بسم الله الرحمن الرحيم
السلام عليكم ورحمة الله وبركاته ...
بعد موضوع الي نزلتو الحادثة الي حصلت لمراتي على المحور ... لمن الحرامي كسر شباك العربية ومراتي وقفة في زحمة المحور وهيا سيقة عربيتها سلنسيه وخطف الشنطة وجري ...

http://www.nilemotors.net/Nile/280468-a.html

النهردة حصل حاجة عجيبة غريبة وغير متوقع ... في وحده كلمة مراتي النهردة ... وطلعت من البنك ... وقالت لها الووو دكتورة فلانه في حضرتك واحد جاب شنطتة عند باب البنك وقال أنو لقاها مرمية ولأن حضرتك عميلة عندنا بحثنا عن بياناتك وطلعنا رقم حضرتك وهنسيبلك الشنطة مع حارس البنك بره أسمو محمد تقدري حضرتك تيجي تستلميها ...


طبعاً أحنا مصدقناش في البداية معقول الكلام ده !!!!
وحتى فرع البنك أول مره نسمع أن في الحته دي في فرع للبنك
قلنا أكيد كمين وعاوز يثبت مننا العربية ... بالذات أن موقع البنك في حته محدوفة وهادية جداً وهو معاه كل ورق العربية مش ناقصو غير العربية ذات نفسها ...

المهم لبست وخدت حتت سلاح كده معايا أحتياط .
ورحت وفعلاً أتفاجئة أن الحرامي سايب الشنطة وواخد منها كل حاجة ... بس سايب فيها الكرنيهات بتاعت مراتي من نقابة وخلافو ، والبطاقة والاتي أيم والفيزا بتاعت البنك التاني ورخص العربية ورخصتها هيا كمان الشخصية .

بقيت مش قادر أصدق عنيا معقولة لسه في حرامية في البلد عندهم شرف وأخلاق لغايت دلوقتي ... معقولة في حرامية في البلد لسة عندهم ضميــــــــــــــــــــــ ــــــر ...
معقولة في حرامية لغاية دلوقتي ولاد بلد وولاد أصول .
معقولة في حرامي جينتل مـــــــــــــان لغايت دلوقتي ... بجد بجد عمـــــــــــــــــــــــ ـــار يامصـر ...

ونفسي أصـــــــــرخ بأعلى صوتي وأقولوا تســـــــــــلم أيدك ياحرامي ... أهو كده الحراميـــــــــة ولا بلاش .

وربنا يسامحو على 300 $ وال 200 جنية والاي فون وقزازة الريحة البرفان والمكياج بتاع مراتي والقزاز بتاع العربية الي أتسكر ووش مراتي الي أتشلفط .

الحقيقة كتر خيرو أنو وفر علينا اللف والدوران على مكاتب والمصالح الحكومية علشان نقعد نطلع كرنية كرنية بدل فاقد .
تحياتي لكل حرامي في البلد شــــــــــريف ونزيه .