الموضوع: تقرير كامل على صيانة الالف للبرسونا

النهاردة الصبح رحت من غير حجز زى ما قالولى امبارح فى التليفون بس قبل 11 الصبح المهم وصلت هناك قلت اسلم العربية لمين قالى ثانية واحدة المهندس احمد جالى المهندس احمد واستلم منى العربية وقالى اتفضل استريح فى الاستراحة قلتلة بس انا عندى شوية ملاحظات كدة قالى طيب تعالى معايا رحت معاة وهو بيستلم العربية قلتلة اولا الفرامل حاسس انها فى الجلاش ضعيفة وبالذات فى السرعة وفية صوت تزييق كدة لما بأخد مطب والكاسيت واطى اوى ابتدى اسمع الصوت وهو على 15 او 18 قبل كدة مفيش صوت خالص اة والريموت مداة ضعيف اوى لازم اكون واقف جنب العربية علشان يقفل او يفتح العربية المهم قالى طيب اتفضل استريح
دخلت ولسة حقعد لقيتهم بيدخلو عربيتى مع انى كنت رقمى 6 بس مش عارف ازاى روحت قايم وداخل ابص بيعملو اية لقيتو بيفضى الزيت وبيفك الفلتر وعمال بيربط فى العفشة كدة المهم عمل كل الكلام دة ولقيتهم بيندهو عليا اتفضل ادفع كام ياعم 213 جنية دفعت وادانى امر الاستلام او حاجة اسمها اذن الصرف روحت اخد العربية قلتلة ياباشا عملت اية فى الفرامل قالى الفرامل كويسة تمام قلتلة ايوة يعنى اخدت منها هوا قالى لاء العربية دى مش بيتاخد منها هوا من الفرامل قلتلة امال عملت اية قالى مفيش الفرامل كويسة كنت حبتدى اتعصب قلتلة اندهلى المهندس احمد جة المهندس احمد قلتلة مش حضرتك انا قولتلك على موضوع الفرامل قالى اة قولتلة طيب هو معلمش فيها اى حاجة قالى طيب خلاة يطلع يجرب جرب وجة قالى الفرامل كويسة رحت قايلة وانا بقولك انها ضعيفة قالى اصل هى نظام فراملها كدة انتا حتتعود علية قلتلة ياباشا ماشى بس مش مسألة بعد الدواسة او طول المشوار مسألة ان حضرتك بتجرب بسرعة بطيئة فالفرامل حضرتك بتحسها قوية لاكن وانا ماشى بسرعة 100 مثلا وافرامل بحس العربية مش بتمسك وماشية لاكن فى السرعة البطيئة هى مفيهاش اى مشكلة المهم قعدنا نقاوح انا وهو وانا مصمم برضوا المهم راح المهندس احمد قالى طيب تعالى نجربها سوا طلعنا على شارع النيل وجرينا 70 كدة وجاى يفرمل فعلا هو حس انها فيها حاجة بس قعد يقولى برضوا هى البروتون نظام فراملها كدة المهم رجعنا تانى المركز راح قايلهم اعملو رجلاش الفرامل قصرو المشوار شوية المهم جة كدة وقعد يلعب فى البدال وقالى جرب قالى بس اصلى بنعملها بنسبة معينة علشان الفرامل متقفش والطنبورة والتيل يبوظ وقعد يحورلى كدة فى كلام ملوش لزمة المهم جيت اجرب لقيت الفرامل عليت شوية وبقت احسن كتير بس برضوا انا مش حاسس انها تمام اوى بس احسن من الاول بمراحل المهم شكرتة وقلتلة مفيهاش اى حاجة تانى ممكن تتعمل تظبط الفرامل اكتر قالى لاء والله دة اخرها ومع ذلك حاول فى صيانة ال 5000 كيلو تروح ابو رواش احسن وتخليهم يشيكولك اكتر على الفرامل هناك احسن قلتلة طيب وشكرتة بس بينى وبين نفسى عايز اقولة طيب ماكان من الاول لازم نقاوح ونوجع قلب بعضنا المهم طيب بالنسبة للريموت والمدى بتاعة قالى كل الريموت كدة هو نظامة كدة المدى بتاعة قصير اوى كنت عايز اضغط علية شوية يمكن يلاقيلها حل زى الفرامل بس قولت يلا متبقاش غلس بقى طيب يابشمندس والكاسيت قالى لاء دة توكيلة فى احمد عرابى توكيل الكاسيت مش عندنا او فى ابو رواش فى المركز التانى قلتلة طيب وصوت التزييق قالى دة من الكنبة وعملناها مش من العفشة ودة زى ماقالنا واحد زميلنا قبل كدة فى الموقع ان صوت التززيق دة من الكنبة اللى ورا المسوجر بتاع القفل بتاعة الكنبة ولفو عليها شريط لحام علشان التزييق وخلص الموضع تقييمى للمركز يعتبر جيد لاهو ضعيف ولا هو ممتاز وعملت الصيانة فى حوالى ربع ساعة متأخرتش خالص يعنى كنت 11 ونص مع الرغى والتجارب والتظبيط وكل حاجة كنت مخلص وانا واصل اصلا الساعة 11 التكلفة زى ماقولت اتكلف 213 جنية وحسبو عليا شريط اللحام بخمسة جنية مع انى اخدت منة تنتوفة مفيش حاجة بسيطة اوى بس يلا وغيرو زيت وفلتر زيت وتربيط عفشة بس دة كل اللى حصل معايا النهاردة وقالى كدة ممكن تشغل التكييف براحتك وتزود السرعة عن 100 براحتك واى استفسار على حاجة تانية انا تحت امركم يارجالة وانشاء الله لو فية جديد حقولكم علية .