نبدأ بيوم تسليم العربيه في التوكيل
شركة التأمين بتطلب الحصول على اسم المهندس المستلم ورقم تليفونه وابلاغه لهم للتنسيق والمتابعه من خلاله
المهندس اللي استلم العربيه تقريبا كان فيه حاجه مضايقاه في اليوم ده وكان متضرر شويه
واعطانا رقم للمتابعه مفيش حد بيرد عليه او بيخلي حد تاني يرد ويقول ان ده رقم خاص بشخص آخر
وده عرفته تاني يوم لما حاولت اعرف تمت المعاينه ولا لسه من خلاله ومقدرتش اوصل للمعلومه دي بعد كده غير من خلال شركة التأمين
وعرفت تفاصيل المقايسه من خلالهم
المفاجأه بعد كده كانت في اتصال التوكيل بنا وطلب دفع المستحقات 4500 جنيه واستلام العربيه يوم الإثنين
وطبعا كلمة السر في انها تخلص بسرعه كده هي المهندس خالد فاروق جزيل الشكر له
ودي كانت اول ايجابيه في الموضوع
المفروض شركة التأمين هيا اللي بتستلم الأول وبعد كده بتبلغني استلم بعد المعاينه
كلمت شركة التأمين وبلغتهم ان العربيه خلصت طلبوا مني اطلب من التوكيل يبعتلهم فاكس بالقيمه المطلوبه لمراجعتها واستلام العربيه
وانهم هيبعتوا مندوب للمعاينه اول ما يتأكدوا ان العربيه خلصت
طيب هتتأكدوا ازاي ...... بعد ما نتصل بالمهندس المسئول ويرد علينا
تابعينا بكره في نفس الميعاد علشان تعرفي كمان بعتوا الفاتوره ولا لسه
رجعت طلبت من المهندس اللي بلغنا بالإنتهاء من العربيه يبعت الفاتوره على الشركه
تاني يوم اتصلت مفيش حاجه اتبعتت لغاية دلوقتي ومش عارفين يتأكدوا ان العربيه خلصت في التوكيل لأن المهندس مش بيرد على الرقم خالص
رجع التوكيل اتصل تاني يوم تعالوا ادفعوا الفاتوره واستلموا العربيه احنا اجازه الأربعاء والخميس
يا فندم لازم شركة التأمين تستلم الأول ولازم تبعتوا الفاتوره للشركه
اتصلت بالتأمين بلغتهم تاني واكدوا انهم مش عارفين يوصلوا لمهندس المتابعه
بعد كده اديتلهم الارقام اللي المهندس الأخير كلمنا من خلالها للإستلام
وتم التواصل اخيراً بينهم الحمد لله
شركة التأمين خلصت اجرائتها فورا وبلغتنا بارسال فاكس للتوكيل بتسليمنا العربيه ودي كانت تاني ايجابيه في الموضوع
اتأجل الإستلام ليوم السبت علشان الفرع اجازه الأربعاء والخميس حسب كلام المهندس
وعرفت بعد كده ان الخميس مش اجازه ولا حاجه :khd:
المره دي المهندس كان بشوش وودود جدا وجاب العربيه علشان نستلمها
وكانت متربه على الآخر من الركنه في الشارع
تم تغيير الإكصدام والصدر والفانوس ورش الرفرف والإكصدام
وكان في شوية ملاحظات
الفانوس بارز عن مكانه من جهة الخارج ناحية الإكصدام (التقفيل سيء بصراحه)
وفيه بقعة دهان اماميه على الإكصدام ولوحة ارقام المرور منبعجه من الفك
وباب السواق بيصدر صوت عند الغلق والفتح
فيما عدا ذلك كله تماااام :))))
كان عندي قلق ان لون الدهان ممكن يفرق علشان موديل العربيه 2010
لكن طلع مطابق للون الحمد لله
الرفرف والكبوت اتعدلوا مكانهم وكله تمام
حواف الرفرف مش واخده لون :(
تم علاج صوت الباب وبقعة الدهان في الإكصدام والمهندس ابلغنا بصعوبة تركيب الفانوس مثل الأول
واستلمنا على كده وخلاص
بعد ما مشينا اكتشفت ان كرسي السواق كمان بيصدر صوت :grrrr:
بعتذر على الإطاله وأي استفسار انا تحت امركم