انا اتسرقت ودمي محروووق اوي
السلام عليكم و رحمه الله و بركاته ,,
من شوية موبايلي اتسرق من العربية بطريقة بدائية بس انا اللي غبي و مش بتعلم من المواقف اللي بشوفها و بقرأ عنها في المنتدى .
كنت في ميدان ابن الحكم في منطقة حلمية الزيتون وزي العادة الشارع زحمة اوي , وكنت حاطط الموبايل على الكرسي اللي جنبي بعد ما كنت بكلم صديق ليا , وفاتح الشباك نص فتحة , فجاءة لقيت شاب خبط نفسه في ظهر العربية ازاي معرفش ولقيته بيزعق و بيشتم لقيت الجلالة خديتني ونزلت انا كمان شتيمه فيه ونازل من العربية عشان اتخانق معاه , اول ما نزلت لقيته جري وبعد مارجعت العربية مالقيتش الموبايل والمصيبة انه عليه كمية رهيبه من الاسماء لاني بستخدمه في الشغل .
بصراحه انا متعكنن على الاخر بس بقول قدر الله و ما شاء فعل والحمد لله انها جت على قد كده .
رحت عملت محضر في قسم عين شمس قالولي روح قسم المطرية , رحت قسم المطرية و عملت محضر ووصفت الواد ده وصف تقريبي ولما نشوف حيعملوا ايه ؟ وعماااااااااااار يا مصر .