الموضوع: هو مين اللى غلط انا ولا المجتمع

المشاركة الأصلية كتبت بواسطة midoabdeen

السلام عليكم ورحة الله وبركاتة

اولا كدة انا شاب 22 سنة
معلش هو الموضوع طويل شوية بس للاسف دا حال المجتمع اللى باقينا عايشين فية
انا بصراحة جالى تشتت ذهنى من حاجات كتير اوى من المجتمع اللى احنا عايشين فية
كل حاجة غلط بقت صح ل وكمان الناس كلها بتجرى عليها
وكل حاجة صح بق غلط والناس كلها بقت بتبعد عنها

من الحاجات الغلط وبق صح
1-البنات
هو انت مش مصاحب لية
هو انت عايش ازاى من غير مايكون فى واحدة فى حياتك
انت مش راجل علشان مش بتعرف بنات كتير
انا بصراحة بسمع الكلام دا من معظم زمايلى
ياسيدى انا مش عايز دا انا بحب ادخل الباب من الشباك زى مابيقولوا انا عجبانى حياتى كدة
انا مش عايز احب الا الانسانة اللى ربنا قسمهالى انها تكون زوجتى
تلاقيهم يقولوا اززززززززززاى ياعنى انت لازم تصاحب واحدة وتبدا قصة حب علشان تنتهى بالجواز
مع انى اصلا يوم ما افكر امشى مع واحدة حتى لو حبيتها عمرى ما افكر اتجوزها
ومن كتر الكلام دا ولهفة كل الشباب على البنات بصفة عامة الواحد افتكر انة هو اللى غلط هنا اللى صح

2- السجاير
انت راجل اة مش بتشرب سجاير تبقى مش راجل
ازاى انت راجل ومش بتشرب سجاير او اى مكيفات
ازى ياعنى انت لازم على الاقل تكون فى مرحلة السجاير دا اذا كنت محترم اوى ياعنى
انما المرحلة الجاية هى مرحلة ما بعد السجاير وهى انك تحشيها وهكذا

3- النفاق
انت غشيم
انت لسانك طويل
انت جلمف
ياعنى هو الواحد لازم يبقى منافق علشان يعجب
انا واحد من الناس مش بعرف ابقى ب 100 وش
اللى فى قلبى على لسانى بس بالذوق ومن غير مااجرح حد او ازعل حد منى
بس من الواضح كدة ان دى حاجة مش كويسة
الواحد لازم يكون منافق اوى علشان يعجب الناس
لا واية فى وشك حبيبك اووووى
ومن ظهرك بيسب ويلعن فى اللى جابوااااااا...........
واللى اكتشفتة باردوا ان النوع دا بيعجب الناس اوى اللى هو محافظ اوى على كلامة قدامك مش بيقولك كلمة تزعلك بس يتكلم فى ظهرك

4- المنظرة
هو الواحد لازم يصبغ شعرة زى البغبغان كل خصلة لون
ويفردة كمان او يبقى عامل زى الانفد
او يتباهى على خلق الله علشان يبقى هو الواد الفت اللى مافيش زية بقى
طيب مادام الواحد محافظ على مظهرة ومش مهمل فى نفسة ونظيف اية بقى لازمتة التباهى والتنطيط على خلق الله ياعنى

5- الاصراف او التبزير
هو الواحد لازم يصرف كل اللى معاة علشان يبقى كدة هو الواد النزية
على فكرة انا فى اوقات ببقى فيها كدة بس باردوا ببقى واخد بالى شوية من الفلوس
انما فى ناس تانية ولا بتفرق معاهم خالص كانهم مش تعبانين فى فلوسهم خالص
ياعنى خير الامور الوسط الواحد يصرف ويمتع نفسة بس باردوا فى حدود

انما بقى من الحاجات الصح اللى بقت غلط
1- الاحترام
لو بتحترم اللى قدامك ومش بتغلط فى حد
فا انت كدة عيل سيس وجبان
وكمان قلبك دعيف اوىاوى
انا افتكر مرة والله واحد جارنا اكبر من والدى فى السن بيسئلنى ابوك ال.... فين
كان بيشتم ابويا بس بهزار ياعنى فانا قلتلة انا ابويا مش كدة
قال لابويا وكانت ليلة ..... سودا كلت علقة
دلوقتى الناس الكبيرة هى اللى المفروض تحترم الصغيرين
2- الصراحة
انت عيل عبيط اوى
هو انا علشان مش بحب احور على اللى قدامى ابقى عبيط
لما اعمل شغل لواحد ولقولة اية مشكلة الشغل من قبل ماعملة ابقى عبيط
لما اعمل شغل واخد حسابى من غير مادبح الزبون ابقى عبيط
لما اقول اية عيوب السلعة ابقى عبيط
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟

ولله انا مش عارف صبر نفسى ولا انفجر باللى جوايا ولا اخلص من البلد دى واهج منها خالص

لك الله يامصر

يا ميدو ......
النبي عليه الصلاة والسلام اجاب على تساؤلك
قال ايه ؟؟؟؟
قال لا تكن إمعة ( او كما قال عليه الصلاة والسلام ).... اذا احسن الناس احسنت واذا اساءوا اسأت ... ولكن اذا احسن الناس احسنت واذا اساءوا لم تنجرف وراء اساءتهم ....بل وتحاول نصحهم كمان لأن ده واجب عليك
طبيعي ان الانسان ممكن يتأثر بمن حوله .... وجايز جدا تلاقي نفسك بتنساق وراء اساءة الشباب من حولك فتفعل كما يفعلون ... ممكن تصاحب بنات ... ممكن تتعاطى مخدرات ممكن تنجرف الي اسوأ من كدة والعياذ بالله
طب والحل
اولا انك تثق بنفسك اكتر من كدة ..... لازم تكون واثق تماما انك انت اللي صح وهما اللي غلط
ثانيا ان تحسن اختيار من تصادقهم او تزاملهم
المرء على دين خلياه فلينظر احدكم من يخالل
اختيار الاصدقاء شيء محوري ....
لو انت بدل ما تقعد مع الاشكال اللي بتقول عليها دي قعدت مع ناس تانية اكثر احتراما وثقافة وعلما وخلقا .... ممكن تكتشف انك فعلا غير طبيعي ... لكن لاسباب تانية
ممكن تقعد مع شاب 22 سنة تلاقية بدأ بزنس وبيدير 50 موظف وانت لسة مش عارف ح تشتغل ايه
ممكن تقعد مع شاب 22 سنة تلاقية بيحضر ماجستير وانت لسة مش عارف ح تدرس ولا مش ح تكمل
ممكن شاب 22 سنة تلاقية عارف 4 لغات وانت لسة الانجليش عندك عاوز يتظبط
ممكن شاب 22 سنة تلاقية حافظ القرءان كاملا 5 قراءات ومعاه اجازات فيهم وانت مش حافظ جزء عم
ممكن ..... وهنا ح تلاقي نفسك مش طبيعى بالمقارنة بيهم وممكن ناس زي كدة يكونو سبب ودافع في رفع مستواك في شتى المجالات
نظرتك لنفسك ح تكون مقارنة بمن حولك ...... وانت اللي تقدر تحدد من حولك حسب تحديد المكان اللي بتروحه والنشاط اللي بتمارسه
..
..
اما بقى حكاية ازاي انت راجل وماتعرفش بنات .... ده لا مؤاخذة منطق الحيوانات في الغابة .... كل ذكر بيحدد الاناث بتاعته بناء على قوته وسيطرته ....... اللي يقولك كدة يبقى لا يرقى انه يطلق علية لقب انسان ...... ده اساسا المفروض ما يستاهلش انك تكلمه ولا تبص في خلقته .... واحسن كمان تبعد عنه خوفا من العدوى