السلام عليكم
الحمد للة استلمت الداستر من حوالى عشرة ايام بعد اللانسر البومة الاتوماتيك و كانت اصيلة جدا طوال اربع سنين.
طبعا كنت خايف من المانيوال بعد الاتوماتيك لكن الموضوع طلع سهل و انا اصلا بحب السواقة المانيوال اوى.
فيما يلى ذكر بعض العيوب و المزايا للعربية حتى الان و دة تقرير مبدئى:
اولا العيوب:

الاشارات لا تحدد الاتجاة المطلوب فى التابلوة – يعنى عملت اشارة شمال زى يمين – فى الحالتين السهمين هينوروا مع بعض فى التابلوة.
صوت تنبية عالى فى حالة عدم ارتداء حزام الامان اول ما السرعة تعدى 20 و دة مش جميل لانك لو ماشى بالعربية مشوار قصير جدا فى شوارع داخلية – برضو هتضطر تلبس الحزام لان الصوت بيضايق و عالى – و طبعا الناس هتتريق عليك
اماكن زراير الزجاج فى التابلوة مش فى الابواب – دى مش مشكلة هتتعود عليها بس المشكلة ان الزجاج الخلفى زرايرة بالخلف برضو و بالتالى معندكش تحكم فية غير انك تمد ايدك ورا زراع الهاند بريك (هى سهلة بس محتاجة تعود).
العربية 6 نقلات و النقلات قصيرة جدا يعنى الاول يدوب يحرك العربية و التانى للعشرين و التالت للاربعين و الرابع لل 65 و الخامس بيفتح لل 90 و ممكن اكتر طبعا بس انا بقول ان دة فى التليين و بدون قرص على العربية و لفات الموتور متزيدش عن 3 او 3.5 زى ما الاخوة ملاك الداستر قالوا
المكان اللى بنحط فية السجاير و الولاعة تحت الكاسيت (زى اللانسر مثلا) مش موجود – انت عندك البابين فقط اللى تقدر تشيل فيهم حاجات كبيرة زى شنطة السيديهات و اى ملفات ورق مهم – الجرابين بتوع الابواب الصراحة كبار جدا و كمان درج التخزين اللى ادام الراكب اللى جنبى برضو كبير و اكبر من اللانسر
مافيش مسند بين الكرسيين (arm rest) و دة ياما تشترية جاهز ب 60 جنية ياما تعمل اختراع مستر بيبو اللى بيتفصل مخصوص فى جينز كار و دة احسن لانة بيفتح و بيشيل حاجات جوة (مساحة تخزين اضافية) و انا عملت زى بيبو و تبقى المشكلة اتحلت
فرش الفابريكة مش شيك اوى لكن طبعا كلنا بنركب الفرش و اللون اللى نحبة و لو فرش شيك هيظهر العربية اوى لان الصالون ما شاء اللة كبير
فى اللانسر ركبت و سافرت على طول و جبت 180 علشان شديت مع تيوتا و نسيت انى فى التليين – الداستر اعتقد لازم تلين زى ما قالوا كل الاخوة – الصوت بيعلى شوية فعلا لما لفات الموتور بتبقى عند تلاتة و نصف بس بعد كدة الصوت بيروح تانى و العربية جابت معايا 135 على عدد لفات قرب الاربعة و بعدين رفعت رجلى و هديت تانى – بس الصراحة العربية بتسحب و بتجرى كويس.
الفتيس حلو لكن الدبرياج بصراحة طويل و تعب رجلى الشمال شوية لما كنت فى القاهرة – يمكن يلين شوية مع الوقت.
استلمت العربية بدون طفاية حريق ولا مثلث عاكس و لا شنطة اسعافات رغم انهم كانوا نازلين مع اللانسر – طبعا عند الترخيص لازم تشترى الحاجات دى.
ثانيا المزايا:
زى ما النقلات القصيرة عيب لكنها برضو ميزة و بتدى عزم شديد جدا للعربية لدرجة انها فركت منى من غير ما اقصد لما رفعت الدبرياج فجأة – ملاك الداستر بيقولوا ان السحب بيزيد اوى بعد الالفين و اكتر بعد الخمسة مع الوضع فى الاعتبار ان السحب الحالى برضوا مرضى جدا على عربية بالحجم دة.
استهلاك البنزين رائع و كان 8.2 لتر و انا ماشى على سرعة 125 و دة تقريبا زى اللانسر او ازيد حاجة بسيطة جدا.
كمبيوتر رحلات مفيد جدا و بالذات للى بيسافر ذى حالاتى و بيدى معلومات عن متوسط السرعة – كام كيلو مشيتها من اخر تفويلة – كام كيلو مشى ناقص على البنزين ما يخلص – متوسط استهلاك البنزين على مشيك و سرعتك الحالية – بجد معلومات حلوة فى السفر.
العربية كبيرة و جميلة و ابعادها حلوة و مجال الرؤية جميل و الشنطة بدون طى الكراسى بتشيل كتير 475 لتر.
العربية اتزانها لغاية سرعة 140 و فى ملفات السفر كان جميل و كانت متزنة لابعد الحدود.
زجاج غامق ملون و بالترخيص.
فرامل قوية و كاسيت CD صوتة كويس – سماعة فى كل باب من الاربعة.
مش بتسخن خالص و مؤشر الحرارة دايما فى النصف لا بيزيد و لا بيقل مهما كانت العربية ماشية و لا واقفة (زى حرارة اللانسر بالظبط)
التابلوة مش جميل اوى بي مش وحش زى الناس ما كانت كاتبة.
دة تقييم اولى لغاية دلوقتى و لو ظهر اى حاجة مع الاستخدام هقولها و اللة بكل صراحة
مع الشكر