السلام عليكم و رحمة الله و بركاته...

أنا عندى مشكلة مطلعة عينى فى عربيتى..معلش الشرح طويل بس عشان المشكلة تكون واضحة:

السيارة: بيجو 206 موديل 2001
الموتور: 1100 سى سى إنجيكشن...

العربية رحت غيرتلها سير كاتينة و بوجيهات عشان عدى عليهم كتير و ضبط التاكيهات....أخدت العربية و مشيت...بعد ما سافرت بيها من طنطا للقاهرة (حوالى 100 كم) و أنا ماشى 90 نتشت نتشة صغيرة و بطلت بيا فجأة على الدائرى....

الميكانيكى قاللى دور تانى هاتلاقى فيه حساس مش نضيف..دورت..مشيت عادى و رجعت على المحور تنتش كتير بس من غير ما تبطل....على طريق الواحات بطلت 3 مرات...

رحت حطيت لها 10 لتر 95 على البنزين إللى كان فيها و حطيت منضف إنجكشن موبيل....فضلت تعمل نفس الحركة...

المشكلة أنها الصبح بتدور عادى....بعدين بعد ساعة مثلا تبطل..أنا بحس أنها لما بتبطل مفيش بنزين بيتحرق....يا إما مفيش كهرباء راحت للبوجيهات أو مفيش بنزين جه من الطرمبة...بس ده تفسيرى أنا.......و أما تبطل ممكن تفضل ساعة مش راضية تدور (المارش شغال و لكن الموتور مش بيلقط)....بعدين تدور تانى كمان ساعة...و هكذا...

رحت كشفت عليها كمبيوتر واحد أفتى و قاللى أنه حساس (كتاوت) الطرمبة إللى بيودى كهربا لطرمبة البنزين (إللى تحت الكونترول) أنه بايظ و عايز يتغير لأنه بيفصل لوحده....رحت التوكيل فى طنطا جبت حساس أصلى...

هنا بقى أنا عندى سؤال...الراجل إللى إدانى الحساس قاللى أنه هو بتاعها طبعا بناءا على الكود إللى موجود عنده فى الكاتالوج...أنا مهندس كهرباء....الدايرة إللى مرسومة على الحساس الجديد مش هى إللى على القديم...ينفع يكون الحساس ده موديل جديد بس لنفس العربية و يكون تغيير الدايرة ده لا يؤدى لتغيير الوظيفة؟؟؟...

المهم....

أخدته و ركبته فضلت تعمل نفس الحركة...

الكهربائى أفتى و قال أنه حساس الكرنك....أخويا غيره....حصلت حاجة جميلة جدا.....حساس الكرنك الجديد مع حساس الطرمبة الجديد أما يركبوا مع بعض ممكن تبطل العربية و تشيل المفتاح تفضل العربية دايرة و الموتور شغال بقدرة قادر.....

أنا أصلا كنت شاكك فى حساس الطرمبة إللى أنا جبته عشان موضوع رسمة الدايرة ده فا رجعته للتوكيل....و ركبت حساس الطرمبة القديم...الحساس القديم مع حساس الكرنك الجديد مابيعملش نفس الحرك الخزعبلية إللى فوق دى....بس العطل لسه موجود و العربية بتبطل....

آخر إفتاءة خرجت بيها من مركز خدمة كبير أنها عايزة كونترول يونيت...لأن الكونترول يونيت بتبعت أوامر غلط للحساس و كلام كبير كده....الكلام ده ممكن يكون سليم؟؟؟

أنا شاكك فى الكلام لأنها دلوقت أما بتبطل ممكن تشيل حساس الطرمبة من الفيشة و تركبه تانى و تدور تلاقيها إشتغلت....بعدها بساعة تفصل تانى...اشيل الحساس و أركبه تشتغل تانى....و هكذا.....ده غير أنى مش لاقى سبب وجيه أن الكونترول يبوظ...

المشكلة أن العربية فى طنطا و أنا طبعا خايف أسافر بيها القاهرة عشان هاتبطل على الطريق...و أنا مش مستظرف موضوع فك الحساس و تركيبه كل شوية ده...

حد عنده تشخيص؟؟؟