الأكسنت rb دلوقتى بقالها مدة فى السوق المصرى ....
ياريت نعرف تقييم ملاكها للعربية ....
هل العربية فيها عيوب صناعة ولا العيوب اللى بنسمع عنها دى فردية؟؟!!
هل بتتعامل مع التوكيل فى متابعة الصيانة ولا المراكز المعتمدة أفضل ؟؟!!
عرض للطباعة
الأكسنت rb دلوقتى بقالها مدة فى السوق المصرى ....
ياريت نعرف تقييم ملاكها للعربية ....
هل العربية فيها عيوب صناعة ولا العيوب اللى بنسمع عنها دى فردية؟؟!!
هل بتتعامل مع التوكيل فى متابعة الصيانة ولا المراكز المعتمدة أفضل ؟؟!!
انا فى الرياض السعوديه بصراحه جربتها تاجير حلوة جدآ وناعمه وشيك من برة وجوة ومنتشره جدآ فى شوارع الرياض مافيش اشارة الا ما تلاقى حواليك اتنين وثلاثه منها لو عربيه مش اد كدة ماكنا وجدنا الانتشار الواسع دة فى السعوديه هى والالنترا والكيا ..الهيونداى والكيا انتشروا بشكل ملحوظ بالخليج
هههههههههههههه
والله معاك حق يا جوست ... واحنا بنشوف فعلا العربيات الخليجيي بتختلف في الاوبشن والكولتي عن الي بتيجي مصر ، وتلاقي غبور افندي علشان يقضي على هذه الظاهرة يقلك مالهاش ضمان ولا قطع غيار وشوية شوية هيقول واللهِ لا اقطع عنكم مية ومنور وأحرمكم من المصروف . ههههههههههههه
انا بصراحة شايف هيا عربية لزيزة بس عليها بعض الملحظات :
1- في صوت طقة كده ولمن أجي أعشق الغيار الاتوماتيك وبلف الديريكسيون .
2- بسمع صوت الكوتش وانا سايق .
3- بحس بنقلات العربية لمن اكبسلها بنزين بصورة ملحوظة .
4- احياناً في وقت الظهر بشوف انعكاس صورة التابلوة على البرفريز الامامي ... ودي بيزغلل عنين الواحد .
طبعاً انا بتكلم عن نفسي والي شيفو في الي عندي ... وبيني وبينكم تمنها مبالغ فيه قوي 103.000 جنيه .
يعني كان حلو عليها قوي 80.000 بس الي خلى البيكانتو ب 83.000 جنية مش هيخلي الاكسينت توصل للمبلغ ده .
صحيح هيا بكام في السعودية ... أعتقد انها مش هتزيد عن 43000 ريال في جنيه ونص يعني حاجة وسبعين الف جنيه . وتحياتي .
لا هو حضرتك العربية لسه مكملتش معايه 300 كيلو بس وشفت فيها شوية مشاكل امال لوقعدت معايا هشوف ايه هههههههههه
أنشاء الله هعمل صينتها في التوكيل ابو رواش .
بس كمان من الحاجة الي مضيقاني جداً حكاية الكلكس الي راكب لها فردة وحده ... أمبارح كان في قطه بتعدي قدامي الشارع قعدت ازمرلها فلقيتها واقفه وعماله تبص للعربية بتدور ياعيني الصوت ده طالع منين هههههههههههه
ياترى في الخليج الكلكس بتاعهم فردتين ولا فردة واحده زي عندنا علشان يوفرو من تمنها .
هيا مودرن سيرفس دي تبع غبور لاني كنت بفكر اوديها ابو رواش. بس بيني وبينكم مجربهم قبل كده وبصراحة بيكرهو الواحد في عيشتو
ال مش عجباك 47 الف كل الكماليات ماعدا الفتحه والجنط وتصل الى 52 الف ريال فتحه سقف وجنوط .. نفس الثمن دة ثمن سيارة رينو فلوينس الفئه التانيه من ثلاث فئات بتاعتها ... يعنى 76 الف بدون اى جمارك ونقل وشحن وضريبه مبيعات ورسوم ... هو يادوب ثمنها عندكم مضبوط ... لو حسبت لكم الرينو الفلوينس هنا 52 الف يعنى 84 الف غير الجمرك شوف توكيلها عملها بكام عندكم وحاططها فى اى فئه علشان تعرفوا بنضحك عليكم صح فى مصر
في مركز غبور العبور انا لسه عامل صيانة الالف فيه وممتااااز جدا وصيانة الالف لازم تتعمل في غبور علشان تعتمد الضمان وبعد كده روح في اي مركز خدمه تاني ولو حابب اتأكد بالتليفون منهم وبالنسبه للعربيه انا شايف انها كويسه مش وحشه شوية اصوات للكاوتش فعلا بس مش قويه اوي بصراحه لازم تكون مركز والاتزان على السرعات العاليه مش لطيف وتجاوب الفتيس معاك على السرعات العاليه مش ممتاز يعني العربيه تاخد بالنسبه لي 7 على 10
يا اخى اتقى الله
بقى التوكيل ضحك علينا انه حط الفلوينس فى فئة الاكسنت .. يعنى عايز تفهمنا ان الاكسنت فئة اعلى و احسن من الفلوينس .. طيب كنت قول النترا حتى كانت تبقى مبلوعة شوية :grrrr:
انا هسيب اعضاء قسم هيونداى يردوا و انا واثق فى حكمهم المحايد
على فكرة الكلام فى المنتدى ممكن ربنا يحاسبك عليه لأن ممكن واحد مش فاهم ياخد الكلام ده على انه صحيح و يمشى وراه و يأثر فى قرار شرائه لعربية دافع فيها دم قلبه
ههههههه ياعزيزي تيكت ايزي احنا في زمن العجايب ، ياباشا هما هنا في مصر بيبعو لينا العربيات وبيفهمونا انها عربيات في حين انها ادوات بمعنى ديت اي اربع سنين وبعدين على الزبالة بتتفرم ويعاد تصنيعها لكن احنا في مصر بنورثها لعيال عيالنا وتبقى العربية مدعوكة وبنغيرلها نص. قدام او ورى ونرجع نبيعها على اساس. انها فبريكة. في حين انها. معدتش تصلح للاستخدام الادمي. يعني انتا حضرتك لو الغسالة اتحرق متورها بترميها وتشتري غيرها مش تنزل الحرفين تدور على غسالة متور غسالة استيراد كزالك العربيات فمتستغربش من تمنها ده حتى بسعر تويوتا يارس فل اوبشن الي هيا اغلى حالياً من الرينو لكن لو جيت شفت تمنها الحقيقي هتلاقي كلو بسعر واحد وانا كان عندي حكمة دايماً بقولها لو معاك عشرين جنيه عاوز تاكول بيها ممكن تجيب شوية شيبس وباسكوتات وتاكول وممكن تجيب وجبة من مؤمن وتاكول وممكن تجيب فراخ وتاكول وممكن تجيب ربع طرب على شوية كفته وتاكول. فسعر اللحمه زي سعر الجبنه زي سعر الفراخ زي سعر الباسكوتات. احنا في زمن العجايب
والعربية الرينو مبتلقيش حد يركبها في الخليج لانها مبتستحملش. مش عاوز اقلك ان العربية اللوجن في الخليج بيجبوها المطاعم لتوصيل الطلبات للمنازل دلفري. مش احنا عندنا موتسيكلات صيني وفزب ( الدلفري ) هما عندهم هناك لوجن. وفيرنا وافيو خدمت التوصيل للمنازل. ههههههههه. وتحياتي
يا باشا مش قفش خالص على فكرة .. بس الكلام ده مفهوش اراء احنا مش بنقول حلوة ولا وحشة احنا بنقول على فئة هى بتنافس فيها ديه حقيقة مش رأى شخصى .. محدش قال بتمشى على الحيطة و محدش قال الرينو جامدة اخر 3 حاجات .. بس حط الفلوينس جمب الاكسنت كده و هتعرف انا بتكلم فى ايه .. ظلم للاكسنت تتقارن بفئة غير فئتها اصلا دا اللى بتكلم فيه
بس لما اجى اقولك الالنترا ديه فئة الريو و هما بيضحكوا على اللى بيشتروا هيونداى و منزلينها بسعر غير سعرها هيبقى دا رأى شخصى ولا ايه برضه
يا باشا انا كلامى مكانش بيقلل من هيونداى على فكرة و مقولتش انها عربية وحشة بس انا بقول نحط الامور فى مكانها الصحيح .. زى ما مثلا مينفعش نقارن ياريس بكورولا مينفعش نقارن اكسنت بالنترا و النترا منافسة للفلوينس يعنى مينفعش نقارن اكسنت بفلوينس عشان ديه فئة و ديه فئة تانية .. اختلاف سعر و اختلاف كماليات و اختلاف حاجات كتير
و برضه بوضح وجهة نظرى تانى انا مش بقلل من هيونداى خالص و كان عندنا قبل كده اكسنت 98 قعدت 10 سنين زى الفل و عربية حمالة اسية و تمام فأكيد الجديد احسن كمان بس انا بتكلم فى نقطة تانية خالص ان مينفعش نقول ان الاكسنت فئة الفلوينس و نقعد نقول لا كمان الفلوينس مبالغ فى سعرها و سعرها نصب
و قياسا على كلام حضرتك سعر الاكسنت هو اللى عالى خلاها تدخل فى منافسة هى مظلومة فيها مع انها عربية كويسة
ههههههه. اه منكم يابتوع الرينو مره اشتريت عربية رينو سنة ٢٠١١ وقعدت معايه العربية ست شهور كرهتني حياتي
وقبل ما اشتريها واحد قالي فيها قصيدة شعر لنيزار قباني وبعد ماشربت المقلب وجبتها اكتشفت فيها كمية عيوب فعملت تقرير عنها في قسم رينوووو. مسكوني سلخوني هناك والي يدخك ان كل واحد داخل يقلي انا معاك في عيب كزا بس مش معاك في باقي العيوب ولو تشوف مشاركات مالكيها هتلاقي كل واحد ايد حاجة من الي انا ذكرتها هههههههههههه. انا مش عارف انتو ليه بتدافعو عن الرينو
http://www.nilemotors.net/Nile/261575-a.html
وبعدين يا غالي الراجل بس قال ان اسعار الهونداي الاكسينت بكزا. وسعر الرينو بكزا يعني ده سعر التوكيل مش جايبينو من بيتنا واللهِ ههههههههه. حبيب قلبي يا مهاب باشا
يا باشا مش عارف انا مش قادر اوصل وجهة نظرى ولا ايه ، انا معاملتش مقارنة بين هيونداى و رينو و قولت رينو احسن و هيونداى كورى و وحشة و الكلام ده
انا بتكلم فى نقطة معينة ينفع حضرتك تقول الاكسنت فئة الالنترا و ان الالنترا سعرها عالى و مفروض تنزل تبقى بسعر الاكسنت ؟
هههههههه اه ينفع. ، وهقولك ليه انتا عارف حضرتك. الفرق بين الالنترا والاكسينت كلام فاضي شوية سنتي ميترات ودي ١٦٠٠ ودي ١٦٠٠ الالنترا اوسع شوية واكبر شوية مش الفرق المهول الي بالك فيه طيب انا اهو وانتا اهو كام مره شوفت اكسينت ار بي من بعيد وافتكرتها الينترا وكام مره شوفت الينترا وافتكرتها اكسينت ار بي. صدقني الفرق بين العربيات بسيط جدا بس الجمارك بتاعتنا والتوكيلات الحرامية هيا الي مدية للعربيات قيمة اكتر من حجمها لكن مثلاً مينفعش اقارن اكسينت ار بي بعربية سوناتا دي فئة تحس بفرق ملحوظ طيب ايه الفرق بين العربية الميجن والفلورنس مثلاً هتلاقي كلام بسيط جداً وقف دي جمب دي ولاحظ الفرق وعلى فكرة هنروح بعيد ليه. هو حضرتك مش الفلورنس ب ١١٦٠٠٠ جنيه. والهونداي الار بي الكاملة كمان بنفس السعر في مصر يبقى هنروح بعيد ليه ياباشا
يا باشا بالنسبة للاسعار
Hyundai | New Cars | New i30
http://www.renault.co.uk/......./viewallbrochures.aspx
شوف سعر الـ I30 اللى هى الهاتشباك بتاعت الالنترا و شوف سعر الميجان الهاتشباك الهاتشباك بتاعت الفلوينس
و لا الاكسنت سعرها بقى اعلى من الالنترا ولا ايه ؟
طيب هيا بكام الفلورنس السيدان العادية.
يا باشا لا فيه فرق طبعا مش لازم يبقى فرق فى شكل العربية بس .. فرق فى الخامات المستخدمة .. فرق فى الموتور نفسه حتى لو 1600 فيه تعديلات .. فرق فى الاوبشنز .. و انا بتكلم عن الفرق بين الالنترا و بين الاكسنت مش هدخل الفلوينس خالص .. طيب ما فيه فئات فى المرسيدس الـ C-class نفس موتور الـ E-class بالعكس الـ c فيها اوبشنز اكتر و تلاقى فرق فى السعر 100 الف مثلا لصالح الـ e-class طيب ما نفس الموتور و اوبشنز اعلى ، لا فرق ديه e-class و ديه c-class .. الالنترا نازلة تنافس حاجات معينة لازم تقدر تبقى منافس ليهم و نفس الحال للاكسنت ..و برضه الفلوينس نفس رينج الميجان لأن الفلوينس الجيل الجديد بتاع الميجان زى النترا شكل قديم و النترا شكل جديد .. لا يا باشا مفيش فلوينس بـ 116 خالص .. اقل فلوينس مانيوال بـ 122 الف و الهاى لاين بـ 167 الف يعنى نفس رينج اسعار الالنترا و دا الطبيعى ..
http://m........cars.com/ar/ncars.aspx?makeid=17
http://m........cars.com/ar/ncars.aspx?makeid=7
بص حضرتك كده ادي سايت من كونتك كار. واحد للرينو وواحد للهونداي وبص على الاسعار هتلاقي الفرق. بسيط جداً في الاسعار مش فرق كبير الي بالك فيه
والي يدحك بقه التويوتا يارس الشكل القديم ال ١٥٠٠ سي سي منيول ب ١٣٣٠٠٠ يعني اغلى من الرينو الفلورنس رغم ان الرينو حجمها اكبر
يا باشا انا عارف رينج الاسعار .. الاكسنت اعلى فئة فيها بحوالى 116 الف و المانيوال بتاعها بـ 93 الف و الفلوينس المانيوال بـ 122 الف يعنى اغلى من الاكسنت الار بى الهاى لاين .. و الفلوينس هاى لاين بـ 167 الف يعنى الفلوينس نفس رينج اسعار الالنترا اللى هى نفس الفئة بتاعتها
الياريس ديه على جنب طبعا اكيد حضرتك عارف كانت بكام زمان و التوكيل طبعا موت سوقها .. هى مش حكاية حجم يا باشا .. حكاية العربيات بتتصنف لفئات معينة كل فئة فيها اكتر من منافس .. يعنى مثلا الفلوينس و الالنترا بينافسوا الكورولا طيب ازاى تيجى الياريس و تدخل معاهم طب ما اكيد هتتظلم
و على فكرة برضه انا و الله مقصدش ابدا انى اقلل من الاكسنت الار بى و لا الياريس .. عربيات زى الفل و اثبتت كفائة و مبيعات فى السوق المصرى و ممكن تكون بالنسبة لناس كتير عملية اكتر و افضل من نواحى كتير من الالنترا و الفلوينس .. بس انا بصراحة مقدرتش اشوف المشاركة بتاعت الفلوينس و الاربى ديه و اسكت
و عموما انا اسف انى غيرت سياق الموضوع
و ربنا يبارك للكل فى عربياته ان شاء الله و يستر طريقه
هو من ناحية كلامك صح فعلاً الفلورنس غليت بس لاحظ ان سعرها. مابين الالينتر ومابين الاربي انا ركبت الفولورنس وقعدت معايا تلات ايام بصراحة عربية من جوه خامتها تحفه وسحبها اكثر من رائع ومحدش يقدر يقول تلت التلاته عليها كام بس كنت كل الي عاوز اوصلهولك ياباشا ان العربيات اسعارها قريبة من بعض جداً. ومفيش فرق مهول بينهم.
اوووعه. تزعل مني يا مهاب باشا بس انا اصلي سهران ومش لاقي حد اكلمو فقلت اناغشك شوووية هههههههه حبيب قلبي والله
حبيب قلبي يا مهاب. لا طبعاً ياباشا. ، بالعكس انا استمتعت جداً بالحوار معاك يا غالي .... بس الي يدحك بكره الصبح هتلاقي واحد لسه صاحي من النوم واول ما يقرى سطرين من مشاركتنا هتبص تلاقيه عمل اقتباس ويرد هههههه مايعرفش اننا كنا بنتسلى هههههههههه
انا شايف انها عربية جيدة
-فكره السعر مبالغ فيه و ده فعلا من غير أي كماليات بس ده كله بسبب الانتشار و الأقبال و توافر قطع الغيار و اعاده البيع و ده واقع احنا فيه و عشان ده يتغير لازم منافس بأسعار أفضل و تصميمات و مواتير أحدث
-المشكله عندنا الناس تجيب هيونداي تستخدمها على أسا س أنها bmw ف الهيونداي تقوم أيه تفتح بقها بدري بدري و بعدين يقولك التوكيل وحش
لو سمحتوا يا جماعة بلاش خروج عن الموضوع
صاحب الموضوع بيسأل عن رأي ملاك العربية فيها و أهم عيوبها و أهم مميزاتها
مش بيقارن بينها و بين عربيات تانية
أيه اللي دخل الفلوينس و العربيات التانية في الموضوع دلوقتي ؟
لو الكلام موجه ليا
فأنا اعتذرت فى اول الردود عن خروجى عن سياق الموضوع
و اللى دخل الفلوينس صاحبنا اللى لازم يثبت فى كل حتة ان هيونداى عربياتها مفيش زيها و ان هيونداى خلاص بقت خارج المناقسة اصلا
و كل ردودى كانت على معلومات غلط بتتقال .. مجتش و صاحب الموضوع بيسأل عن الار بى و قلت لا فلوينس احسن خليك فى الفلوينس
أستاذ / مهاب ..
حصل خير
أنا بأتكلم بشكل عام علشان الموضوع ده أتكرر في أكثر من موضوع بالقسم
أحنا عايزين نكون أكثر أحترافية في موضوعاتنا عن سيارات بعينها بغض النظر هيا كويسة و لا سيئة
عموما مرحبا بحضرتك في هيونداي دائما و نحن نتقبل النقد البناء و أظهار عيوب السيارة
الف شكر يا بشمهندس سمير و القسم منور بحضرتك و اعضاء هيونداى و ماشاء الله القسم كل يوم فى تطور ..
و بقولها تانى و الله انا مقولتش على الار بى وحشة خالص بالعكس و الله انا لسه ناصح واحد صديقى فى الجامعة انه يجيبها عشان هى اكتر عربية بتوفر الحاجات اللى هو محتاجها .. انا كان اعتراضى على جزئية معينة و اتمنى اكون قدرت اوضحها للكل
و اسف مرة تانية على الخروج عن سياق الموضوع
العربية ماشاء الله تحفة والار بى وبس والباقى هس :mad2: