هو أنا ينفع أركب جنوط وكاوتش 13 فى الماروتى ولا لأ
عرض للطباعة
هو أنا ينفع أركب جنوط وكاوتش 13 فى الماروتى ولا لأ
الموضوع الذي قُتل سؤالا ههههه
نصيحة بلاش و ديه هتكون نصيحة الجميع ليك
لأن لو كبرت لــ13 العفشة هتبوظ و خاصة في شوارعنا و العربية اخرها 12 ده غير انك ممكن تواجه مشاكل تانية
و طبعا شكلك بتفكر تجيب جنوط صيني او اي حاجة من الحاجات المجهولة اللي طالعة مع اول مطب جامد او فتحة هتنزل تلاقي الجنط ع الارض
فيه فكرة احسن لو باصص للشكل و اداء احسن
تجيب ع مقاس 12 كاوتش برده 12 بس اعرض و اعلي في الارتفاع بنسبة بسيطة
زيادة العرض هيزود الثبات معاك و زيادة الارتفاع هيديك شكل أحلي يقترب من الـ13
و اي استفسار اتفضل
بالتوفيق ان شاء الله
رأيي طبعا معروف في الموضوع ده ومش هقول زياده على اكسيل اي حاجه
جنط ال12 للماروتي هو الافضل ليها واي جنط اكبر هتركبله علايات وصدادات عشان الاحتكاك
طبعا آثاره عالعفشه انا مفتيش فيها لكن اكيد ليها اضرار باجماع الفنيين
تركيب علايات وصدادات له تأثير سلبي على الثبات
حاجه كمان مننساش نقولها
الجنط الاعرض بيزود معامل الاحتكاك وبالتالي عزم العربية بيقل
حاجات كتير لازم تتاخد في عين الاعتبار
تحياتي
مع احترامي لآراء الجميع
الكاوتش لو زاد عرضه في حدود المعقول وكان ضغط الهوا فيه مظبوط عمره ما يقلل عزم العربية
هو بيزود قوة الفرامل
اما بخصوص أثره عالعفشه فهو ممكن ميكونش ليه اثر وناس هتستغرب
حضراتكم احنا عندنا مشكلة اما بنركب جنط او كاوتش مقاس اكبر... اهم شئ في الموضوع هو القطر الاجمالي للعجلة... بمعنى المسافة بين مركز العجلة والأرض وده بيسوي نص قطر الجنط + بروفايل الكاوتش.... إذن أنا المفروض لو هاجيب جنط اكبر لازم اقلل بروفايل كاوتش العربية
طيب لو معملناش كده ايه النتيجة... هيكون نص قطر العجلة مختلف ده هيعمل ايه
اولا ارتفاع العربية هيختلف... وده هيأثر في مستوى مراكز الثقل والدفع وده بيؤدي لاختلال الثبات في الملفات الحادة مع السرعة
ثانيا زيادة القطر ده بيضعف عزم العربية... لأن الدراع بتاع المقاومة بيبقى اكبر وبالتالي هيعمل تحميل جامد عالمحاور والاكسات
ثالثا اما قطر العجله هيختلف ده هيخلي محيط العجلة يزيد وبالتالي ده هيخللي عداد السرعة يقرا غلط
لازم اي تعديل يراعى فيه القطر
شكراً للإفادة والإهتمام والله يا جماعة
كلام تمام
شكرا لحضرتك
انا مشفهمت نجيب ايه بقى ؟؟؟
ليه؟؟
لانى مشوارى يوميا على طريق سريع و يعمنى الثبات
بس الصراحة يهمنى اكتر موضوع الاضاءة
عاوز اضاة جامده جدااا بس نخلى الزينون اخر اختيار مع العلم انى مع اختيار الزينون بس لو حد يتفضل و قترح اى نوع لمض يكون مشكور جداا
موضوع الاضاءة ده ازمة شوية في الماروتي نظرا للفوانيس الصغيرة لكن الحل ياما زينون يا تشوف لمبات زي فيليبس رالي بس للأسف اللي موجود شوكة فشوف بديل ليها و طبعا مع الرجلاش هيظبط الاضاءة شوية معاك و ممكن تضيف كشافيين قدام في الاكصدام زي الشبورة و ان شاء الله هتشوف اضاءة مرعبة :)
اول حاجه منورنا هنا يا exact..
عايز اقولك كلامك سليم 100% نظريا فقط!!!
هتقولي ليه.؟؟
هقولك لان التغيير الاكسيبتد في التغيير في القطر الاجمالي للعجله انه ميزيدش عن 2.5 %
انا عايز اقولك اني مجرد غيرت الكاوتش بواحد اعرض 1 سم فقط وعلى نفس الجنط ومفيش اي حاجه تانيه اتغيرت
الاختلاف كان 2.75%
ده وانا كنت حريص اني مجيبش حاجه تعمل تغيير كبيرر عشان مواجهش مشاكل
فتخيل بقا معايا تغيير في القطر والعرض والبروفايل هيكون الرقم الخارج تغييره كام عن القطر الاساسي ؟؟
وللاسف بما اننا فمصر... فصعب اننا نتشرط
عشان تختار مقاس مناسب لابد من توافر الاختيارات كلها وده على ارض الواقع مش موجود
الخلاصه عشان مقولش كلام كتير
كلامك سليم 100% بس تطبيقه صعب جدا وعشان كده مبننصحش بالتغيير عن ال12
وبالمناسبه
حتما ولا بد لو زاد عرض العجله بيقل تسارع العربية نتيجة زيادة الاحتكاك
والحل الوحيد عشان تتجنب الموضوع ده هو اننا نقلل البوفايل فعلا وصباح الاحساس بالمطبات والنقر واهلا باحتكاك العربية في كل المطبات
تحياتي
معلش سؤال خارج بعيد عن سؤال صاحب الموضوع انا الكاوتش عندى كان مقاسه 13/65/170
وغيرت لمقاس 15/50/195 هل كده قطر العجلة ماختلفش كتير عن المقاس القديم وكمان فيه معلومة قريتها هنا فالمنتدى ان السرعة على العداد هتكون اقل من الواقع الفعلى ايه راى حضرتك وشكرا ليك واسف لصاحب الموضوع انى بسال فى حاجة تانية