الموضوع: النجدة :- عاجل جداً العربية مش راضية تدور بدون سبب واضح

المشاركة الأصلية كتبت بواسطة أشرف العدوي

نكمل بقى تكملة الموضوع
و قبل ما اكمل
أحمد أشكر اخويا الصغير ( ahmed_mido1889 )
اتصل بيا و انا في الشغل و قالي ان المشكلة دي كانت عندو و طمني شوية و قالي على كهربائي في الدقي لو الموضوع كان فشل كنت هروح اجيبه .
أحساس جميل لما تلاقي حد انت ما تعرفوش عايز يساعدك
الف شكر ليك يا احمد و ان شاء الله تبقى معرفة خير

في كام كهربائي عندي في المنطقة سألت حد و رشحلي واحد أسمه حسني
المهم روحت جبت حسني من المركز الطبي العالمي
و قد يبص يمين شمال يفك الفيوزات يراجع على الفيش يراجع على توصيلات الأنذار و السنتر و يشوف سلك البوجيهات
حوالي نص ساعة و مافيش فايدة
المهم قالي انا مش بحب اعك و كدة فالأحسن تشوف حد يشدك او تجيب ونش و تنقلها عند ميكانكي اسمه أحمد السمان ( تنك شوية أحمد ده انا عارفه بس اسمع انه كويس )
قولتله ده أخر كلام قالي اه
العيب عندك يا اما في الكنترول يا امام حساس الكرنك بس لما يتكشف عليها بالكمبيوتر يبقى أحسن علشان نحدد العيب فين بالظبط

المهم طلعتله عشرين جنيه بديهمله و انا قاعد في العربية و هو واقف عند الكبوت
قالي لاء عيب و انا ما عملتش حاجة
و هوب
بيسند بأيده الي فيها المفك على الرفرف لقيت لمبة التشك أنجن نورت و طفت تاني
طبعاً انا ذوهلت
قولته انت عملت ايه
قالي و المصحف ما عملت حاجة
قولتله لاء اعمل كدة الي انت عملته دلوقتي ( طبعاً هو مش فاهم )
قولتله اللمبة نورت و طفت تاني
قالي ازاي قولتله ما اعرفش
قعد يجرب تاني في الكنرول اللمبة تنور و تطفي
من هنا لهنا
أكتشف ان الكنترول مش واخد ارضي ( طبعاً انا مش عارف ازاي مع ان الكنترول كله راكب على جسم العربية )
المهم قعد يجرب و يحاول لحد ما مؤشر البنزين طلع و لمبة التكييف طفت و لمبة الانجين نورت

قالي خلاص انا اخدها عن الورشة أمشيهالك و اطلع على احمد السمان أحسن

المهم شبطلي سلكة في الكنترول و سلكة تانية في السالب بتاع البطارية و دارت
طبعاً كانت بتبطل على طول علشان ما كنتش عامل ايديل ليرن
بس اتظبط
و طبعاً نفضت لأحمد السمان و طلعت على مهندس محمد فضالي ( توب جير ) و ريته الي حصل و كدة بس كان عنده زحمة جامدة
بعتني على ورشة كهرباء تبعه بس للأسف صاحب الورشة والدة توفى و قافل طبعاً
رجعت للمهندس محمد تاني طمني و قالي امشي بيها عادي و انا قولتله هعدي عليه يوم الجمعة اكشف على كله لاني كنت شبه ميت فعلاً ( كنت بره البيت من الساعة 6.30 الصيح لحد الساعة 10 بالليل و عامل دايت كمان كنت واكل طول الفترة دي شرحتين جبنة رومي بس ( طبعاً الجزء ده مالوش علاقة بالموضوع )

بس السؤال :-
ايه الي حصل ؟؟؟؟
حسني الكهربائي تفسيره اني شيلت كابل الموجب و المفتاح في الكونتاكت ( انا مش فاكر بس يجوز )

ياريت نحاول نفسر و الخبراء علشان يبقى درس و نتعلم من بعض .


و الف شكر ليك يا احمد على اهتمامك

العفو يا باشا

بص كده خليه يراجع علي سلوك الارضي الي رايحه للكنترول في الضفيره
ويشوف الارضي في جسم العربيه وينضفه

ويراجع علي فيش التجميعات في الضفيره لو ملحت بتفصل خالص

ويبتدي يحدد فاصله منين

وده الي كان عمله محمد السيد في عربيتي

عرف ان العيب الكنترول واخد ارضي لكن مش واخد كهربه

جاب الضفيره من قبله وبص علي الفيش لقي في فيشه مملحه ومعزوله

نضفها باسبراي كربراتير وقفل العربيه اشتغلت فل

وممكن احسن تروح لمحمد السيد وهي دلوقتي مش مشكله حساسات هي مشكله توصيله

وبرضه تخليه يكشف سكانر علي العربيه علشان يطمنك