الموضوع: تجربة قيادة رياضية لBMW E46 مع سوست Merwede

من حوالى اسبوعين جبت لصديقى احمد الزرقانى طقم سوست سبور لعربيتة الE46 لان العربية كانت بعفشتها الاصلية و كانت السوست فيها تعبانة و العربية بتتمرجح شويتين فى الملفات ومع مطبات الهوا و احمد عايز يحسن الثبات و الhandling بتاع العربية بشكل كبير فا جبتلة الطقم دة من واحد معرفة بيصفى محل اكسسوارات بسعر كويس و كان عندة طقم لل46

يوم الجمعة اللى فات راح للميكانيكى عشان يركب السوست و بعد التركيب كان اول انطباع ان العربية وطيت على الارض... دة طبعا طبيعى مع اى سوست سبور لان جزء من شغل السوست دى بيعتمد على تخفيض مركز ثقل العربية و دة بيفرق جدا جدا فى الملفات

دى صور لعملية التركيب و الفرق بين السوست الاصلية و السبور:

سوست امامى


سوست خلفى


قبل و بعد امامى


قبل و بعد خلفى


القلق بعد التركيب كان من المطبات الصناعية الغبية اللى فى البلد و الحك فى جسم العربية... طبعا عشان العربية وطيت الموضوع بيحتاج حرص مع المطبات القصيرة و لازم تتخاد بزاوية... غير كدة المطبات الطويلة بتتاخد عادى لان السوست مش بتسمح ان العربية تهبط جامد لما تنزل من على المطب فا مفيش منها خوف

كمان كان فيه بعض التخوف من ان العربية تبقى ناشفة بزيادة و متعبة زى ما هو متعارف الا ان العربية كانت طبيعية خالص و متحسش باى نشوفية الا لو اخدت مطب جامد و حتى هنا مبتحسش انك اتهبت جوة العربية لكن بتحس ان العفشة ناشفة سنة و بتنقل جزء من الصدمة للركاب... الكلام دة طبعا مقارنة بعربية كان فيها سوست مقصوصة و انا سوقتها و كانت ناشفة بغباء جدا لدرجة انك لو دوست على جنية فضة فى الارض ممكن تعرف انت دوست على الناحية الملك ولا الكتابة من كتر ما العافشة ناشفة جدا

امبارح كان موعد التجربة فى الجرى و القيادة الرياضية عشان نشوف الفرق بين اداء العربية بالسوست العادية و السوست السبور... التجربة كانت فى اماكن متطرفة من مدينة الرحاب و حوالين المدينة... بداية التجربة كانت الميدان الكبير اللى بعد بوابة 6... الميدان عبارة عن صينية كبيرة و العربيات هناك مش كتير فا قررنا نشوف مدى تماسك العربية فى الصينية دى قد اية...

الاختبار بداء من حوالى سرعة 40 و فى اقرب نقطة للرصيف بتاع الصينية (اضيق ملف فى الميدان) و فضلنا نزود السرعة مع ملاحظة تماسك العربية و حفاظها على نفس الخط... احنا فضلنا نزود السرعة لحد ما وصلت الى 70 كيلو و العربية ما شاء الله لا بتميل ولا بتتطوح نهائى كما لو كانت ملزوقة فى الارض

المشكلة الوحيدة ان العربية بجنوطها الاصلية و كاوتشها الاصلى و الفردتين الخلفى حالتهم مش قد كدة فا عند السرعة دى بداء عجل ورا يتزحلق خفيف و بداء الDSC يشتغل فا طبعا منقدرش نضغط اكتر من كدة لان الكاوتش حالتة لا تسمح بس عموما الفرق بين اداء العربية قبل السوست السبور مكنش كدة خالص و كان فيه نسبة ميلان لجسم العربية كبيرة جدا انما بعد السوست تقريبا جسم العربية مكنش بيميل خالص و فضلت محافظة على الخط اللى هى ماشية فية بالرغم من المطبات اللى فى الملف... لولا حالة الكاوتش كان ممكن نضغط على العربية اكتر من كدة

التجربة اللى بعد كدة كانت فى سلسلة ملفات ضيقة متتالية لاختبار مدى تجاوب العربية لتغيير الاتجاة السريع عدة مرات على سرعة... احنا جربنا العربية فى ميداين صغيرة و فى كذا باركنج و كان كل اختبار فيه 6 او 7 ملفات ورا بعض و كلهم عكس بعض على سرعات محتلفة و العربية كانت بتستجيب بمنتهى السلاسة و الدقة فى كل ملف و كانت بتاخد الملفات اكنها ماشية على قضيب مش على الاسفلت...

المشكلة برضة هنا ان لما زودنا السرعة الكاوتش بداء يفقد تماسكة و بداء يحصل under-steer انما محصلش خالص اى ميلان زائد لجسم العربية او احساس ان العربية مش قادرة تستجيب لحركة الدركسيون نتيجة انتقال وزن جسم العربية بشكل زائد

اخر اختبار كان فى منطقة لسة بتتبنى فا الطريق علية نسبة رمل و مزحلق فا جربنا الدريفتات فى المنطقة دى... و العربية بتعمل دريفت مكنش فية فرق يذكر قبل و بعد السوست... نفس حالة العربية و هى بالعرض كانت تقريبا واحدة... الفرق الكبير ظهر لما الدريفتاية بتخلص... قبل السوست السبور كان وزن العربية بيترمى الناحية العكسية بقوة اول ما الدريفتاية تخلص و طبعا لازم السواق يبقى عامل حسابة على رد الفعل دة و يلم العربية عشان متتطوحش منة...

بعد السوست انتقال الوزن من جنب لجنب بقى اقل بكتير و نهاية الدريفت بقت اكثر اتزان و العربية اسهل فى السيطرة عليها و دة بيدى فرصة ان الواحد يدريفت على سرعة اعلى فى نفس الملفات اللى كنا بندريفت فيها قبل كدة و حتى ان الواحد يدريفت فى اماكن اضيق من الاول نتيجة الثقة فى ان العربية مش هتخرج عن مسارها بشكل كبير او تتزحلق اكتر من اللى السواق عايزة

طبعا النتيجة مبهرة بالرغم من الكاوتش التعبان اللى فى العربية و التغير فى مستوى الاداء اكثر من رائع... و مقارنة بان العربية وطيت و بقت محتاجة حرص زيادة فى المطبات الصناعية الا ان التحسن فى الاداء اكبر بكتير جدا من الجانب السلبى دة و فعلا قيادة العربية متعة كبيرا جدا جدا

انا بصراحة مش عارف اتخيل الاداء بعد ما نركب جنط 17 و كاوتش 225\45\17 (دى الخطوة الجاية ان شاء الله) و اعتقد بعدها الاداء هيبقى مذهل... انا عارف ان الكاوتش بيفرق فرق كبير جدا فى الاداء و لو حسبنا الفرق دة مع فرق السوست الحالى بالكاوتش الاصلى اعتقد هيبقى ثبات العربية حاجة فوق الوصف ان شاء الله

عموما اوعدكم لما نركب الجنوط و الكاوتش هنعيد الاختبارات تانى و نقولكم ايه الاخبار

MMamdouh