تعالو يافياتوية وتعالي يايوكو شوف تجربتي المريرة في البونتو واللي خلصتها بخراب جيوبي

السلام عليكم يا فياتوية هحكيلم اللي حصل معايا بالظبط من اول مركبتها واشتريتها لحد ماعطلت ولحد ماظبتها

انا اضطريت انزل سوق السيارات في يوم جمعة انا واخو زوجتي لشراء سيارة وفي جيبنا ٣٨٠٠٠ لمتهم بضرب النار المهم
لما لفينا في السوق جئنا نشوف سكودا فليشا طلعت كل اللي في السوق عربيات هلكانا ومواتيرها خفيفة ومفوتة انتقلنا للجولفات لقيتها معدية ٤٥ الف موديلات من ٣ الي فور ففي اخر المطاف وجدنا ظابط لابس لبس عادي راكب فيات بونتو هوا وحماه وقاعدين جوة العربية فكلمناه وسالناه علي سعرها قالنا موديل ٢٠٠٣ ماتور ١٣٠٠ تكيف باور سنتر ازاز كهربا
وطالب فيها ٤٢ الف راشه برا وفبريكة دواخل وماشية ١٠٠ الف كيلو واعجبت بها بسبب نظافة الرش الخارجي ونظافة السيارة من دواخلها وتابلوها وماشاء الله العربية من تحت مفيهاش خربوش وعفشتها تمام التمام من الاخر يعني استخدام مراته استخدام حريمي ويقطنو مصر الجديدة الكلية الحربية المهم خلصت معاه شرا العربية ووصلت سعرها معاه بالعافية الي ٣٨ الف جنيه اظن سعر ممتاز بالنسبة الموديل ده انا اشتريتها في اول شهر ٣ من السنة اللي احنا فيها
.يعني كنا في شتا جئت بقي بعد شهر من شراؤها اكتشفت ان العربية محتاجة اولسيه الكرنك الامامي كانت بتنشع زيت الموتور لما اروح بيها مشواير بعيدة والزيت كان سخن المهم اشتريت الاولسيه بتاعها الاصلي ب ٢٠ جنيه فرحت قولت يابلاش يا فيات وفرحت وروحت لميكانيكي وركب ياعم يحي وبعد مخلص كام ياريس قالي ٢٠٠ جنيه مصنعيه قولتله بصرعه ليه ليه قالي يا حبيبي فكيتلك قواعد وفتيس علشان اركبلك الاولسيه المهم قولتله هما ١٥٠ حلويين اوي طبعا كلتني رجليا اني أغسل الموتور وحوض العربية مكان شحومات الصنايعية ده الكلام ده اول شهر اربعة في غسيلها بعديها بخمس ايام اشتدت حرارة الجو الصيف بيهل وبدأت اذهب بها مشواير في عز الظهرية امشي بالعربية مشوار مثلا ٤٠ كيلو والاقي العربية وانا سايق علي الطريق تبطل مني نهائيا ارمي علي التاني علشان تدور لكن دون جدوي
ركنت علي جنب ادور اعربية انها تدور مفيش قطعت كهربا بس التابوه قاري جميع اللمض والتشيك بتاع الموتور شغال عادي والبطارية سليمة وحرارة الموتور في المعدل الطبيعي بتاعه أسيبها حوالي ربع ساعه علي الطريق وبكون سايب الكبوت مهوي العربية واجي ادور العربية تدور تاني وتكمل برده المشوار ٤٠ كيلو وتبطل نفس الحركه تاني المهم روحت اوماترا وركزو معاي في فشل اوماترا الذريع فرع جسر السويس سوق القنال روحتلهم وحجزت طبعا قبليها بيوم وقولتلهم البقين دول بس لاني لو اتكلمت كتير معاهم هيقولو ده عايز العربية ترجع جديدة كمصنعها قولتلهم ان العربية أركبها الصبح بمشي بيها ٤٠ كيلو تبطل بدون اي سبب فقالي المهندس طارق الموشمهندس بتاع اوماترا انها تخش كومبيوتر كشف ب ٢٠٠ جنيه قولتله حرام ده كتير السعر ده للكشف المهم وصلتها معاه الي ١٥٠ جنيه لاني حطيته في الامر الواقع معيش غير ١٥٠ وتوكلت علي الله وافقو وبعد استراحتي ٣ ساعات جابولي الريبورت بتاع العربية وجاب الموشمهندس طارق الورقة وقراهالي بيقولي العربية محتاجة طقم سلوك بوجيهات وبوجيهات اورجنال وحساس شكمان ومرمة ضفيرة قولتله بكام ياعم قالي اظبر ربع ساعه أعملك مقايسة بسعرها انتظرته نص ساعة ملطوع واقف ورجع قالي ١٨٠٠ جنيه بالمصنعية والحاجة قولتله سلام عليكم مشيت دماغي وجهتني لواحد زميلي في الحرفيين القاضي بتاع قطع غيار أودي قالي اللي ودام التوكيل دول ولاد تيت عايزيين. يقبضو وخلاص وفعلا زي ماقال زميلي لي وقالي تعالي اوديك لزميلي خبير موديلات البونتو كشف الراجل بالكمبيوتر وقالي بروسيسور الكونترول عندك مش طبيعي قدامي علي الجهاز قولتله ليها حل قالي اظبر كده جرب سلوك البوجيهات كلها تعمل مئة بالمئة جرب بوجيهات اورجينال والمباين ودخل ناحية الرشاشات ولقي واحدة مكسورة من فيشتها فرح قالي هو ده عيب التبطيلة اللي بتيجي في عربيتك فرحت انا كمان وقولتله امين اجيبلك رشاش استيراد واجيلك جبتله طبعا وركبناه وقالي جرب مشوار اربعين كيلو جربت وبردك بطلت كلمته قالي تعالي ده شكله حساس الكرنك ريحت العربية شوية ودارت وروحتله قالي هات حساس استيراد جبتله حساس وبردك العربية بتبطبل ولما زهق الراجل قالي من الاخر هتجيب كونترول بطقم دواره والعربية ديه يستحيل تبطل منك تاني جريت للاسكندراني محل قطع غيار بونتو استيراد قالي عندي طقم الدوارة بالكونترول ب ١٨٠٠ جنيه مينزلوش قرش طبعا اتكهربت من السعر ده وجيوبي بتودع اتمسكنتله وقولتله غالي عليا اوي مفيش حل ياحاج قالي هريحك خد الكونترول ب ٤٠٠ وروح برمجه عند الهامي فرحت اوي بالسعر ده وروحت لالهامي علشان اكود الكونترول الهامي صرعني بسعر البرمجة كأني دخلت جهنم قالي البرمجة ب ٥٠٠ جنيه.قولتله بحرقه ليه ليه غالي اوووووي قالي مش هتلاقي غيري وانا الوحيد المبرمج للكونترول بتاعك المهم حاولت معاه اني انزل شوية وصلت الي ٤٥٠ وفعلا الهامي برمج الكونترول في العربية في مده لاتقل عن ٣ دقايق ودور العربية دارت وقالي انطلق بيها وجرب وفعلا تخطيت ال ٤٠ كيلو ودخلت في زحام والعربية ماشاء الله مازالت دايرة وماشاء الله الموتور ظبط احسن من الاول في كل حاجة في الدفع وعدم البرجله والصوت هادي تماما رجعتله ضربتان نااااااار بصوت عالي وقولتله رووووووح الله يباركلك في دنيتك واخرتك بفرخة شديدة وماشاء الله بقالي يومين بمشي بيها في الزحام الشديد والمسافات البعيدة تعمل العربية بامتياز فوق الوصف وعلشان أعرفكم ان شركة فيات حقيرة كلتني دماغي اني إفك الكونترول القديم بتاعها واعرف العيب من فين
اتاري الشركة مبرشمة الكونترول لو فكيته هيدمر خالص وانشاء الله هرفعلكم صور الكونترول القديم بعد فكه غدا
إليكم مصاريف العذاب اللي صرفتها عليها من اول عيب الي اخر عيب
٢٠٠ مصنعية تغيير اولسيه كرنك
١٥٠ كشف توكيل اوماترا
١٥٠ جنيه حرفيين تركيب رشاش مكسور وكشف اعطال بالكمبيوتر طبعا خد مني كتير علشان قولتله اني دخلت التوكيل
٤٠٠ كونترول استيراد بدون طقم الدوارة وفيه ناس هنا بتقول مينفعش الكونترول يركب لوحده بس .الحرفيين كلها مافيا الاكواد وفك الشفرات!!
.٤٥٠ برمجة الكونترول في دقيقتين فقط ده انا بفكر اني اشتغل في المشروع المربح ده ههههههههههههههههههههه
اجمعو انتم بقي اللي صرفته انا لاني فاشل في الرياضة وخلو بالكم بس من الاعضاء يقولي هو ده صرف من اللي صرفته أقوله حاسب انا متجوز وعندي اطفال والتزامات وديون واكيد كلكم عارفين بلاوي بعد الجواز يعني الواحد متلثم
عايز اسمع تعليقاتكم في الكابوس المرير اللي كنت فيه واتمني ان تكون استفدتم من الموضوع وفي النهاية اقول الحمدلله علي هذه النعمة. وشكر خاص للاخ يوكو وباقي الاعضاء لتفاعلهم معي في استفساراتي بالمواضيع السابقة

اعذرني العيب مش في العربيه...انت ليه تجيب عربيه من السوق الزباله ده..'وبعدين ماشيه كتير ومستهلكه....عموما ربنا يقويك وان شاﺀ الله كله يبقي تمام...استني اراﺀ الاعضاﺀ

يااااااااااااه ربنا يصبرك ... غير المصاريف طبعا لازم تقدر التعب واللف والدوران والمجهود والمناهدة ... بس الحمد لله على كل شيء وان شاء الله اخر الأعطال

الله يكون في عونك ...............انا كرهت ماركة الفيات كل الصنايعية وبتوع الاستيراد حرامية
دة حتى متهيألي بتوع الغسيل بعد كدة لو عرفو الاسعار اللي الناس دي بيعاملونا بيها هيجي بعد كدة يقولك غسيل العربية بـ350 جنية علشان خاطرك انت بس وابقى راضي الرجالة.
حسبي الله ونعم الوكيل.

فيات اضربت يا رجاله الله يرحم ال128 وال131
تشقلطها واقلبها ب500 جنيه

الخلاصة ...أوماترا مالهمش فيها تماماً و موضوع الكنترول ده أظن انه بسبب الغسيل والله أعلم , و ده بيكون نوعه ماريللي في البونتو هي أه شركة تبع فيات بس بينزل في عربيات أوروبي كتير جداً و الحاجات دي معقّدة جداً عشان كده بتبقى مبرشمة و 100 ألف كيلو مش كتير ولا حاجة أنا ليا واحد صاحبي عربيته ماشية 206 و ما شاء الله زي الفل عشان بيحافظ عليها ... و في واحد معانا هنا معاه باليو 1000 سي سي موديل 2007 و ماشي 170 و ما شاء الله برده... أهم حاجة انك كشفت على العربية كويس دلوقتي و كل حاجة فيها سليمة....بس اهتم بالصيانات الدورية الطبيعية في معادها و العربية عمرها ما حاتخذلك و بلاش موضوع غسيل الموتور بالميه أو الجاز و الزيت و الكلام الفاضي ده....في نوعين غسيل موتور...spray و foam هما غاليين شوية بس دول اللي حينضفوا بجد و يحافظوا على العربية... و ربنا يباركلك فيها و تسعدك...

اشكركم جميعا علي ردودكم والحمدلله علي كل شئ

عيب البونتو الوحيد هو الكنترول يونت لانة مش معزول كويس وموجود فى مكان جوة العربية اقل ما يقال انة غريب ومش منطقى فوق الماتور وتحت العمة فية حاجة كمان حساس الهوا متبرشم فى البوابة يعنى لو باظ هتغير البوابة بلكامل
نصيحة اوعى تغسل الماتور بعد كدة وخصوصا والعربية سخنة

قدر الله وما شاء فعل
حاول متكرهش العربية

معلش, حاجة واردة فى أى عربية مستعملة ختى لو فيراري
إن شاء الله تبقى أخر الأعطال

فى معلومه عرفتها عن البونتو عشان الكنترول ما يبوظش البوجيهات الاصلى تظبط على الكنترول مش اى بوجيهات عشان المدى الحرارى

الله يكون فى عونك . مش المصاريف بس اللى انت صرفتها

كفاية حرقة الدم والمشاوير دى

ااااااه من البونتو

انا العربيه دي طلعت عيني
8 سنين كانت ماشيه زي الفل

ومره واحده فتحت بقها طلعت عيني وتعبتني فبيعتها على طول

الفيات لما بيفتح بينطح

اقتباس:

---

المشاركة الأصلية كتبت بواسطة dr.a.nabil

ااااااه من البونتو

انا العربيه دي طلعت عيني
8 سنين كانت ماشيه زي الفل

ومره واحده فتحت بقها طلعت عيني وتعبتني فبيعتها على طول

الفيات لما بيفتح بينطح

---

+1111111111111111111111111111

يا جماعه صدقوني بجد الكوري جامد جدا ههههههههههه

الحق بيع يا عم وهاتلك حاجه كوري هتلاقي قطع غيارها في السوبر ماركت ههههههههههه

شوفتو الفيات بتعمل في الواحد ايه!!!!

طيب سؤال
هو الكونترول اللى فى العربية مينفعش يتبرمج من اول و جديد ؟؟

مكنش حد غلب انا فكيته ولاقيت وحدة الميكروبروسيسور فيها لسعة يعني شياط في البروسيسور فهيتبرمج ازاي من اول وجديد صعبة جداً

حمد الله على السلامه وللأسف الكونترول إحتمال كبير يكون ضرب بسبب غسيلك للموتور

فعلا يا ويزا الكوري متوفر في السوبر ماركت نفسي ابيعها وأجيب فيرنا لكن مشكلة البونتو عربية جميلة في السحب وتوفير البنزين والباور الجميل اللي يخلي طفل يلف الدركسيون بصباعه والتكيف بتاعها جميل ومشكلتها قطع غيارها في العالي ليه مش عارف هيا فيات خلاص بقت زي الالماني ولإضافة نفسها شوية؟.

فعلا يا يوكو هو ده اللي انا استنتجته من غسيلي للعربية لاني مدمن نظافه لكن الواحد أتعلم اللي يتلسع من الشربة ينفخ في الزبادي

طيب ياجدعان اعمل ايه في الشتا من المطرة وكده ما اكيد العربية هايطولها ماية لجوة ولا انا غلطان يا جدعان ارجو التفاعل في الموضوع ده

اصل العربية عندى بتعمل حاجة غريبة اوى(مش دايما بتعملها برضه)
لما بدوس على الدبرياج علشان انقل الاقى العربية اكنى دايس على البنزين و الار بى ام بيعلى جدا لغاية ما انقل و اشيل رجلى من على الدبرياج و ادوس بنزين
كمان لما ابقى راجع من الشغل فى الحر ده الحرارة بتعلى بعد النص بشرطتين كده رغم ان المايه مش بتنقص ولا حاجة بس هى الميه مش بتبرد رغم ان المروحة شغالة كويس على الدرجتين
اصلى ساعات بنزل الصبح الساعة 7 بعد ما اركنها مثلا من الساعة العصر 5 اليوم اللى قبلها وا احول افضى الهوا السخن من المسمار الصغير اللى فى الريداتير الاقى المايه سخنة !!!
فعندى احساس برضه ان المشكلتين دول من الكونترول لانى كنت فاكر ان مشكلة الدبرياج دى بوابة بش شكلها مش كده .. برضه جربت حساس الكرنك مطلعش هو

اقتباس:

---

المشاركة الأصلية كتبت بواسطة torky85

اصل العربية عندى بتعمل حاجة غريبة اوى(مش دايما بتعملها برضه)
لما بدوس على الدبرياج علشان انقل الاقى العربية اكنى دايس على البنزين و الار بى ام بيعلى جدا لغاية ما انقل و اشيل رجلى من على الدبرياج و ادوس بنزين
كمان لما ابقى راجع من الشغل فى الحر ده الحرارة بتعلى بعد النص بشرطتين كده رغم ان المايه مش بتنقص ولا حاجة بس هى الميه مش بتبرد رغم ان المروحة شغالة كويس على الدرجتين
اصلى ساعات بنزل الصبح الساعة 7 بعد ما اركنها مثلا من الساعة العصر 5 اليوم اللى قبلها وا احول افضى الهوا السخن من المسمار الصغير اللى فى الريداتير الاقى المايه سخنة !!!
فعندى احساس برضه ان المشكلتين دول من الكونترول لانى كنت فاكر ان مشكلة الدبرياج دى بوابة بش شكلها مش كده .. برضه جربت حساس الكرنك مطلعش هو

---

مشكلتك الاولانيه عيب بوابه غالبا
مشكلت السخونيه أخر مره غيرت ميه التبريد إمتى؟

انا بحط ميه عادية مش خضرا ولا حمرا
انا تقريبا كل جمعة بنزل قدام البيت افتح المسمار ده و ادب خرطوم المايه فى الردياتير علشان المايه تتغير كلها

لأ نزل الميه كلها ونضف الدورة وحط ميه خضراء لإن الميه العاديه بتبهدل الدنيا

انا تقريبا كل جمعة بنزل افتح المسمار ده و ادب خرطوم المابه قى الردياتير علشان المايه كلها تتغير .. مبحطش مايه خضرا ولا حمرا :)
هو فى حاجة برضه يا يوكو انا مرة روحت لتوكيل روكسان ده لغوا لى الوصلة بتاعه التكييف السخن علشان موضوع السخونية ده(مع العلم برضه ان فيها مسمار تانى لاخذ الهواء السخن) .. الكلام ده صح ولا ايه ؟

مش هتفرق وسؤال مع التكيف درجة حرارة العربيه بتنزل؟

لا بالعكس بتعلى شرطة او اتنين كمان .. مع ان حسب معلوماتى ان مع التكييف بتبقى المروحة شغالة على طول على السرعة التانية

سؤال كمان المايه الخضرا اللى فى مصر الانتاج الاوروبى الناس بتقول انها معمولة لحرارة اوروبا و فى ناس بتنصح بالمايه الخضرا اللى مصنعة فى الدول العربية .. ايه رأيك ؟

ميفرقش جيب حاجة تركزها 50%
وكده سويتش المروحه عندك الي بيشغل الدرجة التانيه بايظ

الحمد لله انها اتظبطت في الاخر

انتم هتخوفوني ليه ايه حكاية البوابات كمان بتبوظ وتتغيير وفيشيتها بلت ان كمان لا لا لا حرااااااااام بجد انا اللانسر البوما اللي كانت معايا برقبت جميع الملل اللي في السوق لكن أديت العربية لاخويا بوما ٢٠٠٨ أوتو ١٦٠٠ هاف سبورت اقسم بالله العربية ديه لم تشتكي يوما او هانيتني يوما الله اكبر عليها وعاملة مع أخي الان ٢٥٠ الف كيلو

ربنا يكون فى عونا من الصيانات والتوكيلات التعابانة بتاعتنا دى
الواحد مش عارف يعمل أيه

المفروض إنهم يوجهونا نصيون العربيات إزاى

مش يعزبونا علشان تبوظ مننا ونضطر نروحلهم كل شوية

حسبنا الله ونعم الوكيل

:hitwall3:

الفيات من وجهة نظر الألمان
F I A T
F= Fehler يعني غلطة او خطأ
I=IN يعني في
A=alle يعني كل
T=Teil يعني جزئ
المحصلة (غلطة في كل جزئ) ودة كلام الألمان مش كلامي
شكرا طارق اسيوط

اقتباس:

---

المشاركة الأصلية كتبت بواسطة yoko

ميفرقش جيب حاجة تركزها 50%
وكده سويتش المروحه عندك الي بيشغل الدرجة التانيه بايظ

---

الدرجتين شغالين زى الفل يا يوكو
الاولى بتشتغل عادى لغاية نص الحرارة و اول ما تيجى على سنة صغيرة التانية تشتغل لحد ما الحرارة تظبط بعدين الدرجة الاولى تشتغل تانى !!

اقتباس:

---

المشاركة الأصلية كتبت بواسطة opensky

انتم هتخوفوني ليه ايه حكاية البوابات كمان بتبوظ وتتغيير وفيشيتها بلت ان كمان لا لا لا حرااااااااام بجد انا اللانسر البوما اللي كانت معايا برقبت جميع الملل اللي في السوق لكن أديت العربية لاخويا بوما ٢٠٠٨ أوتو ١٦٠٠ هاف سبورت اقسم بالله العربية ديه لم تشتكي يوما او هانيتني يوما الله اكبر عليها وعاملة مع أخي الان ٢٥٠ الف كيلو

---

كلمة حق
البونتو دى احسن من عربيات كتير ركبتها حتى اللانسر
يعنى عمرك ما هتلاقى نعومة احسن منها و لا فرامل زى اللى فى البونتو و كله كوم و السيتى باور ده متعة تانية خالص
بصارحة عجبتنى اكتر من اللانسر و التكنولوجيا اللى فيها اعلى من اللانسر كمان هو الجو عندنا بس اللى مش ماشى معاها :)

اتفق معاك ياتركي هيا جميلة بمعني الكلمة فرامل وباور وموتور ناعم فعلا بس توكيلاتها خلونا نكرهها هيا وقطع الغيار هي بلدك كده تحتكر وتكرهك انك تركب عربيات وشكرا ليك ياتركي لتفاعلك وانضمامك في المواضيع معانا

اقتباس:

---

المشاركة الأصلية كتبت بواسطة opensky

انتم هتخوفوني ليه ايه حكاية البوابات كمان بتبوظ وتتغيير وفيشيتها بلت ان كمان لا لا لا حرااااااااام بجد انا اللانسر البوما اللي كانت معايا برقبت جميع الملل اللي في السوق لكن أديت العربية لاخويا بوما ٢٠٠٨ أوتو ١٦٠٠ هاف سبورت اقسم بالله العربية ديه لم تشتكي يوما او هانيتني يوما الله اكبر عليها وعاملة مع أخي الان ٢٥٠ الف كيلو

---

مش ملاحظ ان حضرتك بتتكلم عن البونتو كأنها بتعمل معاك كده و هي زيرو مش كأنك جايبها استعمال ؟؟ :brn: وجهة نظري ان حضرتك تقول الحمد لله على اللى صرفته لأن في ناس بتصرف اكتر من كده بكتيييير
و زي ما الناس قالتلك "حاول متكرهش العربية"

حصل خير يا باشا و فعلا زي ماالشباب قاله ممكن تحصل في اي عربية بس الحظ العاثر في مصر .. في 3 حاجات :
1. التوكيل حرامي و بيقلب
2. ندرة الفنيين الي بيفهموا في الفيات
3. ندرة مستوردي قطع الغيار نسبيا (عن الماركات الاخرى) ولو لقيت حيسلخك علشان مفيش غيره :)

momken asm elmikaniki elly fy el7erfayeen we rakm telefonoh law sma7t

الاخ سمسم وجهت نظر حضرتك اني اقول الحمدلله ف انا قولت الحمدلله

والأخ بوبوس عنيا كروت الميكانيكية اللي في الحرفيين ناسيها في الشغل اوعدك اكتبهالك غداً انشاء الله