اشتريت عربية 128 وعايزة أسأل عن صيانتها وترويشها

**أبومعاذ** · 09-06-2008 12:25 PM

في ميكانيكي في شارع منشية التحرير (لو حضرتك جاية من عند المزلقان و مشيتي في شارع عين شمس هتلاقي على شمالك محل شيخ البلد بتاع الكباب و الكفتة هو الشارع اللي على ناصيته شيخ البلد اسمه منشية التحرير) 200 متر من ناصية الشارع هتلاقي على يمينك ميكانيكي اسمه حسن و حسين ممتاز جدا و مش بيشتغل حد بس هو على طول زحمة و الميزة اللي فيه انه بياخد العربية يجربها و يعرف ايه اللي فيها بالنسبة للمبتدئين

**YaSSerwIN** · 09-06-2008 11:31 PM

بصى يا ستى

انتى هاتمشى فى شارع عين شمس علطول لغاية المزلقان هتلاقى فى شارع على يمينك أسمو الشارع الجديد على نصيته سنترال عين شمس
هاتفضلى ماشية فيه أسألى اى حد على شارع السيد أحمد هتلاقيه على نصيته هناك بعد محل عصير القصب أسألى اى حد عن محمود الميكانكى هتلاقى قبل بتاع الكاوتش علطول

قوليله انا جايه من طرف ياسر بتاع ال 127 .. وبأذن الله هايعملك فحص للعربية ويشوف اية الى محتاج يتظبط ويعمله وعلى فكرة أسعاره كويسة جدا ً فى المصنعية

**leopard00** · 10-06-2008 05:48 PM

السلام عليكم
انا اشتريت عربيه 128 موديل 2001و 1300 سىسى وعايز اعرف ايه رايكم فيها دا اولا
ثانيا عايز اعرف هل يمكن يتركبلها تكييف وفين وبكام؟
وشكرا

**أبومعاذ** · 10-06-2008 11:49 PM

المشاركة الأصلية كتبت بواسطة leopard00

السلام عليكم
انا اشتريت عربيه 128 موديل 2001و 1300 سىسى وعايز اعرف ايه رايكم فيها دا اولا
ثانيا عايز اعرف هل يمكن يتركبلها تكييف وفين وبكام؟
وشكرا

الف مبروك ال 128 ال 1300 عربية جميلة جدا و كانت معايا و سحبها ممتاز و استهلاك البنزين كويس
بس خللي ايدك فيها على طول عشان متفتحش بقها زي ما بيقولو
موضوع التكييف انا معرفش فيه بس اللي سمعته ان موتورها ميستحملش التكييف و انه يفضل يتسقطلها موتور بتكييفه

**iBiZa** · 11-06-2008 10:50 AM

المشاركة الأصلية كتبت بواسطة birdybirdy

انا روحت امبارح التوفيقية وسألت على شوية حاجات كده زي هوايات الكبوت ولاقيتها ب 15 جنيه قللته في حاجة احسن قالي دي احسن حاجة مش عارفة بقي دي المصري ولا الاستثماري اللي حضرتك بتقول عليها ،

لا هو دة مظبوط.

المشاركة الأصلية كتبت بواسطة birdybirdy

المهم روحت بقي لهشام وسألت على الإنذار وراني كذا نوع قالي كلهم في رنج ال 200 جنيه بالتركيب ولو من غير تركيب بيشيل 30 جنيه من ثمنه بس. وراني نوع اسمه (FM) ونوع تاني مش فاكرة اسمه

تقريبا صان وان (معلش لو الإسم غلط) وقلتله وريني Wolf
وراهوني المهم قلتله ايه الفرق قالي هي العربية نوعها ايه لما قلتله 128 قالي النوعين الاولانين كويسين لكن Wolf مش برشحه لل 128 عشان الشحن والكهرباء بتاعتها وWolf بيلخبط معاها لكن بيبقي كويس للزيرو.
المهم دلوقتي كل الإنذارات اللي انا شوفتها في رنج ال 200 بالتركيب هل السعر ده
فعلا كويس ولا غالي ومحتاج افاصل ولا ادور عند حد تاني ولا إيه؟

هو طبعا فاهم فى التركيب كويس فا لو قالك انة ساعات بيعمل مشاكل يبقى بلاش من ال Wolf.
الFM دة انا مسمعتش عنة قبل كدة.
الSun1 فية ناس كتير مجرباة و بتشكر فية اوى.

فى بلدنا دية تفاصلى فى اى حاجة.
ممكن تروحى تبصى عند ناس تانية برضة و تاخدى فكرة.

المشاركة الأصلية كتبت بواسطة birdybirdy

سؤال كمان هل اركب الإنذار عنده لما اشتريه منه ولا اشتريه واخلي حد تاني يركبه انهي افضل يعني وليه؟

يفضل عندة علاشان:
1-لما يركبة لو فية مشكلة بعد كدة مش هيقولك اتركب غلط
2-العيال الى بتركب فاهمة فا مش هيبوظوا حاجة
3-مفيش حد هيركب باقل من 20 جنية فا مش هاتفرق على 10

**R A N A** · 11-06-2008 12:57 PM

المشاركة الأصلية كتبت بواسطة iBiZa

لا هو دة مظبوط.

طيب علي خيرة الله .
طب بالنسبة لموضوع الشمس بقي اللي بتسويلي العربية دي اتصرف فيها ازاي؟
انا لاقيت حاجات للشمس منها بتاعة كده بتتكور دي ب 15 جنيه وواحدة تانية اسمها ستاير كبس بتركب في الزجاج الخلفي دي باين ب 30 جنيه؟ ايه النظام بقي واشتري ايه ولا افيم زيرو؟ ( بس خايفة من المرور).

هو طبعا فاهم فى التركيب كويس فا لو قالك انة ساعات بيعمل مشاكل يبقى بلاش من ال Wolf.
الFM دة انا مسمعتش عنة قبل كدة.
الSun1 فية ناس كتير مجرباة و بتشكر فية اوى.

هو مكتوب عليه F.M.D تقريبا

فى بلدنا دية تفاصلى فى اى حاجة.
ممكن تروحى تبصى عند ناس تانية برضة و تاخدى فكرة.

أوكي هاشوف كده المرة الجاية بس انتوا رشحتولي هشام ده علي اساس يكون مضمون يعني مش شرط الرخص المهم يكون مضمون لإني معنديش مانع ادفع زيادة بس تبقي في محلها يعني.

يفضل عندة علاشان:
1-لما يركبة لو فية مشكلة بعد كدة مش هيقولك اتركب غلط
2-العيال الى بتركب فاهمة فا مش هيبوظوا حاجة
3-مفيش حد هيركب باقل من 20 جنية فا مش هاتفرق على 10

عندك حق بس انا لما سألت مكنش هايفرق معايا 20 من 30 جنيه تركيب بس سألت علي اساس ان لو حصل حاجة فيها هاطخ شموار لحد وسط البلد.
بس مش مشكلة اهو عشان يبقي من عنده وهو اللي مركبه عشان ميقدرش يماطل معايا لو حصله حاجة.

ميرسي جدا ليك علي فكرة حضرتك بجد متعاون جدا وليك خبرة كويسة في المجال ده. :)