الموضوع: تجربتي مع اللوجان

بسم الله الرحمن الرحيم

السلام عليكم شباب النيل ...أنا النهرده عاوز أديكم تجربتي مع اللوجان علشان الي بيفكر يشتريها يعرف كويس أيه عيوبها .

أولاً : في المجمل العربية اللوجن عربية حلوة وجميلة الشكل وشكلها فخم وضخم وتعتبر الأجمل وسط مثيلاتها من الانوس والفيرنا لكن وحط تحت لكن دي خمسين خط :

1- العربية تكيفها رائع وجامد جداً لكن يافرحتي في هوى سخن جي من تحت التابلوة من الطور للكبينة عدل ولاحظت المشكله دي حتى عند زميلي الي عندهم نفس الموديل انا كنت جايبها 2011 .

2- قزاز العربية ضعيف جداً وميسواش تلاته تعريفة طول ما انتا ماشي يقعد يزقزق جمب منك وكأنوو مفكووك .

3- بيدخل زجاج السيارة الشمس كاملة بجميع أشعتها البنفسجية والحمراء والصفراء للي يخلي الكبينة نااااااااااااااااااااااار في الصيف .

4- العربية سفاحت بانززززين عن مثيلاتها من ال 1600 سي سي .

5- على الرغم أن فراملها قوية وحلوة تيل الفرامل بيبدء يصفر من الوقوف بالزحمه المتكرر ... ولازم تغيرو كل 30.000 كيلو على ماسمعت .

6- العربية سريعة وجراية بس تحس أنها بتزعق وتنهج لمن تجريها وصوت المطور يامشاء الله متسمعش الي جمبك نهائي .

7- توكيلها زي الزفت ويعد على الاصابع ... ولو جربت تروح كده وتخطف رجليك لمطلع المقطم واتفرج على أعظم توكيل في التاريخ ياراجل دي لو ورشة في الحرفين هتكون أنضف من كده ... وأسعارهم هيا نفس أسعار التوكيلات الفخمه المكيفه الي بتشوف عربيتك بيتعمل فيها أيه ... وشوف الجمال والحلاوة لمن يرموو عربيتك في الجبل لحد مايجي دورها ... ولازم تروح الساعه 8 الصبح أوعه تنسى لازم تيجي بدري علشان تمشي 4 العصر ... ومتنساش تحجز قبليها بفترة كبيرررررررررررررة علشان الصيانة .

8- الأضاءة بتاعت العربية زي الزفت لمبة بتنور بعييييييييييد ولمبة قدامك بمتيرين ولو ركزت هتلاقيها حرف أكس على الارض وعندك مساحة عامية في الرؤيا الليلية .

9- فتحت شبابيك العربية الكبيرة زي الزفت أن قفلت الشباك علشان تسمع الي جمبك من صوت أزعاج المطور تتخنق من الحرررر الي داخلك على الكبينة وأن فتحتوو تلاقي الهوى ضارب في صرصور ودنك ومتسمعش الي جمبك نهائي ده غير انو بيطير شعرك وينعكشوو كأنك كنت بتتخانق .

10- عمرك ما هتحس بالامان بعد 120 ولا بالثبات دي أصلا أصلا بعد المية بتبقى طااااااير ولو في سبت فكة واقع على الارض قدامك لو فديتو ممكن تنقلب .

11- مفاتيح الكهربا بتاعت الشبابيك الخلفية محطوطة في مكان عقيم جداً ولازم توطي علشان تطولوا لو عاوز تفتح او تقفل الشباك .

12- سرعة فتح وقفل الشبابيك بطيئة جداً وياريتني جبتها فاضية مش كاملة على الاقل هتحرك بالأوكرة بتاعت الشباك أسرع من كده .

13- بالنسبة للهيكل الخارجي الجميل والفخم هو هو بنفس وزن الانوس (الضعيفه) لكن اللهم هما شادينو على الاخر بحيث يضعف قوتو فلو واقف في موقف والعربية الي جمبك عيل صغير فتح الباب بقوة وخبط خبطة صغيره في عربيتك تحس أنها خبطة كبيرة لأن صاجها ضعيييف جداً وأقل خبطة تحسها حدثة .

14- بالنسبة للمسحات بتاعت العربية كارثه في عالم السيارات بتمسح 60% من القزاز فقط وترفع الميه فوق وطبعاً لأن البرفريز بتاعها واقف بنسبة 80 درجة فالمية بتنزل تناي على القزاز وتوسخو بالذات في النص لذلك نصيحه يتشغلها على طول ياتجيب حتتين وحده في ايدك وانتا سايق والتانية في ايد المدام وطلع راسك من الشباك وأمسح البرفريز ههههههههه .

15- وأجمل كدبة تسمعها في العربية أن فيها باور ... قال بور قال ...

16- أما عن الأبواب حدث ولا حرج جرب كده تفتح أي باب من الي ورى وتقفلوو وهتحس على طول برزعت الباب الجميلة ويقولك يا باشا الرينو كلو كده .

17- العربية دي فيها ميزة مش هتلاقيها في اي عربية ... عمرك شفت سقف عربية من جوا بيهبب بسرعه ويبقى كلوو هباب ووساخة وتراب وعفار ...بص كده في اي عربية لوجن وشوف قد أيه سقفها الداخلي من جوا قذر وده نتيجة الهوى الي بيدخل من المطور للكبينة بسبب سخونيتوو بيتصاعد للسقف بحكم انو عالي ومتكملش اسبوعين وغير تلاقي السقف قد ايه قذر ...بس حلو بسيط هتلك مكنسة كهربا مع العربية كل أسبوع أكنسوو . ملاحظة الهوى الي بيجب من المطور للكابينة بيجيلك من تحت التابلوة أو من وراه من منطقة الأقدام كده .

18- عربية غير عاطفية بالمرة ومتحسسش بأي متعه نهائي في سواقتها

في المجمل هيا عربية حلوة وربنا يوفق الي عاوز يشتريها ... ممكن لو واحد ركيب كان بيركب فيت و 128 والكلام ده يحسها أمله ونقلة نوعية في حياتو ... وهيا يمكن تقدر تقول عليها لادا 2011 او شاهين 2011 مطورة فقط لاغير .
ويمكن للي ملوش خبرة في العربيات يقول عليها وااااااااااو بس هيا مكملتش نص حرف الواو بس الحق يقال العربية عالية عن الاسفلت وعائلية وتكيفها ممتاز بس لولا عيب حرارة الكبينة وانا كنت جايبها فضي وكبينتها بتسخن في الصيف حتى بالليل بحس ان الكراسي مولعه وحرارة المطور طبيعية فما بالكم لو اشتريتها سودة كنت عملت ايه ... والكراسي فرشها فبريكه أمال لو ركبتهم جلد كنت عملت أيه في حرارت الكبينة .
والله على ما أقول شهيد ...

بالمناسبة خبراتي السابقه وما ملكته في السيارات والملك لله ( كابريس 86كامري 88لانوس2004 بيجو 505 كرولا 96 ماتريكس 2006شاهين 2003 تويوتا يارس 2008 نيسان مكسيما 2000 وسوبارو vxr ) .

بصراحة انا قريت كل تعليقاتكو ياشباب وأشكركم على تفاعلكم بالموضوع ... بس الحقيقة انا ميهمنيش شركة العربية ولا العربية نفسها لكن يهمني أي أنسان يشتري العربية يعرف هو هيشتري أيه وميتغرش بالشكل ...

أما بالنسبة لأخونا محمد أشكرك في حجات نتفق عليها وفي حجات نختلف عليها زي
اى عربيه بعد ال 120 مش امان
الأمان الى بتكلم عليه نسبى بيختلف من شخص لأخر و حسب نوع الطريق و اتجاه الهواء
العريبيه بجيب بيها 160 و الى راكب معايا مبيعرفقش السرعه غير من العداد

حبيب قلبي أنتا جبت السرعة دي أزاي ... ياباشا ده أنتا بطل ... انا لو يطلع بأيدي أديلك المدايلة الذهبية أو البورنزية للوجان ، عامة في عربيات كتير بتحس بالامان حتى مع السرعات العالية بس اللوجن لأ لأ لأ .

أما بالنسبة اى عربيه لون السقف فاتح حتلاقيه بتوسخ بسرعه
زى الأنسر مثلا و كمان الجو فى مصر مليان تراب و عواده سيارات

لا يا حبيب قلبي مش زي اللوجان العربية فعلا سقفها بيتوسخ بسرعة رهيبة رغم أني ساكن في منطقة سكنتية راقية وبعيدة عن مصادر التلوث ... وجرب كده اي عربية تانيه لو شفت زي فرش سقف اللوجن بحق . وحتى لو أتوسخت فبتاخد وقتها مش كل اسبوع الاقي السقف بتاع العربية من جوا مهبب .

ااما الي دحكني هو حضرتك عايز التيل يقعد اد ايه (التيل اول مره عمل 33000 الف تانى مره عمل عمل 28000 الف حسب المشى و الدوسعه على الفرامل فى ناس التيل مكملش 10000 الف )

ليييييييييييييييه هو تيل فرامل عجلة ههههههههه 10.000 كيلو ولا 30.000 كيلو هو أنا كل ماهغير للمتور زيت أغيرلها تيل فرامل ... ده التويوتا ولا الهونداي ولا حتى اللانوس بقلهم عندي سنين مفتكرش لغاية دلوقتي اني غيرت لوحده تيل فرامل ... وعربية متكملش معاية شهرين أغيرلها تيل فرامل

أما بالنسبة ل التزييق ده من وساخه فى مجرى الزجاج وعند تنظيف المجرى بيروح اى صوت بتسمعه

يبيه العربية فبررررررريكة وبتزيق أمال لو قعدت عندي كمان سنة هتعمل أيه

وكويس اننا بنتفق في 1- العربية تكيفها رائع وجامد جداً لكن يافرحتي في هوى سخن جي من تحت التابلوة من المتور للكبينة عدل ولاحظت المشكله دي حتى عند زميلي الي عندهم نفس الموديل انا كنت جايبها 2011 .

كل اللوجان فيها المشكله دى و بيتركب فى التوكيل بدون اى مشكله

الحمد الله ان كمان المشكلة دي عندك لأني فعلاً مبجبش حاجه من عندي أومن خيالي ... ومن ساعة ملاحظة العيوب دي فيها ... وبالذات لمن لقيت العربية بتنتع مني وانا ماشي على الطريق الصحراوي في الظلمة وهيا مكملتش 15.000 كيلو قررت أبيعها وأبيع أبوها .

أما بالنسبة للحرارة الي داخله للكبينة ممكن تكون في الشتا جميلة لأنها بتدفي الي قعدين طبيعي ههههههههه بس في الصيف يا راجل يا طيب ده انا بركن العربية بالليل بالساعه والساعتين وأرجع ألاقيها دفية وسخنة من جوا ... وأكتر واحد يحس بالسخونة دي الي قاعد جمب السواق رجليه بتولع من الهوى السخن الي دخلها ...