قررت انى امشى بالراحة وخصوصا بعد اوامر عليا طبعا ( زوجتى ) وتأنيب الضمير حرام عليك كفاية كدة بقالك طول حياتك بتمشى بسرعة خلاص بقى اهدى وامشى بالراحة والكلام اللى انتوا عارفينة دة واكيد بيتقالنا كلنا وطبعا الحاج والحاجة لما بيكلمونى يطمنوا عليا اول حاجة بيقولهالى الحاج مشيت على كام انهاردة 180 ولا 200 خلاص الناس حفظونى
المهم قررت انى امشى هادى ودية كانت تجربة اول يوم هدوء بجد حتى مع اى ظرف من الظروف وللاسف كانت تجربة مريرة اصابتنى بالملل + حرقة الدم + ماسك لسانى بالعافية عشان المدام نيجى بقى للى حصل
طبعا قررت انى امشى بسرعة داخل المدينة لا تتجاوز ال60 كم , وفعلا مشيت وعملت كدة وطبعا اتحرق دمى وساعتها عرفت ان الشعب المصرى كلة بيجرى , الكل كان بيكلكسلى عشان اشد , واللى يكسر عليا واللى كان هيخبطلى جنب العربية , واللى عمال يزعق , واللى يقف قدامى مرة واحدة , واللى عايز يدخل من اليمين للشمال يروح جاى قدامى وكانت هيصة مانا لقية بقى , فطبعا اتنرفزت جدا ومسكت اعصابى ومراتى بتقولى مالك متضايق لية قولتلها بقولك اية " اللى انا فية دة بسببك انتى ادينى ماشى بالراحة وكنا بردة هنعمل 100 حادثة " والحمد لله ربنا سترها كان فية اتوبيس سياحة طبعا مش عاجبة انى ماشى بالراحة راح واخد غرزة منى وكان هيضيعلى الجنب روحت رايح الناحية التانية على طول والحمد لله كانت فيها مكان ادخل فية
المهم طلعنا الدائرى وقولت اية همشى عادى بقى واللى عايز يجرى يجرى براحتة , المهم طلعت الدائرى وقولت مش هعدى 90 ( السرعة القانونية ) مشيت عادى بتاع دقيقة كدة وفجأءة الكلكسات والانوار تنهال عربيات بتجرى وبتغرز واللى كان هيخبطنى لان بسلامتة بيجرى مع واحد وبيشد وعايز يطلع منى مع انى ماشى فى النص وسايب حارتين على شمالى وحارة على يمينى والحارة التانية اللى على يمينى طبعا مخصصة لسائقين الميكروباص لانهم بيقفوا مرة واحدة فمش باجى جنبها
المهم واحد بهيونداى اكسنت ماشى دايس وعايز يعدى روحت موسعلة الاقى واحد ورايا عمال يديلى فى اشارات روحت موسعلة بقيت مقضيها شوية على الحارة دية وشوية على الحارة دية لما اتخنقت وقولت فى بالى " والله لو كنت بجرى محد فيكوا كان شاف حتى الفوانيس " وماشى بقى خلاص هنفجر من كتر حرقة الدم وايدى ورجلى عمالين ياكلونى والشيطان شغال وبيقولى اجرى وريهم مقامهم , وفى وسط كل دة يطلعلى واحد معاة عربية c180 2003 بيشد وعمال يجرى طبعا قولت امسك نفسك كمل للاخر انت خلاص قربت على البيت
وبعد كدة فى اخر جزء كان فية ملف او نزلة كدة كنت باخدها اقل واجب 120 كم قولت لأ خلاص اهدى روحت واخدها على 70 كم وماشى بالراحة يطلعلى واحد بميكروباص عايز يطلع منى وعمال يدينى فى انوار وكلكسات وانا اصلا بقلق منهم لانهم مابيبقوش معاهم فرامل اصلا فممكن يخبطنى , فروحت موسعلة وقولت فى بالى "حتى الميكروباص ياجدعان بيطلع منى "
ورجعت البيت وحسيت انى متنرفز جدا لدرجة انى طلعت مراتى البيت ونزلت اتمشيت شوية عشان مابقاش عصبى لانهم بجد نرفزونى جدا وقررت " انى مش همشى كدة تانى " لان فعلا الشعب المصرى كلة بيجرى واللى مش بيجرى بيداس وبيتاخد فى الرجلين , والله لما كنت بجرى محدش كان بيستجرى يعمل كدة لانى ماكنتش بشوف حد ورايا او معايا اصلا وفعل السائقين المصريين اصبحوا لا يعرفوا شيئا عن القيادة وانا اتأكدت دلوقتى انك لو ماشى بالراحة العربية هتبقى فى خطر اكتر وانت ماشى سريع او على الاقل هتلاقى نفسك بتدخل فى مشاكل مع اللى حواليك
وبجد احنا ماشيين بستر ربنا , وطبعا والله بدون مبالغة انا واخد الطريق كلة كدة حرقة دم ونرفزة من اللى بيحصل بلا استثناء من اول ماطلعت على الطريق لحد مارجعت البيت وانا فى حرقة دم مستمرة تخيلوا بقى
المفضلات