البطاريه بتنام لو في يوم العربيه مدارتش

**shaddadfalcon1** · 09-06-2012 03:00 PM

السلام عليكم

السبت اللي فات جيت ادور العربيه لقيت البطاريه نايمه وكنت مشلغتش العربيه يوم الجمعه زقتها دارت علي طول ورحت لبتاع البطاريات قالي مفيش شحن خالص بس البطاريه كويسه وميتها حلوه وانا كنت لسه مظبطها قبلها بيومين وملعلتش في الكهبراء خالص مفيش غيرسلك السماعات اللي ورا كان مفكوك قمت مركبه وشكرا

المهم رحت الأسكندريه ورجعت وفضلت تمام لحد ماجيت القاهره وسبت العربيه البارح وجيت دولتقي اجيب دكتور لابني وادور مفيش بطاريه

مش عارف ايه اللي ممكن يكون معلق ومخلها بايظه كده

انا مش عارف في ايه في العربيه دي بقالها اسبوع مطلعه عين اهلي وكمان انا دلوقتي راكنها في جراج وموسع لغيري وحاططها في مكان منيل مينفععش حتي تتزق فيه

**Land_Cruiser** · 09-06-2012 03:17 PM

يا اما البطاريه باظت و محتاجه تتغير او فى حاجه ملمسه و الارحم ان تكون البطاريه باظت فحضرتك تغيرها بواحده جافه و تريح دماغك اما لو فى سلك ملمس بتاع الكاسيت مثلا او الانذار او اى حاجه زياده حضرتك مركبها فلازم تجيب كهربائى شاطر يقولك ايه اللى ملمس و يعزله بدل ما لاقدر الله يعمل ماس و لا حاجه و عامه انا افضل ان حضرتك تشوف كهربائى محترم يقولك العيب فين بدل ما تشترى بطاريه جديده على الفاضى و يفضل العيب لسه موجود

**shaddadfalcon1** · 09-06-2012 06:52 PM

انا رحت جبت كهبرائي ببطاريه ووصل ودروتها ورحتله وقالي المياه اللي فيها وحشه وغيرها وحطها علي الشحن وبص علي كل حاجه مفيش حاجه بايظه ولا لمبه مهيسه ومنوره علي طول

مش عارف بقي هتتظبط ولا لآ
ربنا يستر

**Land_Cruiser** · 09-06-2012 08:23 PM

المشاركة الأصلية كتبت بواسطة shaddadfalcon1

انا رحت جبت كهبرائي ببطاريه ووصل ودروتها ورحتله وقالي المياه اللي فيها وحشه وغيرها وحطها علي الشحن وبص علي كل حاجه مفيش حاجه بايظه ولا لمبه مهيسه ومنوره علي طول

مش عارف بقي هتتظبط ولا لآ
ربنا يستر

طيب يا رب تتظبط كده و لو انى حاسس من الاعراض دى ان البطاريه فيها ربع ضارب بس خللينا نشوف

**mama1979** · 10-06-2012 10:08 AM

لمعرفة اذا كان هناك تسريب ام لا ، قم بفك كابل الطرف السالب من البطارية ، ثم قم بعملية تلميس لهذا الكبل فى الطرف السالب ، فاذا وجدت حدوث شرارة فاكيد ان هناك شئ يستهلك البطارية ، واذا كان لديك علبة فيوزات قم بفك فيوز تلو الاخر ثم قم باعادة تجربة التلميس كل مرة حتى تعرف اى جزء فى العريية المسئول عن التسريب

**shaddadfalcon1** · 10-06-2012 01:59 PM

للأٍسف جيت ادورا لصبح لقيت البطاريه لسه مصحتش من النوم وزقيتها ودارت وحاسس اني هنزل من الشغل الاقيها نايمه تاني

**saadelden** · 10-06-2012 04:14 PM

قيس شحن الدينامو
لو مابيشحنش يبقى العربيه ماشيه ع البطاريه
و احتمال تاني يكون المشكله من المارش
نور النور العالي بالليل و دور العربيه , لو لقيت النور بيضعف جامد و العربيه مابتدورش يبقى بطاريه اكيد
لكن لو النور مابيضعفش يبقى فيه حاجه ف المارش

**shaddadfalcon1** · 10-06-2012 04:23 PM

الشحن كويس والكهربائي قاسه وتمام

هجرب موضوع النور العالي ده النهارده واشوف ان شاء الله

**Land_Cruiser** · 10-06-2012 06:59 PM

انا ما زلت شاكك ان البطاريه فيها ربع ضارب و لو غيرتها هات واحده جافه ايه سى ديلكو و أنساها

**shaddadfalcon1** · 10-06-2012 09:02 PM

عملتها تاني معايا وانا راجع من الشغل وزمايلي البنات جم معايا يزقوها ههههههههه حاجه تفضح

شكلها كده بطاريه فعلا وطبعا البشوات النهارده احازه وهضطر ازقها تاني الصبح واروح اغيرها

ياتري البطاريه ايه سى ديلكو بتعمل كام؟ واجيب طبعا ال 55 امبير صح ؟

العربيه لانوس 1