قصة حضرتك حصلت معايا بس علي شكل اوسع واغرب
انا كان معايا لانسر بومة زيرو سوبر اكشن موديل 2008 وفي 2010 شهر 1 اشتريت لانسر شارك هاي لاين لونها اسود اللي كان فيها زينون بس وناقصها باقي الكماليات ومكنتش اعرف ان سعر الشارك واقع كده المهم اشترتها لاني اول ما دخلت العربية وكانت فمعرض زي ما تقول قلبي انشرحلها وحبتها لدرجة الجنون
وبعد حوالي شهرين عرفت الشارك الكويتي اللي فيها كل الكماليات من صب لزينون لحساسات لبصمة وروكفورد وaux
وقررت اني ابيع الشارك اللي معايا عشان اجيب شارك كويتي
المهم روحت معرض تاني لقيت اوكتافيا a5 هاي لاين ماشية 45000 كيلو فقولت بيني وبين نفسي اكيد ركوبة الاوكتافيا اعلي والماني وثبات وبرستيج رحت مدخلها فالشارك بتاعتي ودفعت فرق حوالي 20 الف
اول ما ركبت الاوكتافيا حسيت اني مش حابب العربية زي ما حبيت الشارك وندمت جدا جدا لدرجة اني كان نفسي اروح لصاحب المعرض تاني وارجع عربيتي بس مرضتش عشان هيبقي شكلي وحش جدا
فضلت معايا الاوكتافيا حوالي شهر بحاول ابيعها لاني مش حابب العربية وكل ما اشوف عربية شارك فالشارع قلبي يروح عليها وافضل باصصلها كانها بتناديني
قررت اني ابيع الاوكتافيا وروحت لمعرض عربياته نضيفة جدا جدا وتعبر زيرو لقيت عنده كروز زيرووووو بمعني الكلمة وتمنها رخيص جدا فقولت ادخلها فالكروز وانا الكسبان وليا فرق فلوس كمان
جبت الكروز وكان عاجبني التابلوه بتاعها كشكل لكن كخامات تعبانة جدا جدا مقارنة بالشارك والاوكتافيا والاوبشنز اللي فيها قليلة جد اجد اجدا وقولت بيني وبين نفسي انا ايه اللي بعمله ده كل شوية اجيب عربية وابيعها ومتقعدش معايا اكتر من شهرين حتي اصحابي افتكروني بقيت تاجر عربيات لكن ده كله عشان اوصل لشارك كويتي
وعشان الواحد ربنا بيحبه والحمد لله يوم ما اشتريت الكروز كان في واحد صاحبي عزيز عليا كان رايح يشتريها من المعرض اللي انا خدتها منه ولقاني اشترتها فبعتهاله تاني يوم بنفس التمن
ومن هنا قررت اني متسرعش لاني مسكت فلوسي تاني وكسبت عليهم كمان
وقعدت حوالي اسبوع مستني الاقي شاررك هاي لاين كويتي حالتها نضيفة ونزلت السوق وفالاخر جبتها من كونتاكت
واول ما قابلت صاحب العربية واستأذنته اني اركب العربية واقعد فيها من جوه حسيت ان روحي رجعتلي تاني كاني كنت مسافر لسنين ورجعت لاصلي مقدرش اقول لحضرتك انا كانت سعادتي كانت قد ايه لما اشتريت الشارك تاني
ومن كتر حبي فالعربية عدلت عليها وقلبتها جي تي بموتور 2000 سي سي وجنوط 18 وعمود اتزان خلفي وفرامل ورا وقدام ومثبت سرعة وبلوتوث وفتيس cvt وتيبترونيك وبدالات ورا الدركسيون وجبتلها كبوت كاربون فيبر بتاع ايفوليوشن
واللي شجعني عالخطوة دي ان كانت في عربية جمرك شارك جي تي ركبتها وحسيت اني راكب الماني بمعني الكلمة لا واشد من اي عربية الماني 2000 سي سي وستابلتي فوق الوصف
والحمد لله اني من ملاك العربية الكنز دي اللي بعتبرها اني مش هعرف احب عربية غيرها
وبالرغم اني معايا بي ام 320 موديل 2009 هاي لاين لكن مبحبش اركبها زي ما بحب اركب الشارك ومحدش يضحك عليا او يستغرب لكن هي مسالة حب وقصة غراااااااااام بيني وبين الشارك
واسف اني طولت عليكوا
المفضلات