أعيش حياتى من غير جواز ولا أتجوز أى واحدة و خلاص؟؟!!

**amr.elsayed** · 14-04-2012 07:19 PM

هو اللى مكتوب فى اللينك انه مش حديث لرسولنا الكريم صل الله عليه وسلم

عايز اوضح حاجة انا متفق معاك فيها ان الاصل فى الاختيار هو التدين والاخلاق وبعديها يجى حاجات كتير تانية اقل اهمية
ومنها الجمال والقبول والحسب والمستوى الاجتماعى والمستوى الدراسى ووووو ... وعلى الرغم انها اشياء اقل اهمية الا انها لازم تتحط فى الحسبان
ودة جزء من اللينك اللى حضرتك تفضلت واشرت اليه بيثبت نفس الكلام

والمقصود أن المعيار الحق في الزوجة الصالحة وكذلك في الزوج الصالح هو (الدين المستقيم والخلق الحسن)، وما سوى ذلك من الأمور كالنسب والمال والجمال والمستوى الدراسي والاجتماعي ونحوها من الأمور التي قد يحرص عليها بعض الناس فلا مانع من رعايتها ولكن بشرط ألا تكون هي الأصل، فلو قدر وجود فتاة صاحبة دين ولكنها ليست صاحبة نسب وأخرى صاحبة نسب وليست بصاحبة دين فإن المؤمن يقطع بالزواج من صاحبة الدين، ولو كانت ليست بصاحبة نسب إذا لم يجد سبيلاً إلا بين هذه أو تلك، وكذلك المرأة الصالحة فلو تقدم إليها رجل نسيب شريف في قومه وكان ناقص الدين أو الخلق وتقدم إليها رجل صالح صاحب دين وخلق ولكنه دونه في النسب ولم تجد سبيلاً إلا بينهما فإن المؤمنة تقطع باختيار صاحب الدين، وهذا أمر ينبغي التوسط فيه، فليس هو بالمعيار الذي يقيم به الإنسان! وفي نفس الوقت ليس بالمهدر الذي لا اعتبار له، بل هو معتبر ولكن بحسب المقدور عليه وبحسب ما اعتاد عليه الناس من هذا الشأن، فبهذا يحصل التوسط المقصود، ولذلك كان أصح أقوال أهل العلم - عليهم جميعًا رحمة الله تعالى – .

أن الكفاءة في الزواج إنما هي سلامة الدين والسلامة من العيوب القادحة من جنس الأمراض التي أشرنا لبعضها، فخير ما يكون للإنسان في هذه الحالة هو السعي في طاعة الله وذلك بالظفر بوصية النبي - صلى الله عليه وسلم - : (تنكح المرأة لأربع: لمالها ولجمالها ولحسبها ولدينها، فاظفر بذات الدين تربت يداك) متفق على صحته. وخرج مسلم في صحيحه عن النبي صلى الله عليه وسلم أنه قال: (الدنيا متاع وخير متاعها المرأة الصالحة). وخرج ابن ماجة عن النبي - صلى الله عليه وسلم – أنه قال: (ما استفاد المرء بعد تقوى الله خيرًا من امرأة صالحة إذا نظر إليه سرته، وإذا أمرها أطاعته وإذا أقسم عليها أبرته وإذا غاب عنها حفظته في نفسها وماله).
ونسأل اللهَ عز وجل أن يشرح صدوركم وأن ييسر أموركم وأن يجعلكم من عباد الله الصالحين وأن يوفقكم لما يحب ويرضى.

عايزين بس نرتب افكارنا علشان ما نختزلش الزواج فى فئة معينة من البنات فى زمن ربنا العالم باحوالنا خاصتا فى جزئية التدين
ويا ريت حضرتك ترد على اسألتنا .. التدين دة شكله ايه ؟ بتصلى مثلا ؟؟ بتصوم ؟؟؟ منقبة ؟؟؟ بتتكلم بقال الله وقال الرسول ؟؟؟
....................
بجد انا بدأت اشفق على الشباب اللى عاوز يتجوز ... المجتمع ممشى البنات فى الشارع كلها لابسة باديهات وبانطلونات محزقة وملزقة
ويطلب من الشاب انه يتجوز المتدينة ... ايوة المتدينة دى نعرفها ازاى ؟؟؟؟ اى واحدة منقبة مثلا ؟؟؟ بيكونوا موجودين فييين دوول ؟؟؟ .. وسالتك ايه رايك فى اللى بيمثلوا التدين علشان يتجوزو وفى اول موقف تلاقيها تحولت ؟؟؟
..................
طالما عايزين توجهوا الشباب للجهة الصحيحة يبقى تكلمونا على المجتمع اللى احنا عايشين فيه
اومال الشباب اللى بيتكلموا عن الروسيات وبيتمنوا يتجوزوا منهم دول .. ليه بيقولوا كدة ؟
علشان بيلاقوا بناتهم تدين وجمال وتقديس للحياة الزوجية ... هم متربين على كدة
يا استاذ ميزو .. احنا فى زمن البنت بتبقى محجبة و الواد ماشى جنبها ماسكها من وسطها فى نص الشارع
يبقى المجتمع بيعمل ضغط على الشاب ويقولوا اتجوز المتدينة وهو مش عارف اصلا المتدينة دى يعرفها ازاى
اصلها مش بالمظاهر ولا بالحجاب ولا بالنقاب ... احنا لا نملك الا اننا ندعو الله بان يرزقنا بالزوجة الصالحة وهو واحده القادر على قبول الدعاء

**mezo73** · 14-04-2012 09:34 PM

المشاركة الأصلية كتبت بواسطة amr.elsayed

عايزين بس نرتب افكارنا علشان ما نختزلش الزواج فى فئة معينة من البنات فى زمن ربنا العالم باحوالنا خاصتا فى جزئية التدين
ويا ريت حضرتك ترد على اسألتنا .. التدين دة شكله ايه ؟ بتصلى مثلا ؟؟ بتصوم ؟؟؟ منقبة ؟؟؟ بتتكلم بقال الله وقال الرسول ؟؟؟
....................
بجد انا بدأت اشفق على الشباب اللى عاوز يتجوز ... المجتمع ممشى البنات فى الشارع كلها لابسة باديهات وبانطلونات محزقة وملزقة
ويطلب من الشاب انه يتجوز المتدينة ... ايوة المتدينة دى نعرفها ازاى ؟؟؟؟ اى واحدة منقبة مثلا ؟؟؟ بيكونوا موجودين فييين دوول ؟؟؟ .. وسالتك ايه رايك فى اللى بيمثلوا التدين علشان يتجوزو وفى اول موقف تلاقيها تحولت ؟؟؟
..................
طالما عايزين توجهوا الشباب للجهة الصحيحة يبقى تكلمونا على المجتمع اللى احنا عايشين فيه
اومال الشباب اللى بيتكلموا عن الروسيات وبيتمنوا يتجوزوا منهم دول .. ليه بيقولوا كدة ؟
علشان بيلاقوا بناتهم تدين وجمال وتقديس للحياة الزوجية ... هم متربين على كدة
يا استاذ ميزو .. احنا فى زمن البنت بتبقى محجبة و الواد ماشى جنبها ماسكها من وسطها فى نص الشارع
يبقى المجتمع بيعمل ضغط على الشاب ويقولوا اتجوز المتدينة وهو مش عارف اصلا المتدينة دى يعرفها ازاى
اصلها مش بالمظاهر ولا بالحجاب ولا بالنقاب ... احنا لا نملك الا اننا ندعو الله بان يرزقنا بالزوجة الصالحة وهو واحده القادر على قبول الدعاء

يا عمرو ياحبيبي الله يباركلك انا خلاص هاموت من الضحك من الردود اللي قريتها
انا من ساعة كتبت رد طويل ولكن للاسف دوست علي اعتماد المشاركة الموضوع راح
وعلي فكرة انا مزعلتش خالص من كلامك لان انا شاعر جدا بمخاوفك من المستقبل والاختيار
وبما اننا في منتدي للسيارات فكل التعليقات عبارة عن تشبية بالعربيات فأكيد مفيش واحد هايتجوز وبعد شوية يروح لحماة ويقولة اصل جربتها ومعجبتنيش ومش مشكلة خد الشرط الجزائي
انا متفق في كثير مما ذكرت
احنا من البداية عندنا مشكلة اخلاق ولازم كلنا نعترف بكدة
التدين مش لبس النقاب ولا اللي مش مدينة بتكون مش محجبة
بمعني انة لايوجد شيئ مطلق مش كل الناس كويسة ومش كل الناس وحشة
ممكن يكون اهلي كويسين واخواتي كويسين وانا اكون مش كويس
موضوع التمثيل انا متأكد انة موجود بس اكيد لو انت صادق مع نفسك في الاول وصادق مع الغير اكيد ربنا هايوفقك للناس اللي زيك
انا غير متفق في موضوع الروسيات دة اطلاقا او الاجانب بشكل عام
وانا ماكنتش اقصد ان المتدينة هاتكون وحشة مطلقا بس انا كنت بأشير للاولويات
وانا اؤكد لك ان في بنات كتير كويسين وبيخرجوش من بيوتهم غير علشان الشغل او الكلية او لشراء الاحتياجات
دائما السلع الرخيصةهاتلقيها علي الرصيف بتتباع انما السلع الغالية موجودة في اماكن معروفة في البيت
بص حوليك شوف مين من اصحابك كويس بجد هاتلاقي اختة كويسة او اخت مراتة كويسة او بنات في العيلة عندكوا مثلا
نصيحة اولا كن صادق مع نفسك في البداية وصادق مع الله ربنا اكيد هايكرمك
يعني كنت راجع من اسكندرية ولقيت واحد راكن في الظلام وقفت لة ونزلت اسءلة عاوز حاجة لقيتة مرتبك وواحد ابن حلال مركبلة مسمار في الفردة مقاس مختلف ومفتاح العجل اللي معاة مفيهوش المقاس دة وعملتهالوا انا مش عارف لية انا وقفتلوا لان بكل المقاييس ماحدش بيقف لحد دلوقتي بس اكيد هو كويس فربنا بعتني لية
ثانيا كلنا نعرف الفرق بين الرث والثمين واين يوجد كل منهما
لان الزوجة كا الارض وانت كا البذرة فأذا وضعت بذرة جيدة في ارض بور لن تنبت واذا كانت الارض جيدة سوف تنبت شجرة مثمرة
ثالثا بعد مرور الاعوام علي الزواج نظرتك هاتختلف تماما ليس كل شئ الجمال وانما الاخلاق الحميدة والعشرة الطيبة والزوجة المطيعة الغير متسلطة التي تعينك في السراء والضراء
رابعا فالننظر جميعا الي امهاتنا ليسوا الاجمل علي الاطلاق ولكننا نحبهم ونجلهم ليس لجمالهن ولكن لحسن تربيتها لنا وما اكتسبت من متاعب حتي صرت رجلا
اللهم ارحم ابواي كما ربياني صغيرا
خامسا المتدينة ستجدها وقورة لديها حياء لاتمشي تتلفت وتنظر الي الرجال تلبس الحجاب عن اقتناع وليس لتاري عيب في شعرها او ان ابوها فرض عليها الحجاب ستجدها تصلي دونما يقول لها احد صلي
سادسا عندما تذهب الي اي بيت لرؤية عروسة انظر الي الاب وكيف تعاملة الزوجة فاذا كانت الام مطيعة لزوجها فاعلم ان البنت ستكون علي شاكلة امها
سابعا ودي حاجة غلسة جدا عاملة زي موضوع انك تاخد البندق وتقولها اكسريلي واحدة علشان تشوف اسنانها كويسة ولا مركبة طقم هههه
يجب ان تجعل هناك مقابلة بين العروسة واختك مثلا او والدتك لتراها بدون حجاب لان زي ماقولتلك في مشاكل ممكن واحد عندها مشكلة ومش باينة من الحجاب
كما ارجو ان تطلب دخول الحمام فاذا وجدتة نظيف فاعلم انة سيكون بيتك مثلة

واخيرا ادعوا الله لك ان يوفقك ويرزقك الزوجة الصالحة انت وكل من لم يتزوج بهذا المنتدي واللي اتجوز هاقولة اوعي تتجنن وتعملها تاني

**micromoud** · 14-04-2012 09:53 PM

الاستاذ ميزو
مش عارف ليه الناس بتركز أوى مع الحمام ده وكأنك اختزلت اهتمام البنت بحمام البيت !!

وبفرض ان دى وجهة نظر صحيحة طبيعى جدا لما تكون رايح تزور ناس بينضفوا البيت مخصوص ليك وخصوصا الحمام عشان العادات والتقاليد... وبعد لما بتمشى من عندهم كل شىء بيرجع لوضعه الطبيعى يبقى ايه لازمة العاده دى :))؟؟

**mezo73** · 14-04-2012 10:25 PM

المشاركة الأصلية كتبت بواسطة micromoud

الاستاذ ميزو
مش عارف ليه الناس بتركز أوى مع الحمام ده وكأنك اختزلت اهتمام البنت بحمام البيت !!

وبفرض ان دى وجهة نظر صحيحة طبيعى جدا لما تكون رايح تزور ناس بينضفوا البيت مخصوص ليك وخصوصا الحمام عشان العادات والتقاليد... وبعد لما بتمشى من عندهم كل شىء بيرجع لوضعه الطبيعى يبقى ايه لازمة العاده دى :))؟؟

هومش اختزال ولا حاجة بس في بعض الحجات ليها دلالة معينة والله مش دايما بيحصل زي ما انت بتقول
في ناس بتنظف المكان اللي هايقعد فية الضيوف وجوة تلاقي خرابة
ومش دايما هايكون كل كلامي صح اكيد ممكن وجهة نظري تكون صح مرة وعشرة غلط بس مافيش شيء قياسي