السلام عليكم
يا شباب انا عايز اشتري عربية اول استرا 2001 ايه رايكم فيها انا حاسس ان الماتور بتاعها خفيف عليها اوي علما اني انا مشاويري بعيدة ياريت لو حد يعرف هي كام حصان.
عرض للطباعة
السلام عليكم
يا شباب انا عايز اشتري عربية اول استرا 2001 ايه رايكم فيها انا حاسس ان الماتور بتاعها خفيف عليها اوي علما اني انا مشاويري بعيدة ياريت لو حد يعرف هي كام حصان.
شوف يا باشا..
في رأيي المتواضع..
الموتور مش ضعيف عليها طالما انت مش بتحرق علي العربية..
و برضه الموتور ده الماني.. يعني هيستحمل معاك جدا حتي لما تقرص عليه..
بس هي ثباتها حلو قوي علي كلام الناس اللي امتلكوها..و برضه بتجري و كده عادي جدا..
بس مش بتجمع بسرعة زي الكورسا السيدان مثلا..
وبرضه التكييف بيأثر علي سحب الموتور شوية..
في احتيار تاني متاح بسعر قريب قوي من الاسترا اللي انت عايزها..
وهي الكورسا السيدان..
1600.. و كاملة.. و بتجري جدا.. و قليلة الاعطال بنسبة كبيرة..
و ثباتها معقول جدا.. و موديل هيكون احدث بكتير.. يعني 3 سنين عل الاقل..
فكر كده و برضه اسأل حد امتلكا هيفيدك اكتر من كلامي انا..
واكيد اللي يعرف حاجة فينا هنا هيقولك و يفيدك ان شاء الله,,
عزيزي الفاضل بالنسبة للأوبل استرا موديل ال 2001 ال 1200 Cc هي كعربية تأفيل ممتاز جدا والعربية ماشاء الله على ثباتها ماحدش يقدر يختلف عليه وكل حاجه متأفله زي مالكتاب بيقول ,يعنى انسى عيوب التأفيل المصري اللي ممكن تلاقيها في اي عربية تانية .
انا كنت هشتري العربية دي بس فعلا لما جربت العربية بالمناسبة العربية كانت فابريكة بره وجوه وحاله الموتور ممتازه , حسيت ان العربيه سحبها ضعيف جدا وخصوصا لو شغلت التكييف بياخد وقت طويل على ما يسقع العربيه وخالي بالك الأوبل عموما ماشاء الله صاجه تقيل و جامد .
انا عن نفسي مفكرتش فيها كثير لأن معظم مشاويري طويله وبأحتاج التكييف علطول في الصيف .
لو انت عايز عربيه للسفر الكثير والمشاوير الطوالي وانت مشغل التكييف بلاش ال 1200 سي سي خليك في حاجه 1600 اكيد حتسد في السفر الطويل احسن من 1200 سي سي وخصوصا ان الماتور صغير على حجم العربيه .
ولو هتفكر في الكورسا انا اقدر افيدك لأني معايا وحده .
طيب كلام جميل قوي..
ممكن بقي تقييم كامل و شامل للعربية دي؟؟
عشان انا باحبها.. و احتمال يبقي في قدامي واحدة كويسة..
هو انا نش عارف اقول رأى على هيئه تقييم....
و يمكن كمان شهادتى فيها تكون مجروحه
ممكن Ruin Scud يبقى حيادى و يقولوكو...
بس انا اكتر حاجه عارفها عن العربيه انها مجرمه..
انت ممكن تستخدمها عادى انما لو سواقتك جرى و حرق
فبلاش العربيه ديه... لان متورها اقوى من حجمها بكتير.
اذا فى شىء معين عايزين تستفسروا عنه اسأل و احنا موجودين.
يعنى اجاملها زياده عن اللزوم
لأ جامل ولا يهمك.. بس احنا هنعرف نميز ايه فيه مجاملة و ايه واقعي..
و بعدين تحري الحياد..
:) :) :) حلوة تحري دي..
الواحد قلبت معاه بفصحي اليومين دول..
الظاهر الواحد ودانه نضفت من الفرجة علي المعلقين بتوع الجزيرة.. :) :)
يا أحمد بك العربيه دي جريئه جدا وزكيه
فول اوبشن وايموبلايزر ومرايات كهرباء
التكييف جامد بجد يعني ثلاجه
الجري مش هقول عليه كلمه بس فعلا عربيه مجرمه مجرمه زي م Ashour بك قال
الصاج تقيل يعني ثقيييل العربيه وزنها 1200 كج تقريبا
وطبعا من تحت العربيه من قدام في تصفيح ممتاز للموتور من تحت مقفل العربيه كلها متشوفش حاجه من الموتور الصاجه دي متينه جدا يعني لو شلته بأديك هتعرف
وبالنسبه للثبات اللي يقولك ان ثباتها وحش اقوله انت مش من ملاكها
العربيه دي لما بتزود سرعتها بيزيد ثباتها وخصوصا بعد 140 كم انا جربتها مره وحده بس كان الطريق فاضي لأني مش من هوات الجري يعني اخري 120
اسمع ان الأسطوانه والدسك بيبوظو بسرعه ده بالتأكيد عشان الشد والجري لأن العربيه مساعده
الصالون من وره يعني ديق شويه لو ثلاثه رفيعين يقعدو مستريح انما لو احجام خاصه صعب
بالنسبه للعفشه العفشه ناشفه شويه وده عشان الثبات بس اطمن مفيش مطب حيخوفك تعدي من عليه
وعموما العربيه معايا لو عايز تجرب وتعملها Test Drive انا تحت امرك
اهلا بيك يا باشا..
انا عارف انها كاملة ..
يعني ما شاء الله مفيش اوبشن مش فيها غير يمكن مثبت السرعة..
و بيتهيألي عيبها الوحيد في نظري.. ان مفيهاش ايه بي اس.
انا تعليقي بس الوحيد بالنسبة لمموضوع الاسطوانة و الدسك..
الموضوع ده مالهوش علاقة بالشد و الجري خالص..
ده عيب بيبقي موجود في حاجة في طقم الدبرياج..
و اللي عرفته من اسطي ميكانيكي كان شغال في مقار لحد شهر واحد فات بس..
ان في تعديل صغير كده بيتعمل..
تقريبا بتتغير بلية دبرياج او حاجة من هذا القبيل..و انساها علي كده..
وقالي بالنص.. العربية لو في الضمان بتتعمل اول مرة علي حساب التوكيل و خلاص علي كده..
ده بالنص اللي اعرفه عن الموضوع ده..
انا موضوع التست درايف ده ربنا يهل لما نتقابل بقي ان شاء الله..
والف شكر يا باشا علي التقييم الجامد جدا..
فعلا انا اخر سرعه بجبها و انا مطمئن 140
بس انا برده مش من هواه السرعه الزياده عن 120
بالنسبه للاسطوانه و الديسك انا دلوقتى 70000 و اهو يدوبك بيبتدى يشتكى.
عايز ازود مساحه الشنطه كويسه جدا..
اما عن مقارنتها بفئتها هتلاقى..
اليارس و الكليو و الفيرنا و الريو و الويرا و ....
معظمها بيترواح من 75 الى 80
اعتقد هى احسنهم و اللى بترتقى للمنافسه معاها هى اليارس بس... (عشان الاتوماتك:mad:)
والله يا عاشور بك..
بيتهيألي عشان اول مرة بس داخلة في 70 الف بس الاسطوانة..
بس لو غيرت قريب.. ممكن تعكمل معاك الطبيعي بقي بعد كده اللي هو 100 الف و انت طالع ..
ممكن تعدي ال130 الف كمان....
انا لسة مغير علي 130 الف و كانت بتاعت الفابريكة.. و كانت علي استخدام وحش جدا كمان بتاع المالك اللي كان قبلي للعربية..
هو و بنته.. :)
اما بالنسبة للفئة اكيد هي تكسب بمراحل.. وعلي فكرة.. معلومة حلوة بيقي هتعجبك..
العربية دي متوفر ليها في السوق الاستيراد.. فتيس ايزي ترونيك اوتوماتيك يا باشا..
بيتباع بالكنترول بتاعه بكل حاجته و علي حد علمي مش غالي كمان..
لأنه كان بينزل في النسخة الالماني للعربية دي اللي هي الهاتش باك اللي نزلت في اوروبا..
بالمناسبة.. اخر سعر للعربية دي في السوق زيرو كان كام..؟؟ 75 تقريبا ولا اكتر..؟؟
كانت مع واحد قريبى وكانت اوتوماتيك كان عيبها الوحيد موتورها علشان 1.2 والعربية تقيلة وبالذات لو مشغل التكييف ومحمل او طالع مطلع (هو كان استخدامة تقيل شوية وممكنن بيدخل بيها فى حتت مكسرة وفى اماكن فى الجبل حسب طبيعة شغلة) وكان بيسافر كتير ومشتكاش منها فى سفر لأن طريق مفتوح هتجمع براحتك
بعدها جاب صنى مستحملش غيرها باوكتافيا A4 بس على كلامة احسنهم الاسترا بس لو موتور اشد
عزيزي الفاضل انا اعرف دكتور صيدلي حبيبي معاه العربيه ديه وعامله 120000 كم ولسه هيغير اسطوانه الدبرياج وكمان العربيه عربية شركه يعني الشركه هي الي مسلمنهالو وبيمشي بيها زي ماتكون عربيه ملاهي طول اليوم لف مابيرحمشي وفي وسط البلد !!
بالنسبه لسعر الكورسا كان 77000 جنيه الكلام ده أول لما نزلت بس الفتره الأخيره منها يعني في اخر 2006 سعرها وصل 82000 جنيه لأن العربيه كانت صعب أوي تلاقيها زيرو وكانت نادره
والكلام ده من معرض الغلبان اللي عند المظلات لأني كنت سألت عليها زيرو بس لونها كان أسمر ودلوقتي مش هتلاقي منها زيرو ممكن كسر الزيرو اللي لسه في الضمان لو حالته تمام ومكملش 15000 حتلاقيها مش تقل عن 70000 جنيه ده لو العربيه فابريكه برة وجوه ومفيهاش مشاكل ولسه في الضمان وزي ماقولت يكون اقل من 15000 كم
أما بالنسبه للفتيس الأوتوماتك بصراحه انا مابحبش ابدا سواقه الأوتوماتك وحرام اني اغير فتيس في عربيه زي كده واجيب ليها حاجه استيراد و اعدل على كونترول العربيه والله اعلم بالأستيراد
اما بالنسبه للياريس الياريس 1300 سي سي الأوبل 1600 سي سي
Ashour بك ازاي قدرت تعرف ان العربيه عندك هتعوز ديسك واسطوانه ايه الأعراض اللي عندك وشكرا جزيلا
حاجه كمان اخبار علبه الدركسيون في العربيه ايه فيها مشاكل لأني لسه مغيرها هي وكام حاجه كده في الضمان ايه الأخبار ؟
هو علي فكرة غالبا العيب اللي كان عندك ده حاجة فردية جدا..
لأني مسمعتش عنها في الموديل ده خالص..
بسيطة يعني.. مش متكرر كتير..
و برضه موضوع الفتيس ده.. مش في كل العربيات..
في عربيات بتغير علي كم قليل..
وفي منها مش بتعمل اي مشاكل
في واحد صاحبي عامل بيها 110 الف في 4 سنين.. و مغيرش اي حاجة..
الصيانات و خلاص..
يا اما تكون اتعملت في الصيانة في الاول و خلاص. اتعدلت المشكلة..
هو بصراحه انا اول مرة اتحط فى موقف طقم الدبرياج و مشاكله فده كانت توصيه من احد اصدقائى لم سمع صوت فى العربيه قلى انت تقريبا فى حاجه فى طقم الدبرياج عندك بس مش عارف احدد اذا كانت صغيره و لا كبيرة..
بس عمتان اشهر الاعراض بيبقى ضعف شديد فى سحب العربيه..
و موضوع الدركسيون انا كنت قريت موضوعك بس معرفتش افيدك لانى بعد ما قريته حبيت اركز فى اللفة الاولى و انا طالع مكنش فى حاجه من الاعراض اللى انت كنت كتبتها.
انت عرفت تمن علبه الدركسيون؟؟؟
ايوه ياباشا علبه الدركسيون في التوكيل بتعمل 4000 جنيه !!ده من غير العمود والإستابليزر اللي في الجنبين ودول اللي اتغيرو عندي وهو طبعا لما لقاني قرفان من العربيه وقولتله انا مش عايزه وعرفته اني دايخ في المشكله دي قالي انا هخليك تنسا الموضوع ده تماما وفعلا الراجل عمل الواجب وزياده
الحمدلله اني لحقت اعملها وهي في الضمان
بص جرب تدي العربيه غيار عالي يعني الثالث مثلا الكلام ده والعربيه واقفه وبعدين شيل رجلك من على الدبريج سنه سنه من غير ماتدوس بنزين لو العربيه بطلت يبقى إن شاء الله الدبرياج تمام لو مشيت يبقى ممكن فيه مشكله وده برده على اد علمي في الموضوع ده بس جرب مش هاتخسر حاجه
أحمد بك الله يطمنك لأن زي ما انت شايف ثمن العلبه غالي فكنت خايف لحسن تكون العربيه دي فيه مشكله في العلبه ولا حاجه , ربنا يطمنك يا عزيزي