النترا md و فيلوستر و لوحات المرور و أنتخابات الرئاسة
الاخوة الكرام / نجوم هيونداي
أسعد الله مسائكم بكل الخير ...
النهاردة جايب لكم حكاية خفيفة من حكاوي السفر بتاعتي
اليوم كنت عائد من مدينة الاسماعيلية بعد زيارة عمل سريعة هناك
الجو كان حار و مشغل التكييف و معايا أحد الزملاء الأعزاء و كنا بنتناقش في أمور البلد و حالها المايل لذا كنت ماشي في حالي و بسرعة لا تزيد عن ال 110 كم/ساعة و أيضا لكي ألتزم بالسرعة الاقتصادية اللي حققت لي النهاردة معدل أستهلاك 6.4 لتر/ 100 كم
المهم ...
بعد أن تخطينا بوابة الأسماعيلية / القاهرة بقليل و أذا بهيونداي فيلوستر تنطلق من علي يميني زي الصاروخ و بعد شوية أنتقل للحارة اللي أنا فيها و أصبح أمامي بمسافة لاتزيد عن 100 متر و أثناء تخطيه لسيارة نقل كانت علي يمينه و فجأة شاهدت نص فردة كاوتش نقل جاية من تحت الفيلوستر و بتطير علي سيارتي العزيزة
طبعا سرعتي كانت تسمح بالمناورة و الطريق في اليمين و الخلف فاضي فقررت أن أنفذ مناورة سريعة بالعربية الألنترا (اللي بيتقال عليها مش ثابتة) و قولت ربنا يستر
- رفعت رجلي من علي البنزين و نقلتها لدواسة الفرامل من غير ما أضغط تحسبا لأي موقف طارئ
- لفيت الطارة يمين لمفاداة نص فردة الكاوتش
- و بعد كده رجعت لحارتي الشمال تاني
العملية كلها ثواني و الحمد لله استجابة العربية كانت سريعة و ممتازة و للمرة الثانية لم أشعر بأي تأثير سلبي لنظام التعليق الخلفي torsion beam اللي عامل قلق و فزع
نيجي بقي للفيلوستر ..
- سرعته نزلت و بدأت المسافة بيني و بينه تقرب
- اللوحة الخلفية أتكسر منها مسمار و أصبحت معلقة علي مسمار واحد و تكاد أنها تسقط علي الارض
فكرت أني أحصله و اشاور له عليها بدل ماتقع و تضييع منه لكن كل ما أقرب منه هو يشد و يجري بدأت ارعش له بالنور العالي ألاقيه بيشد أكثر و صلت لسرعة 140 كم/ ساعة و المسافة بدأت تزيد (أفتكرني عايز اشد معاه - ههههههههههههه) مع أني مش في دماغي
المهم قولت أكثر من كده مش هأزود و بدأت أهدي سرعتي تاني و قولت لصاحبي لو اللوحة وقعت منه هنأخدها و نبقي نسلمها أو نسأل علي صاحبها في المرور و نتصل بيه
و كملنا رحلتنا علي سرعتنا (90 - 110) كم/ ساعة و بدأنا نستكمل حديثنا عن أنتخابات الرياسة و ابو سماعيل و أبو الفتوح و سلامونتي اللي يارب مايكسب
معلش طولت عليكوا .... لأقعدوا بالعافية