه هى؟ أنا مش عارف لكن ممكن نفكر سوى ... و اللى أنا فكرت فيه و قد يكون صح أو غلط انه لما حب انه يجمع السوناتا فى مصر نزل الأول الكورى بتاعها بـ 250 ألف و بعدين نزل المصرى بـ 150 ألف ... هل ممكن يكون بيخطط لتجميع الالنترا فى مصر؟ خاصةً ان الفيرنا أعتقد آخرها معاه السنة دى أو اللى جاية ... و طبعاً الأكسنت الجديدة معليهاش اقبال فصعب يحاول يجمعها ... و السوناتا غالية فلازم يطرح سيارة تحل محل الفيرنا ... فاحتمال تكون الالنترا ... عامةً دة اللى انا خمنته و الله أعلم.
فعلا كلامك يا باشمهندس أ"حمد" منطقي جدااقتباس:
المشاركة الأصلية كتبت بواسطة جندى مجند
ولو الأيام أثبتت صحة وجهة نظرك سوف نقوم بتعيينك مستشار خاص بـNile Motors للتوقعات
السلام عليكم
بصراحة أنا شايف إنه عملها كده لإنه شاف إن السيفيك الجديدة اللى فيها نفس الأوبشن دا ب140.000 جم و الكرولا و اللانسر الجديدة نزله فى نفس السعر تقريبا فكده يبقى هو أقل منهم ب20.000 جم و فى المقابل الأوبشن القديم موجود و بسعره القديم فدا حيشجع الناس إنها تشترى الأوبشن القديم لإنه شايف إن السيارة سعرها عالى فى الأوبشن الجديد فيخلى عليها إقبال.
و الله يا مستر بايو مافيش حد زعل فى المنتدى القديم أحنا ردينا عليك و أنت ما ردتش و ما تناقشتش مع أى أحد سواء من المالكين الحاليين للسياره أو الحاجزين و حبيت أنقلك ردى
أكيد مش بلاستيك
mo3tazselim@gmail.com 18/04/2007 10:15:59 ص
عدد القراء : 120
و الله يا بايو أنا لست متخصصا فى عالم السيارات و خبرتى تنبع من تعاملى مع السياره فقط بمعنى اننى لست دارسا أو متخصصا
و من ذلك لى ملاحظه صغيره بالنسبه للصور التى قمت سيادتك بإلتقاطها ... إذا كان الصدر إتكسر ل 100 قطعه زى ما حضرتك قلت يبقى إزاى الإكصدام الأمامى سليم بالمنظر الواضح بالصوره منطقى جدا إنه هايكون إتفتفت و لا أيه ... و على فكره أنا برده للأمانه هانزل أبص على عربيتى و أنا مروح من الشغل و ها أقول أيه اللى شفته
و فى انتظار اراء الأخوه المتخصصين
معتز
و كمان رد أخى المهندس حسام منير
هو يوم بلاستك ... وباين من اوله ... _حسام منير_
hossam_monir@yahoo.com 18/04/2007 10:40:12 ص
عدد القراء : 182
يا باشمهندس باييو ... صباح الفل ...
أولاً: العربية دى الجماعة بتوع هيونداى مهتميين بيها اوى ومسمينها طفلة هيونداى المدللة وعاملة فى أمريكا Rank عالى جداً ... صحيح ان اللى فى أمريكا مش نفس المواصفات بتاعة الشرق الأوسط ... ولكن الفروق فى الكماليات مش فى الأساسيات ... الشاسيه والموتور ..فمعتقدش ان العربية ممكن يكون فيها عيب قاتل حسب تصوير حضرتك للموقف ...
ثانياً : ده رابط للعربية علشان سيادتك تشوف مقطع فى الشاسية بتاع العربية :
http://www.hyundaiusa.com/vehicle/el...ty/safety.aspx
فى كلمة : Structural integrity دى اللى فيها الصورة بتاعة مقطع الشاسية يبان ان هناك كامرتين حديد بارزيين هما دول اللي بيركب عليهم الصدر ويعملوا أيضاً كممتصي صدمات فى حالة الحوادث القوية لقدر الله ...
ثالثاً : فى صور سيادتك بالتحديد الصورة دى :
http://www.up4world.com/images/store10/485cbf89b4.jpg
تلاحظ سيادتك قضيب عرضى من الحديد الأسود المعالج ضد الصدأ دى بتبقى خلف الرفرف الأمامى وفى منتصف الرادياتير عرضياً لحماية الرادياتير والمروحة هى دى الكمرة اللى بتأخد الصدمة...
رابعاً : الفكرة دلوقتى فى كل العربيات الجديدة انه بيفصل الصدر عن الشاسية حتى يخفف من وزن السيارة ويركب الصدر منفصلاً عن الشاسية وهو بيبقى مش بلاستك بالمعنى اللى سيادتك وصفته ... حسستنى انه تبع سبتة الغسيل البلاستك اللى بتتباع فى الشارع ... دى لدائن من مشتقات البترول لها كثافة معينة ممكن ان تمتص الصدمة دون ان تكسر وفى نفس الوقت لها وزن خفيف ... ولو سيادتك بحثت شوية هتلاقى أن كل العربيات الجديدة الصدر فيها منفصل عن الشاسية ...
خامساً : من حوالى شهر أنا شفت العربية دى عاملة حادثة أمامية فى طريق الاوتستراد أمام المنصة ... أعتقد أنها جامدة ... كل اللى حصل أن الرفرف أتشرخ شرخ كبير جداُ لأنه منفوخ ووراه فراغ ثم الكمرة العرضية لكن لا الكبوت ولا العربية حصلوهم حاجة علشان المسافة من الرفرف إلى الرادياتير كبيرة إلى حد ما ...
سادساً : أنا عارف ومتاكد أن نيتك سليمة 100% فى تحذير الناس اللى عايزة تشترى العربية أو حاجزاها ... وانا واحد منهم ... ولكن ساعات الأسلوب يا باشمهندس بيبقى مزعج جداً ... يعنى أنا عن نفسى مستغرب أوى طريقتك فى كتابة الموضوع ... بصراحة وكلمة فى ودنك ... مش عارف ليه حسيت من الاسلوب فيه نبرة تهكم ... أو سخرية من العربية ولا ايه بالضبط ... بصراحة مش عارف ...على العموم الفرق بين النصيحة والسخرية شعره ...
أخوك م / حسام منير
و فى ردود من أحد الأخوه فى المنتدى العام السابق بص للأسف مافيش وقت دلوقتى علشان أنقله
أسف للأطاله
مفيش حد بص للموضوع من ناحية تانية ليه مش يمكن غبور عارف خبر احنا مستينه بفارغ الصبر وطبعا مفيش غير خبر واحد وهو تخفيض الجمارك لان زغبور مش من سياسته انه ينزل عربية بكمالياتها الاصلية وبسعر عالى وغير منافس انما طول عمر منتجاته منافسة جدا بجد فالموديل اللى هو طرحه ده هيكون منافس بعد الجمارك ماتنزل ان شاء الله وهو طرحها من دلوقتى عشان يضمن شوية حجوزات لانه زى مانتو عارفين مش بيسلم قبل شهرين او تلاتة :shock: :shock: :shock: ده طبعآمجرد فرض من واحد بيحلم وامنية حياته ان الجمارك الملعونة تختفى قولوا آمين :lol: :lol:
أهلا بيك يا أ/ معتز
أنا بجد مارضيتش أكمل كلام في الموضوع ده عشان أنا كنت فاكر الناس هناك (وأنت واحد منهم) ممكن يزعلوا من رأيي ده
وأنا عشان فعلا بخاف على شعوركم مرضيتش أكمل حوار حول الموضوع ده
ولكن لو اعرف أنك انسان متفتح بالشكل ده ومابتزعلش لما حد ينقد عربيتك كنت كملت
لكن ملحوقه أحنا هنا إن شاء الله هانتكلم بارحتنا وللصبح
أما عن كلامك بخصوص القضيب الحديد العرضي هو فعلا موجود وفعلا قوي ومتين لكن لو الخبطه جت فوق القضيب ده لن يحمي شيء على الأطلاق
أما موضوع إن الفايبر (البلاستيك) قوي ومعالج ..... هاقولك أنا نقلت غللي شوفته ونقلت رأي المهندس أسامه مسئول قسم السمكره والدهان بمكرز غبور فرع قليوب
وعلى كلاٍ الواحد المفروض يتوخى الحذر ويحاول يسوق بتأني لكي يتلاشى مخاطر الحوادث وإذا حصل حادث قوي فلن ينفع صدر حديد ولا صدر بلاستيك
زأنا سعيد بالحوار معاك يا أ/ معتز
اعتقد ان غبور كان عاوز يحط اي عربية في الفئة السعرية الوحيده اللي فارغة عنده من 100 ل 130 الف و فقال لنقسه يمكن حد يكون معجب بغبور اوي و نفسه يشتري من عندنا و معاه 130 الف عاوز يصرفهم كلهم
اصله لازم يكون حد قتيل غبور يعني علشان يشتريها
الواحد يتكل على الله ويزود عليهم يجى 80 ألف كمان ويجيب فولفو اس 40 :D
اقتباس:
المشاركة الأصلية كتبت بواسطة الريس
ليه؟
هوه فاكر نفسه مين ؟ "غبور فهمي" وللا "غبور رمزي" وللا يكونش "غبور حافظ"
الله يمسيك بالخير يا حسين يا فهمي وانت يا احمد يا رمزي ويرحمك يا حليم
واحد زية خلاص تمكن من 28 % من السوق لازم يتحكم التحكم دة بس انا حاسس زى ماقال زميل هنا ان دى كابداية انوا هايبتدى يصنعاها فى مصر وينزل تمنها زى السوناتا :!:
في رائي دا سعر خرافي يعني الميجان المنوال ارخص منها وفيها سينسور نور ومطر ومثبت سرعه و كومبيوتر رحلات محترم
ومتقدم
معلش يعنى لو حشترى عربية فى حدود 120 حفكر فى اى حاجة يابنى ارخص كاش
او اقسط اى حاجة اغلى وانا الكسبان
اكيد هتكون احسن من الميجان
بجد العربيه دى احسن من الميجان بكتيرررررر اوى شكرا على الايضاح
kowayes eno nazel feeha ABS we airbag
3ashan el 3rbya de btgry gamed we haram mayb2ash feeha safety kda
3al 3omom ghabbour 3ayish fe door BM
hata el seyana 3ando 3'lya gedan we tasle7 kol haga 3'ly gedan wala ka2eno tawkeel mercedes
سنتيالاسعار هيونداى السعودية
165300
ازيرا
69950
سوناتا
49050-75000
النترا
44300-54500
اكسنت38000
سانتفي
84000-102000
فيراكروز
95000-129000
توسان
57000-70000
تراجيه
56000-66000
غبور ده بيستعبط عمال يعلى فى اسعاره والناس برضه بتشترى يعنى ايه 122000 الانترا حلوه بس مش اوى كده هو كده بيحط الالنترا مع المازدا 3 والتيدا والامبريزا
انا قعدت فتره ماتابعش الاسعار بس اتصدمت لما لاقيت غبور مغلى الالنترا 6000 جنيه ليه هو فاكرها لكزس والا مالهاش منافسين.....يعنى ايه الالنترا 1.6 مانيوال تبدا ب ب104000 ليه ان شاء الله ؟ ..... يعنى فرق بينها وبين الجين2 المانيوال 20000 ....ده اسمه نصب واحتيال ... وبرضه الناس لسه بتشترى عربياته
انا لست ضد هيونداى .. بالعكس انا بحترمها جدا كشركه قدرت تناطح العمالقه وتقف بينهم وليها عربيات تحف فعلا الازيرا والجينسيس ...انما اللى مايتسمى ..منه لله هو واللى زيه وربنا يخلصنا منهم ومن جشعهم
..mokhtar..