النهارده عملت حادثه بالعربيه وخبطت عربيه راكنه وانا خارجه من الجراج
ومحتاجه اعرف سعر فانوس سيراتو امامي واكصدام امامي والكارتيره لموديل 2011
ولو ممكن تليفونات الجندي .... وشكرا
النهارده عملت حادثه بالعربيه وخبطت عربيه راكنه وانا خارجه من الجراج
ومحتاجه اعرف سعر فانوس سيراتو امامي واكصدام امامي والكارتيره لموديل 2011
ولو ممكن تليفونات الجندي .... وشكرا
والرفرف شمال
وهل ممكن يتعدل في التوكيل ولا هناك لازم يغيروه بواحد جديد
لا الرفرف يتعدل مش يتغير
وان شاء الله تكون بسيطة
قدر الله وما شاء فعل
الف شكر لمرورك
الحمد لله على كل شيء الموضوع كله حصل في ثواني مش عارفه ازاي والله لغاية دلوقتي والخطأ كله عندي بدون قصد
الخسائر في عربيتي والعربيه التانيه واحده تقريبا نسخه بالكربون ويمكن الرفرف عنده اتضر اكتر ويحتاج يتقص او يتغير لأنه ضاغط على الكاوتش الأمامي شمال
قدر الله وما شاء فعل
سعر الفانوس العادى ب 675 الاصلى
والرفرف حسبب الحالة ممكن يتعدل و ممكن لا حسب الخبطة
والاكصدام والكرتيرة يعملوا بتاع 600 من غير رش الاكصدام طبعا والرش يتكلف 200
يعنى الموضوع تقريبا يدخل فى 1800 2000 (مع تغير الرفرف)
الاسعار ديه خارج التوكيل
قدر الله وماشاء فعل انا كنت مغيرالاكصدام عند تكنوا وان وجابوة من التوكيل وترش كان بحوالى 1150 كامل مش فاضى ماعدا الفوج طبعا وسمكرة الرفرف والدهان بالقطعه وحوالى 200 جنية للقطعة والرش حسب نوع الدهان مصرى ولا المانى ورينا يكفيكى شر الحوادث
الف شكر لحضرتك
مالك السيراتو قرر يصلح في التوكيل وبعدين يحاسبنا على التكلفه وده حقه طبعا
سألنا في موزع معتمد لكيا في فيصل سعر الفانوس 750
والإكصدام 800 والكرتيره 200
شكرا جزيلا ..... ربنا يكفينا ويكفيكم شر الحوادث
قدر الله وما شاء فعل والحمد لله انها جت فى الحديد
فعلا زى ما قال محمد التوكيل هيبقى غالى جدا بالمنظر ده القصة هتعدى ال 5000ج بالضريبة
هو مش مأمن على العربية ؟
دي اسعار موزع معتمد لكيا في فيصل هو كان طلب نشتريله قطع الغيار من عنده قبل ما يغير رأيه
واولاده يقنعوه يصلح في التوكيل
شكرا أ. ابو ليلي
الحمد لله على كل شيء
هو مش مأمن على العربيه وكان هيصلحها بره وطلب نشتريله قطع الغيار وبعد كده تراجع
وقرر يصلح في التوكيل وبعد ما سألنا على اسعار قطع الغيار بدون الرفرف حاولنا نديله 2000 جنيه تحت الحساب رفض وقال بعد ما يخلص تصليح
انا مش قادره ألومه وشيء محرج جدا اننا نقوله صلح هنا او هنا
ربنا يعمل اللي فيه الخير
هو فعلا موقف صعب وصاحب العربية ملوش اى ذنب ( الموضوع هياخد حوالى شهر تصليح فى الوكيل ) ولكن على الاقل لاازم حضور اى شخص من طرفك وقت عمل المقايسة
والحمد لله على كل شى .
يا خبر ابيض .... شهر ليه شهر ؟
على كده عربيتي هتاخد هيا كمان شهر تصليح علشان تغيير اكصدام وفانوس
وبالنسبه لصاحب العربيه هو طلب من اخويا يحضر التصليح لما كان هيصلحها بره الوكيل
لكن بعد ما غير رأيه رفض اي مساعده وفي الغالب هيجيب الفواتير بعد ما يصلح
---------------------------------------------------------------
دلوقتي يا جماعه انا هصلح عربيتي في ابو رواش علشان التأمين
هل في اي مستندات مطلوبه اخدها معايا
كونتكت مش بتطلب محضر لكن لما اتصلت بفرع ابو رواش في الأمن قالولي لازم اعمل محضر واجيب صورته حسيت انه مش متأكد اتصلت برقم تاني قالي مش شرط محضر
والمقايسه بتم في نفس اليوم ولا لأ
وبعد ما مندوب التأمين يعمل المعاينه هناك اعمل ايه ؟؟
لازم صورة من المحضر مختومة صورة من رخصة القيادة المثبتة فى المحضر و صورة رخصة العربية وصورة وثيقة التامين او الوثيقة ان امكن
المهندس لو موجود بيعمل المعاينة مش موجود بيجى تانى يوم
بعد لما يوافق على التصليح مهندس التوكيل وبيعمل المعينة المبدئية والتكلفة المبدئية شرط لاتزيد التكلفئة النهاية عن 10% من التكلفئة المبدئية بس والتوكيل تانى يوم بيكلمك المهندس يقولك تخلص امتى وطبعا هتخلص بعد لما يقول ب 3 ايام زيداة على الاقل
انا ما عملتش محضر شركة كونتكت مش بتطلب محضر غير في حالة الهلاك الكلي
معلشي انا مش فاهمه الجزئيه دي
يعني الوكيل مش هيدخل العربيه غير لما اعمل محضر حتى لو شركة التأمين مش طالبه محضر ؟؟
وايه معنى شرط الاتزيد التكلفه النهائيه عن 10% من التكلفه المبدئيه
ازاي هتنزل ل 10% من التكلفه المبدئيه؟
محمد مش لاازم محضر فى شركات تقول لو التكلفة ( اقل من 10 الاف ج ) مش لاازم
على حسب التكلفة واعتقد تكلفة تصليح عربيتها مش هيعدى المبلغ ده
بس لاازم اخطار للشركة .
سارة الوكيل ملوش دعوة بالمحضر انتى داخلة تعملى عربيتك وهتدفعى تكلفتها من معاكى وبعدين تحسبى شركة التامين .
نظام التوكيل كده فى التصليح الاقدام الاول علشان كده بياخد فترة
ما انا عملت اخطار بالميل والتليفون لكن مفيش صوره ليه
الشركه اعطتني رقم اتابع بيه الإخطار وابلغهم ان العربيه راحت الوكيل علشان يبعتوا المندوب للمعاينه هناك هل ده كافي هناك
والشركه بتدفع بعد ما كيا تبعتلهم الفواتير وانا بدفع في الوكيل النسبه المطلوبه مني وبعد كده بستلم
لكن مش عارفه الإجراءاتخلال الوقت ده هتم ازاي
يعني متوقع انها تاخد وقت شهر فعلاً ؟
وبدون حجز مش كده
عمتنا شركات التامين بتتلكك
موضع 10% انت ملكيش دعوة بيه معناه مثلا مهندس التوكيل قال التكلفة المبدئية 10 تلاف مينعشى التوكيل يطلع الفاتورة النهائة اكتر من 11 الف ده فى حالة لو التامين هو الى هيدفع طبعا (موضوع خاص بالتامين )
التوكيل هيدخل العربية عادى بس مش هيشتغل الا لما مهندس التامين يوافق
حسب الاتفاق مع المهندس يعنى لو انت الى هتدفع وتحاسبى التامين هيشتغل على طول
انا واحد صحبى تامين غبور انا حضرت الاتفاق او لما عمل الوثيقة مهندس التامين قال
احنا بناخذ 0.5% زيادة مقابل ان التكلفة تكون 0 و لقدر الله حصل حاجة بتسلم العربية وتتصلح ومبتدفعشى مليم ولا بنعوز محضر اقل من 10 الاف ووووووو ...... الخ
الكلام كان حلو فى الاتفاق
العربية اتخبطت روحت معاه ننفذ الكلام المتفق عليه روحنا قليوب اقرب
اول حاجة فين المحضر قلنا الوضع كدا لا لا مفيش الكلام ده طيب فين الوثيقة مفيش وثيقة قال روح هات صورة من ابورواش روحنا وكانت المفجاة الكبرى وثيقة تامين عادية تبع مصر للتامين رجعنا تانى قليوب قالى احنا كلمنه مصر للتامين وهيبعته المهندس بكره الساعة 10 انا سالته وانت اش عرفك ان العربية تبع مصر للتامين قال دخلت على الكمبيوتر وشوفت قلت طيب ليه بعتنا ابو رواش قال اجراءت
روحنا تانى يوم للمهندس التامين ومهندس التوكيل قال العربية هتتكلف 8000 ج قلنا كويس مفيش محضر مهندس التامين قال فين المحضر قلت العربية اقل من 10 تلاف لا لا لازم روحت اعمل محضر فى القسم قال فين الطرف التالت والتانى اقلت اهلا وسهلا و تاريخ المحضر هيكون بعد التسليم ....
طبعا كلمت واحد صحبى ظابط قالى روح قسم ... للامين كذا .... وكلمنى على اتلفيون وهكلمه ولازم يشرب شاى ..مش مشكلة ..روحنا كلمناه قال عايز تكتب ايه فى المحضر
عمل المحضر وجاب الطرف التانى والتالت نمر وهمية وختم الصورة وقطع الاصل وطبعا شرب الشاى بس كتر خيره
بعد كدا و هو رايح يستلم العربية المهندس قال فى نسبة تحمل 5% ومصاريف ادارية
....
قدر الله وما شاء فعل يا سارة
والحمد لله على كل شىْ المهم سلامتك انتى وسلامة اى شخص تانى
محمد كلامك ده معناه ان شركة التامين متعاقدة مع غبور وهما شركة واحده اصلا
علشان كده لاازم يسال عن وثيقة التامين والمحضر ويطلع اى كلاكيع وخلاص
( زى الموضوع اللى موجود فى القسم هنا )
وطبعا زميلك غلطان انه دفع النسبة دى طالما مش مكتوبة فى الوثيقة
انما شركة كونتكت مش متعاقدة مع كيا وهنا الاختلاف
غبور ضحك معانه بلاش علينه
المهندس قال ده تامين غبور احنا منعرفشى مصر للتامين الا يوم الحادث بس
احنا دفعنا واخذنا وصل وكرت vip مكتوب فيه تامين شامل من تاريخ كذ الى كذ بس
لا شوفنا وثيقة ولا غيرها انا سالته على الوثقة قال احنا بنحتفظ بيها علشان لقدر الله حصل حاجة ننفذ على طول وانت بتجى بالرخصة بس
ربنا يسهل ويكون موجود في اليوم ده
الف شكر انا حبيت اتأكد قبل ما اروح
الموظفين هناك كل واحد برأي
ميرسي يا نيفو على ذوقك انا متضايقه والله جدا من اللي حصل والحمد لله على كل شيء
كل ده و انت خارج من الجراش!!
الفنوس اظن كان الصيني ب350 و الاكصدام ب600 دا الجديد بس يفضل انك تاخد اكصدام بلون العربيه من نص عربيه نفس اللون جايه استيراد
الحمد لله علي سلامتك و الحمد لله انها جت علي اد كدا
الحمد لله على سلامتك
تقريبا شركات التامين ممكن تغطى الحادثة بتاعت الطرف التانى ممكن تساليهم على الموضوع ده اهو توفرى شوية فى التصليح
و فى النهاية كله قدر ربنا والحمد لله على انها جات على كده
ماتضايقيش نفسك خالص يا سارة و الحمد لله على كل شىء قضا اخف من قضا
و الحمد لله ان الخساير مادية فقط و اللي يجي في الشيش بقشيش زي ما بيقولوا و اهم حاجة سلامتك
الحمد لله على كل شيء
بإذن الله هصلحها في التوكيل علشان التأمين
الحمد لله انها جت على قد كده
انا سألت في كونتكت التأمين مش بيغطي الحادثه بتاعة الطرف التاني
الله يسلمك يا دونزي الحمد لله على كل شيء
انا مش متضايقه والله من الخسائر الماديه انا متضايقه من الخطأ اللي حصل مني وبحمد ربنا تماما ان مفيش حد كان واقف مكان العربيه كان اتصاب لا قدر الله
ومتضايقه جدا علشان العربيه الأخرى اللي خبطها وصاحبها مالوش اي ذنب
وبالعكس انا اتمنى يصلحها بالطريقه اللي تناسبه حتى لو كلفت اكتر علشان يكون راضي ويسامحني وما اتحملش ذنبه
اللي حصل ان من فتره نزلت العربيه في جراج منزله حاد جدا علشان في اكتر من عربيه اتسرقت في المكان اللي كنت بركن فيه
وكنت بطلع من الجراج عادي بسهوله والمنزل هو اللي كان بيتعبني شويه في النزول
قبل ما بطلع كنت بجيب الأول علشان العزم واحاول اقف على آخر المطلع علشان اشوف العربيات اللي جايه في الشارع وانقل على الd وادخل شمال بعد كده
في اليوم ده وانا في آخر المطلع قبل ما اقف ماما قالتلي ادخلي يمين ادخلي يمين احسن ونفذت بالحرف الواحد بدون اي تفكير
لفيت الدريكسيون يمين والعربيه لسه واخده عزم الأول واندفاع المطلع وبوووووووووووووم طااااااخ دششش .... مش فاكره ايه اللي حصل ولا متأكده كله في ثواني
كل اللي فاكراه اني كنت بحاول اوقف اندفاعها بدون اي فايده نجحت بس اني اوقفها قبل ما تخبط في صف العربيات اللي على الناحيه التانيه في اليمين
والحمد لله قدر الله وما شاء فعل
ياستي تعيشي وتخبطي الحمد لله أنك سليمة وأن الراجل كمان سليم هو مش طلع سليم بردوا ولا أيه:36_7_4[1]: ؟؟؟
قدر الله وماشاء فعل بدل ما تستغربي من الموقف قولي الحمد لله .
طيب ياريت الناس كلها عندها ضمير و محترمين زيك
دا غيرك يا بنتي بيخبطوا بني ادمين و مابيضروش يدفعوا حاجة ولا يعوضوهم عن اللي الاصابات اللي كانت بسبب سواقتهم
و دي اخرة اللي يسمع كلام مامتو في السواقة .... انا ماما لما بتبقى راكبة جنبي بتركبني 100 عفريت و كل شوية تتخض على اقل حاجة و تخضني معاها بس اتعلمت و مابقيتش تفرق معايا
عموما انتي عملتي اللي عليكي و زيادة مع الراجل و الحمد لله خبطة و عديت و ماتحطيهاش في بالك و جمدي قلبك و خليكي واثقة في نفسك و كفاية اوي تتعلمي من الغلطة دي لكن ماتخليهاش تأثر عليكي سلبيا خالص
قدر الله وماشاء فعل
وأحييكِ على احترامك ومتسمعيش كلام مامتك تانى :)))
اه الحمد لله سليم :))
بس عربيته مدشدشه :(((((
والحمد لله على كل شيء طبعاً
هو جزء خطأ على ماما فعلا بس الخطأ الأكبر اني نفذت بدون تركيز يمكن علشان كنت مش نايمه كويس قبلها
ميرسي جدا على ذوقك
وهحاول افصل بعد كده عن أي مؤثرات خارجيه :)))
الحمد لله وديت امبارح عربيتي التوكيل وبعد الفحص والمعاينه من المهندس عمل مقايسه مبدئيه مطلوب فيها قطع غيار اكصدام امامي وفوم وشاسيه ، صدر، رفرف وحوامل اكصدام وفانوس أمامي شمال ومش كاتب اسعارهم و الرفرف هيتحدد تغييره من عدمه بعد الفحص النهائي
واعمال سمكره 800 صدر + رفرف + ضبط مقدمه + كبوت
اعمال فك وتركيب 250
اعمال مش عارفه ايه 200 بردوا
اعمال كهرباء 150
اعمال دهانات 4 * 300 كبوت + رفرف + اكصدام مع ان الكبوت مفيش فيه خدش من الحادثه هو بس مرحل حوالي 3 سم للجهه اليمنى
وقال ان المقايسه في حدود 4000
والتصليح هيبدأ بعد معاينة التأمين بيومين ويخلص خلال 10 ايام الحمد لله
وكاتبين في محضر الإستلام الدفع عند الإستلام
على عكس كلام مندوب التأمين
وقابلنا بعد كده أستاذ خالد فاروق راجل في منتهى الذوق رد على استفسارتنا بصدر رحب وقالنا انها ممكن تخلص في وقت اقل كمان ووصى المهندس بكده
في بند ازعجني في محضر الإستلام اكتشفته بعد ما رجعنا ان الوكيل غير مسئول عن اي تلف يحدث في الفرش الداخلي او فرش الأبواب والأكر من الداخل اثناء التصليح ما لم نثبت ذلك في المحضر !!!
----------------------------------------------------------------
صاحب العربيه السيراتو عمل مقايسه في التوكيل طلعت هتتكلف 6000 زي ما توقعتوا ورفض مشكوراً وخدها يصلحها في ورشه بره واشترى قطع الغيار زي المذكوره فوق ما عدا الرفرف وهيخلص تصليحها خلال يومين بإذن الله
بعتذر طولت عليكم شويه
الحمد لله انك سليمه و الحمد لله الموضوع اتلم
السلام عليكم ورحمة الله وبركاته
الأخت الفاضلة الأستاذة / Sara2001
قال تعالى ولنبلونكم بشيء من الخوف والجوع ونقص من الأموال والأنفس والثمرات . وبشر
الصابرين الذين إذا أصابتهم مصيبة قالوا: إنا لله وإنا إليه راجعون
وهذا الحادث من باب نقص الأموال
فعليك أختي الفاضلة بقول إنا لله وإنا إليه راجعون فقد قال الله بعدها أولئك عليهم صلوات من ربهم
ورحمة وأولئك هم المهتدون
فجمع لهم الله ثلاثة أشياء صلوات ورحمة وهداية
وعليك بقول المصطفى صلى الله عليه وسلم اللهم أجرني في مصيبتي واخلف لي خيرا منها
فقد قال الحبيب صلى الله عليه وسلم أن من قال ذلك أبدله الله خيرا منها
وصل اللهم وسلم على معلم الناس الخير محمد بن عبد الله وبارك يارب العالمين
السلام عليكم ورحمة الله وبركاته
الأخت الفاضلة الأستاذة / Sara2001
طمنينا التوكيل خلّص السيارة ولا لسة ؟
أسأل الله العليّ العظيم أن يحفظ لك سيارتك وجميع الأعضاء من كل سوء
اللهم إنا نعوذ بك من سوء المنقلب وكآبة المنظر ,
اللهم إنا نسألك البر والتقوى ومن العمل ماترضى
ربنا أنزلنا منزلا مباركا وأنت خير المنزلين