تصدق حلو العنوان ده ... ينفع مطلع اغنية ........
اعزائى المفقوع مرارتهم زى حالاتى ....كلاكيت تانى مرة .....


الشركه نزلت اعلان تاني .. عاوزة محاسب ... و للاسف ... حاطين رقم تليفونى .... و انا خلاص جالى الهسهس .. من كتر الاتصالات ... متهيألى ان مصر كلها محاسبين .... كنا فى الجامعه مسمين كلية التجارة .. كلية الشعب ... اى حد تتكعبل فى فيه .. يقولك انا فى تجارة ... طيب .....



الجيل اللى طالع ده جيل غريب الشكل و المضمون و الفكر .... الا من رحم ربى ....... من امبارح و انا شايف المرار مع المتصلين ... الناس بقت بتتصرف بشكل الى ... بدون فكر .. مجرد متشوف الاعلان تتصل على طول ... و ممكن يكون جه الشركه قبل كده و محصلش نصيب و ييجى تانى قال يعنى بيجرب حظه مرة تانيه .... ما علينا ......


كله بقى كوم ... و الموضه الجديدة ده كوم تانى ...البهوات اللى مأنتخين و نايمين فى التكييف ... و ضاربينها صرمه .. طالما ( المم ) موجود ..... خلاص هيشتغل ليه ... انت حر ..


لكن ... لما الاقى تقريبا نص اللى اتصلوا بيه امهات و بيدوروا على شغل للبهوات اللى نايمين جوة فى التكييف .. و لا مشغولين بالبلاى ستيشن ... و لما اسأل على البيه ... متصلش بينا ليه هو بنفسه .؟؟؟ تتردد شويه ... و تعتذر بشكل مش منطقى .. و فى منهم اللى تقولك اصله نايم ... او هو جنبى اهو و هيكلمك ؟؟ و لما يتكلم معاك تحس انه لسه متخرج من الكى جي !!!!!!!!


و الاكادة السوده بقى ... لما تتصل خطيبته علشان تدورله على شغل ... علشان البيه مش فاضى يدور ... ايه المرار ده ... طب يا سيتى فين الجثه اللى هتشتغل .. تقولك اصله مش متاح دلوقتى ... !!! هو ايه اللى مش متاح ... هو انا هشغل موبايل !!!!!! ...الناس ده هتفتح بيوت ازاى ... و هتكون مسئوله عن اسرة ازاى بس ... ده حتى لو اهله جابوله شقه و عفش و عروسه و كل حاجه و هو دخل بالمجهود بس .. برضه هيفشل ...



ده ظاهرة عامه ... من واقع مرير ... الناس دول لازم يرضعوا بريل من بتاع المواعين .. من صغرهم ... هو فيه ايه ؟؟
و الله العظيم .. جالى مكالمه من حد . و الله صوت حريمى ميه فى الميه ... فعلا ست اللى بتتكلم ... و طبيعى قولتلها يا فندم احنا عاوزين محاسبين ذكور .... قامت رده و قايلالى ... دا انا راجل ... راجل ... و الله انا رااااااااااااااااجل ..
انا معرفتش ارد ... من كتر الضحك ... و اديت التليفون لواحد صاحبى يديلها العنوان ... قصدى يديله العنوان .......



الطف بينا يارب .....