الموضوع: تقرير صيانة 55 ألف كم للأوبترا "تغيير طقم سيور وشدادات"

الباشاوات الاوبتراوية
النهارده رحت اعمل صيانة الـ 55 ألف كيلو لسيارتى الاوبترا 2009 مانيوال فى مركز صيانة منصور الكيلو 4 ونصف العربيه كانت عامله 54700 كيلو متر ... طبعا كنت حاجز من قبلها بأسبوع تقريبا عشان اعرف اختار الوقت واليوم المناسبين وطلبت من موظف خدمىة العملاء انه يحجزلى ميعاد يكون مبكرا جدا عشان اكون فى الاول ومنتظرش فى طابور الاستقبال كتير ، الحمد لله وصلت هناك الساعى 8 الا ربع صباحا "يعنى قبل مواعيد العمل الرسمية فى منصور بربع ساعة " وأول مابدأ يظهر مهندسين الاستقبال كنت تقريبا تانى واحد يسلم العربيه عشان تدخل تعمل الصيانة . بلغت المهندس انى محتاج اعمل صيانة طقم سيور وشدادات بدون زيت "عشان كنت مغير زيت فالفولين قبلها بشهر" وطلبت كمان منه غسيل الموتور بالفوم وتنظيف فلتر التكييف ولما عرف منى ان دى أول مره يتنظف فيها فلتر التكييف راح قفلها فى وشى وقالى طالما دى أول مره يتنضف يبقى لازم يتغير وسعره عامل 200 جنيه ..... اضطريت انى اقوله ان مفيش داعى عشان بصراحه مكنتش عارف صيانة طقم سيور وشدادات هتتكلف كام وكنت خايف العمليه تعجز معايا وأصلا هو كان قايلى فى الأول ان صيانة سيور المحرك هتتكلف 3 آلاف جنيه .... العربيه دخلت الساعة 8 ونصف واستلمتها الساعه 12 ونصف تقريبا و تكلفه قطع الغيار والمصنعيات الإجماليه كانت كالتالى :
مصنعيات : 456 جنيه
قطع الغيار : 1089 جنيه
خامات وقطع غيار مخزن داخلى : 13 جنيه
ضريبة مبيعات 10 % : 155 جنيه
----------------------------------------
الصافى : 1713 جنيه

وتفصيلة المبالغ كانت كالتالــــى :
مصنعيات صيانة كل 5000 كم : 171 جنيه
مصنعيه تغيير طلمبة مياه : 190 جنيه
مصنعية اختبار وغسيل دورة التبريد : 76 جنيه
أويل سيل طلمبة مياه : 1.80 جنيه
طلمبة مياه : 190.91 جنيه
شداد سير تقسيمة : 227.27 جنيه
بلية كاتينه : 112.73 جنيه
سير كاتينة : 203.64 جنيه
شداد سير دينامو : 199 جنيه
سير محرك : 99 جنيه.
مبرد ردياتير (أحمر ) : 154 جنيه

بعد لما استلمت الايصال عشان اروح ادفع لاحظت انهم كاتبين الملحوظات دى على ورقة الأيصال :
1- السيارة تحتاج لتغيير طقم مساعدين أمامى وبطاحات وتؤجل حسب رغبة العميل!!!!!! مع أنى والله والله محدش كلمنى وانا فى المركز وخد رأيى فى موضوع تغيير المساعدين الأمامى ده وكمان والله العظيم والله العظيم العربية ماشيه معايا زى الفل وعمرى ما اشتكيت خالص من موضوع المساعدين ده ومبقتش فاهم هو فلوس بتترمى على الأرض وخلاص وطبعا فهمت انهم بيعملوا شغل عليا زى ما بيعملوا مع كل عملائهم لإنى لما سألت المهندس ايه لازمة انى أغير المساعدين والبطاحات مع انى مش بعانى من أى مشكله معاهم قالى ببساطه مفيش مشكله انك تأجل موضوع تغيير المساعدين ده 10 آلاف كيلو قدام "يعتى نصب عينى عينك " ... لما دخلت أسال فى مركز قطع الغيار عن اسعار المساعدين الأمامى والبطاحات كانت الأسعر كالتالى :

بطاحــات : 180جنيه x 2
طقم مساعدين أمامى : 590 جنية x 2

2- السيارة تحتاج كاوتشة مياه سفليه اوتوماتيكى "لا يوجد فى المخزن" !!!! طبعا مفهمتش ايه المقصود من الملحوظه دى فرجعت للمهندس وقالى الكاوتشة اللى بتوصل مياه التبريد من القربه للموتور فيها انتفاخ من ناحية الأفيز ولازم تتغير قولتله طيب مغيرتوهاش ليه قالى مش موجوده ولازم تدخل تحجز واحده عشان مينفعش تسكت عليها ولازم تيجى فى يوم تانى تعملها ... سألت على سعرها فى مركز قطع الغيار لقيته بـ 60 جنيه بس المشكله الكبيره انى عرفت من موظف قطع الغيار انى لما باجى اغير الكاوتشه دى لازم يفرغوا المياه اللى فى الموتور وبالتالى محتاج جركن مياه تبريد تانى بـ 154 جنيه والله اعلم هيقولولى الموضوع فيه مصنعيات ولا أيه ؟؟ عامة انا محضر نفسى انى هعملهم مشكله كبيره المره اللى هاجى اعمل فيها الكاوتشه دى لو حد طلب منى أى فلوس لانى بصراحه مش هدفع مصنعيات ولا هدفع فلوس لمياه التبريد هدفع بس ثمن الكاوتشه عشان انا مش ذنبى أن المخازن مفيهاش قطعة الغيار اللى العربيه محتاجاها وكمان الشغلانه دى كانت لازم تتعمل كلها على بعض مع تغيير طلمبة المياه ....

3- السيارة تحتاج الى تغيير اربع فرد كاوتش !!! طبعا قولت للمهندس اوك اوك ومش هغير الكاوتش دلوقت خالص على الأقل مش قبل 10 آلاف كيلو قدام إن شاء الله ..

ملحوظة : لاحظت بعد ان استلمت العربيه ووجدت قطع الغيار القديمه داخل العربيه محطوطه فى علب القطع الجديدة ان كل قطع الغيارالقديمة بلا استثناء حالتها كويسه جدا جدا .... يعنى مثلا سير الكاتينه والله مفيهوش شقوق ولا شكله مستهلك بالظبط كأنه لسه جديد !!!! كمان لقيت بكرة الكاتينة وشداد سير الكاتينة حالتهم سليمه 100 %!!!! مفيش بس غير سير المحرك هو اللى كان فيه تفاتيح بسيطه ... عامة انا لو كنت اعرف كده كنت أجلت الصيانة دى 5 أو 10 آلاف كيلو لقدام عشان فعلا منصور بيستهبل فى موضوع الصيانات وقطع الغيار ده بحس انهم عايزين يغيروا أى حاجه عمال على بطال وبدون أى داعى ومش هنسى انهم بلغونى ان الصيانه دى لازم تتعمل ضرورى من ساعة لما كانت العربية عامله 45 ألف كيلو بس ولو كنت سمعت كلامهم كان زمانى عامل الصيانه دى بدرى عن معادها 10 آلاف كيلو كاملين ....

وأخيرا أرجو ان أكون قدمت تجربه مفيده لأعضاء المنتدى زى ما انت كنت دائما مستفيد من تجارب الأعضاء الأخرين ...