موضوع مهم علشان ما يتنصبش عليك-توكيل اوبل

يا جماعه اناهحكي لكم عن تجربتي عن اسوء توكيل في مصر....و مش محتاجين اقولكم اسمه لانكم اكيد عارفينه

نويت اشتري عربيه جديده و قلت انا هدفع مبلغ كويس علشان اركب عربيه كويسه ....لفيت في معارض كتير و حضرت معرض الاهرام و الاخبار ...القرار كنت بفكر فيه من قبل الثوره و اجلته علشان الانفلات اللي البلد فيه ...لكن بعد اكثر من سنه علي الثوره ما كانش فيه حل تاني لان مصالحي واقفه. و حياتي كلها سفر..

رحت يا جماعه اتفرجت علي الاوبل استرا الجديده و قلت اجمع اكبر معلومات عنها....اتكلمت مع 16424 و جبت البروشور بتاعها و ذاكرته....Telesales قالولي العربيه الماني ...رحت فرع المهندسين قالوللي العربيه يا افندم بلجيكي ....كلمت بعد كده Telesales و قالوللي يا افندم ازاي الكلام ده ؟؟ كلمني بعدها اكثر من واحد علشان يؤكد لي ان العربيه الماني ( انا ما بتكلمش عن ال Brand اللي هوه الماني طبعا انا بتكلم عن بلد المنشأ) ....و علشان تطمنوا ان اللي بقوله مظبوط ....انا كتبت الكلام ده علي المنتدي من شهر 7 2011 ..علشان تتاكدوا اني ما بقولش اي كلام الغرض منه تشويه ناس بغير ذنب.

http://www.nilemotors.net/Nile/231085-2011-2.html

و لان سفري كتير و طول النهار علي الطريق...كنت لما بلاقي نفسي فاضي في حته اروح و اتفرج علي العربيه تاني...رحت فرع مدينه نصر اللي في شارع الطيران و رحت فرع اسكندريه اللي جنب الفور سيزونز و اتفرجت ع العربيه ( و لو بكدب عليكم اسالوهم هما بيركنوا الاسترا فين في المعرض ...بيركنوها في جراج الفورسيزونز علشان القلق اللي البلد فيه و انا رحت اتفرجت علي العربيه هناك كمان)......يا جماعه الرساله اللي جايه منهم كلها العربيه متصنعه في المانيا يا فندم

المهم قررت اشتري العربيه ....اشتريتها و رخصتها و بعد ما خرجت من المرور و العربيه بالاستيكرز بتاع الفبريكه.. بصيت علي الورق بتاعها مكتوب عليها وارد اتحاد اوربي ... انا قلت ان الاتحاد اوربي بيتحط في العربيات لان الجمارك بتعامله بشكل مختلف ....و المانيا جزء من الاتحاد الاوربي ......بعد ما رخصت العربيه ..شفت الورقه اللي علي الازاز مكتوب عليها Vehicle Release Form بيقول ان المصدر هو GM Poland اتصلت بواحد زميلي خبير جمركي ...قاللي الوكيل ممكن يستورد العربيه من اي وكيل معتمد من العالم ...الفار بدا يلعب في عبي ....دخلت علي منتديات اوبل استرا و لقيت لينك الماني
Opel-Infos.de بيقول من رقم الشاسيه بتاعي ان العربيه من انتاج مصنع بولندا
يا نهار اخضر...اتصلت بالتيليسيلز ...سالتهم العربيه متصنعه فين قالوا ألمانيا...قلتلهم العربيه دي بولندي ..قالوا مش ممكن ...المهم طبعا سخنت عليهم ...لقيت بعد شويه مدير فرع المهندسين بيكلمني و هو بيأكدلي ان العربيه دي ألماني ...قلت له طيب انا هبعت للشركه بره مصر ....و هشوف الرد ...قاللي يا فندم و انا هبعت للشركه بره و هبعت لسيادتك الرد علشان تطمن قلت له طيب..و قاللي يا فندم انت بتشتغل مع شركه محترمه و لو لحضرتك حق احنا هندور عليه قبلك ...قلت ماشي .....في نفس الوقت قولت هروح لجهاز حمايه المستهلك قبل ما ال 14 يوم يعدوا ....جه الرد من اوبل ان العربيه بولندي.....قلت يا نهاركم ازرق...ده نصب علني .....قلت استني البهوات بتوع اوبل في مصر هيقولوا ايه ...ما ردوش طبعا....كلمني انسان محترم من جهاز حمايه المستهلك و قاللي احنا محتاجين ورق من سيادتك يثبت ان العربيه الماني...قلت له ده انا محتاج منكم انكم تكلموا الجمارك اللي مطلعه عربيه بدون بلد منشا واضح علشان تسهل علي الوكيل انه يضحك ع الزباين ...و الغريبه ان في 2010 كان فيه قرار ان بلد المنشأ لازم تتكتب بشكل محدد و في مكان ظاهر علي السلعه و خصوصا السلع اللي جايه من الاتحاد الاوربي علشان النصب .....قلت للجهاز كده قاللي يا فندم قبل الثوره لما كنا تبع وزاره التجاره و الصناعه كان لنا تاثير اكبر بكتير....دلوقت بقينا تبع وزاره التضامن...قلت له يا سيدي كلم اي فرع من فروع الشركه او مبيعاتهم و اتاكد من اللي بقوله ...قاللي هرجع لك تاني و من ساعتها مفيش رد...المهم كلمت مدير فرع المهندسين تاني قاللي انا في اجازه بس المشكله بتاعتك تم تصعيدها و اكيد فيه حد هيكلم سيادتك....قلت له طيب ( انا قلت هشوف اذا كانوا هيعبروني حتي محصلش) المهم لما زهقت قلت هبعت ايميل محترم لالمانيا ...كلمت الراجل كان رجع من الاجازه قلت له انا جاللي الرد من المانيا ...و العربيه بولندي....لقيت الراجل سكت...قلت له انا هعمل اللي ربنا يقدرني عليه...لقيته بيتصل تاني و بيقولي ياريت تبعتللي الايميل اللي جالك من المانيا علي الايميل بتاعي.....رحت جاي شايط ايميل الي المانيا و حطيت الراجل في الكوبي .....قلت اللي ربنا قدرني عليه.....لقيت النهارده ايميل جاي من المدير العام لاوبل مصر بيقول فيه ان وكيل الشركه في مصر ناس لها سمعه كبيره و ان شعارهم " انت في يد امينه" و ان العربيه دي جايه من الاتحاد الاوربي و ما كانش حاطط اوبل المانيا في الكوبي........رحت متصل بمدير فرع المهندسين و قلت له اظاهر ان مدير المبيعات الوحيد اللي عارف سر العربيه و مخبيه عليكم....الراجل رد عليه و قاللي ده مديري و انا مش عارف اساعدك ازاي...قلت له لا سيبني انا اللي هساعد نفسي....رديت ع الباشا و حطيتهم كلهم في الكوبي و ايميل الي المانيا عرفتهم يعني ايه عميل و قلت له كلم اي فرع من فروعك و اي موظف علي التيلي سيلز و هما هيردوا علي سيادتك..........

لو عايزين تتاكدوا بنفسكم ...كلموا 16424 ...و اسمعوا منهم قبل ما يغيروا كلمهم بسبب الهيصه اللي نا بعملهالهم

المانيا لسه ما ردتش عليه و جهاز حمايه المستهك ما ردش ...و هقولكم علي اي جديد

الخلاصه يا جماعه ...لو اشتريت اي عربيه من دول الاتحاد الاوربي....اوعي تصدق اللي الوكيل بيقولك عليه...هات رقم الشاسيه و اتاكد من الموضوع بنفسك.....و اوعي تصدق الا لما تشوف بعينيك


الله ما يكسبك ياللي في باللي

شيء محزن جدا، والتوكيل ده فعلا تيييييييييييت ولو هايبعلي بي إم أركب 128 أفضل

باشا

معروف ان كل الالماني اللي بيجي مصر بيبقي من خطوط انتاج بره المانيا و دي حاجه معروفه جدا و انا مش عارف ازاي حضرتك صدقت اللي قالك انها الماني ؟ انا معرفش القاعده دي بتنطبق علي الالماني العالي زي شركه ميني و بي ام و مرسيدس و لا لأ

بصراحه دي معلومه جديده...الافتراض ده جاي منين ؟؟؟ منين سيادتك بتقول "معروفه" علي الاقل ما كانتش معروفه ليه و لكل الناس اللي بتقول في المنتدي انها الماني

موضوع يحرق الدم فعلا , بس اهم حاجة العربية نفسها عاملة معاك ايه ؟
بس سؤال من غير تريقة , موضوع التقفيل ده فارق معاك اوي ليه كده ؟ هو تقفيل العربية مش عاجبك ؟

معلش اللى حصل حصل , والتقفيل البولندى اكيد مش سئ , انا فاهم ان حضرتك بتتكلم فى فكرة الخداع او الجهل بتاع موظفين المبيعات , للاسف 99 % منهم فى جميع الماركات لا يفقهوا شئ حافظين مش فاهمين بيقولوا شوية معلومات وبيكرروها

انا لما اتفرجت عالاسترا اول مانزلت صورت رقم ال VIN بتاعها وعملت سيرش عالنت عرفت انها تقفيل بولندى

http://www.nilemotors.net/Nile/15633...new-astra.html

واتعودت ماثقش فى كلام حد واتأكد من تفاصيل اى عربيه عن طريق ال VIN اى كان ماركتها

سمعة منصور مشبوهه كوكيل للسيارات في مصر

بل ويحظي بحصانة قديمة ((علي الأقل للقرابة العائلية بينه وبين وزير النقل السابق منصور ))

وكذلك غبور للقرابه بينه وبين المتهم وزير المالية السابق

عزيزي لا تقلق

نحن ملاك سيارات أقل من مستوياتها العالمية بمراحل وأعلي في السعر بما يعادل الضعف

ونضطر إلي أن ننفق عليها في ورش درجة تالتة أطلقوا عليها مراكز خدمة معتمدة
أضعاف سعر العربية حتي تنتهي فترة الضمان الوهمي

لذا
لا تترك حقك

لكن لا تنسي أيضا أن تستمتع بسيارة محترمه دفعت فيها ما يكفي ليجعلك تشعر بالتميز

السيارة عموما ممتازه ولا تباع إلا عند الوكيل ((الغير متميز))

أنا أتعامل مع الوكيل لشراء قطع الغيار الأصلية (( وارد أي حته في الدنيا )) وبيقول عليها كوري .

لكن صدقني أهون بكثير من أن أتعامل مع محلات لقطع الغيار الصينية الرديئة المقلدة

نحن بلد لايوجد في ظبط ولا ربط
لاتوجد جهة مسئولة عن المستهلك
يعني يسمح للبضائع الفاسدة بالدخول للسوق بالتزامن مع فتح جهاز لحماية المستهلك(( من مييييييييين ))
من فشل وزارة التجارة الداخلية

سامحني علي الإطالة
والف مبروك السيارة

اول مره اسمع حكايه الاتحاد الاوروبى دى ...
يعنى هما قالوا المانى و طلعت مش المانى ؟!
طيب ليه من الاول يعملوا كده ؟!
هل لو قالوا بولندى كانت هتفرق فى السعر او امكانيات العربيه مثلا ؟!

انا اللى عارفه انه عادى جدا ان الوكيل يقول ان العربيه دى متجمعه فى مصنع الشركه فى البلد الفلانى و ده ميأثرش على العربيه فى اى حاجه لا سعر و لا اقبال و لا اى حاجه
و عندك كذا مثال : كورولا الجنوب افريقى و نيسان تيدا المكسيكى و ربنو لوجان المغربى
و حتى منصور نفسه عملها فى شيفروليه سبارك الكورى و شيفروليه اوبترا التايلاندى

خليك ورا التوكيل الزفت ده لغايه ما تاخد حقك و لو وصلت ترجعلهم العربيه و تاخد فلوسك

ربنا معاك

اقتباس:

---

المشاركة الأصلية كتبت بواسطة melagouze

بصراحه دي معلومه جديده...الافتراض ده جاي منين ؟؟؟ منين سيادتك بتقول "معروفه" علي الاقل ما كانتش معروفه ليه و لكل الناس اللي بتقول في المنتدي انها الماني

---

يا فندم مفيش عربيه بتيجي تقفيل بلادها الا نادرا
الباسات برازيلي الجيتا مكسيكي تقريبا
و قيس علي كده
و بعدين العربيه سعرها مقارب للفوليستر صح و لا لأ؟ الفوليستر كوري 100 % يبقي ازاي افترضت ان الاسترا الماني ؟ ده علي اساس ان الكوري زي الالماني مثلا و لا غبور حرامي و منصور مش حرامي ؟ حلل الموقف كويس

حتى العربيات النضيفة طلع فيها غش وخداع
ربنا ينتقم منهم
وانصحك انك تفضل منكد عليهم عيشتهم كدة
وفى نفس الوقت تستمتع بالعربية
اوبل مش هتنزل عربية دون المستوى ابداً

للاسف التلىسيلز دول كارثه و بيدوا معلومات مضلله و حتى كمان اللى بيبقوا واقفين فى المعارض اغلبهم ما بيفهموش فى الحاجه اللى بيبيعوها و على فكره معروف ان المقصود بالاتحاد الاوروبى ده اوروبا الشرقيه عمر ما المانيا و لا بلجيكا و لا سويسرا و لا هولندا مثلا هيكتب على منتجاته صنع فى الاتحاد الاوروبى أبدا و فعلا الاحسن ان حضرتك تدور على العربيه ب ال vin بتاعها و تشوف متصنعه فين لان اللى بيبعلك يا اما جاهل او غشاش و الاتنين اسوأ من بعض :hitwall3:

اقتباس:

---

المشاركة الأصلية كتبت بواسطة screenplays

يا فندم مفيش عربيه بتيجي تقفيل بلادها الا نادرا
الباسات برازيلي الجيتا مكسيكي تقريبا
و قيس علي كده
و بعدين العربيه سعرها مقارب للفوليستر صح و لا لأ؟ الفوليستر كوري 100 % يبقي ازاي افترضت ان الاسترا الماني ؟ ده علي اساس ان الكوري زي الالماني مثلا و لا غبور حرامي و منصور مش حرامي ؟ حلل الموقف كويس

---

يا بلدياتي .....الجولف الماني و في نفس المستوي السعري....و سعر اليورو مع ارتفاع سعر الوون الكوري و الين الياباني هوه اللي خللي العربيات الكوري و الياباني تغلي ....و تقارب الاوربي....

اقتباس:

---

المشاركة الأصلية كتبت بواسطة mody3on

موضوع يحرق الدم فعلا , بس اهم حاجة العربية نفسها عاملة معاك ايه ؟
بس سؤال من غير تريقة , موضوع التقفيل ده فارق معاك اوي ليه كده ؟ هو تقفيل العربية مش عاجبك ؟

---

هقول لسيادتك...في كل دول العالم ال Point of Origin موشر علي Quality of product .....ده Perception صح غلط مش مهم بس ده رؤيه ال Consumer في اي حته في العالم ( انا بتكلم كلام علمي)

مش تريقه و لا حاجه....العربيه زي الفل ....و مصنع بولندا ده له فيديو ع النت فيه AUTOMATION هايل .......بس بلد المنشأ لا يعلي عليها .....و الموضوع خداع للعملاء.....بجد ....و لو هما مش عارفين ان المستهلك ما بيروحش لبلد المنشا الرئيسيه بالذات ألمانيا و اليابان ....ما كانش فيه عربيات فشلت في مصر فشلا ذريعا ( سواء علي حق ام علي باطل)....التويوتا الجنوب افريقي و الهوندا سيتي خير مثال علي Perception العميل علي التصنيع خارج البلد.

من تاني يا جماعه ....مش ده نوع من الغش التجاري....برده

لا تعليق عليهم

اقتباس:

---

المشاركة الأصلية كتبت بواسطة land_cruiser

للاسف التلىسيلز دول كارثه و بيدوا معلومات مضلله و حتى كمان اللى بيبقوا واقفين فى المعارض اغلبهم ما بيفهموش فى الحاجه اللى بيبيعوها و على فكره معروف ان المقصود بالاتحاد الاوروبى ده اوروبا الشرقيه عمر ما المانيا و لا بلجيكا و لا سويسرا و لا هولندا مثلا هيكتب على منتجاته صنع فى الاتحاد الاوروبى أبدا و فعلا الاحسن ان حضرتك تدور على العربيه ب ال vin بتاعها و تشوف متصنعه فين لان اللى بيبعلك يا اما جاهل او غشاش و الاتنين اسوأ من بعض :hitwall3:

---

شكرا علي كلامك...العربيه مش مكتوب عليها اتحاد اوربي ....ورق العربيه بتاع الجمارك هوه اللي مكتوب عليه اتحاد اوربي......و المفروض ان الجمارك تلتزم بكتابه بلد المنشأ الحقيقيه مش " اتحاد اوربي" و الا تكون مشاركه في خداع العميل

اكيد الموضوع فيه ان واكيد الناس الي في التوكيل عارفين كمان انها الماني وعارفين كمان ان قصه بولندي دي هتوقع العربيه

انا لو رايح اشتري استرا وعرفت انها بولندي همشي حتى لو عملوا ايه مش هشتريها (ده مبدا)

بس عموما يعني انت اشتريت والموضوع انتهى والعربيه زي الفل مش هتعمل معاك حاجه برضو فيه جوده صناعه ومستحيل اوبل تتهاون في تصنيع اي عربيه ليها حتى لو في الهند

صدقني وفر وقتك وفلوسك وكبر دماغك وامشي بالعربيه ولا كان في اي حاجه ومدام العربيه تمام خلاص انت ايه مدايقك


وتعودوا ياجماعه على النصب لان البلد مفيش حاجه فيها اتغيرت

مهو غبور جه فتره ونزل مازدا في الغالب كانت صيني والموضوع اتهرش بالصدفه لانه كان عامل اتفاقيه مع شركه صييني بتصنع الموديلات القديمه من فولكس ونزلت مصر وحصلت مشكله والناس دخلت الموقع بتاع الشركه الصيني لقت انها بتصنع المازدا والتويوتا واغلبيه الياباني ورجع سحب عربياته من السوق تاني

اقتباس:

---

المشاركة الأصلية كتبت بواسطة AHMEDATTARKARE

سمعة منصور مشبوهه كوكيل للسيارات في مصر

بل ويحظي بحصانة قديمة ((علي الأقل للقرابة العائلية بينه وبين وزير النقل السابق منصور ))

وكذلك غبور للقرابه بينه وبين المتهم وزير المالية السابق

عزيزي لا تقلق

نحن ملاك سيارات أقل من مستوياتها العالمية بمراحل وأعلي في السعر بما يعادل الضعف

ونضطر إلي أن ننفق عليها في ورش درجة تالتة أطلقوا عليها مراكز خدمة معتمدة
أضعاف سعر العربية حتي تنتهي فترة الضمان الوهمي

لذا
لا تترك حقك

لكن لا تنسي أيضا أن تستمتع بسيارة محترمه دفعت فيها ما يكفي ليجعلك تشعر بالتميز

السيارة عموما ممتازه ولا تباع إلا عند الوكيل ((الغير متميز))

أنا أتعامل مع الوكيل لشراء قطع الغيار الأصلية (( وارد أي حته في الدنيا )) وبيقول عليها كوري .

لكن صدقني أهون بكثير من أن أتعامل مع محلات لقطع الغيار الصينية الرديئة المقلدة

نحن بلد لايوجد في ظبط ولا ربط
لاتوجد جهة مسئولة عن المستهلك
يعني يسمح للبضائع الفاسدة بالدخول للسوق بالتزامن مع فتح جهاز لحماية المستهلك(( من مييييييييين ))
من فشل وزارة التجارة الداخلية

سامحني علي الإطالة
والف مبروك السيارة

---

شكرت يا احمد علي كلامك....ربنا يكرمك .....للاسف...المبدأ اللي شغالين بيه هوه Sell then Handle

اقتباس:

---

المشاركة الأصلية كتبت بواسطة حماده المصري

اكيد الموضوع فيه ان واكيد الناس الي في التوكيل عارفين كمان انها الماني وعارفين كمان ان قصه بولندي دي هتوقع العربيه

انا لو رايح اشتري استرا وعرفت انها بولندي همشي حتى لو عملوا ايه مش هشتريها (ده مبدا)

بس عموما يعني انت اشتريت والموضوع انتهى والعربيه زي الفل مش هتعمل معاك حاجه برضو فيه جوده صناعه ومستحيل اوبل تتهاون في تصنيع اي عربيه ليها حتى لو في الهند

صدقني وفر وقتك وفلوسك وكبر دماغك وامشي بالعربيه ولا كان في اي حاجه ومدام العربيه تمام خلاص انت ايه مدايقك

وتعودوا ياجماعه على النصب لان البلد مفيش حاجه فيها اتغيرت

مهو غبور جه فتره ونزل مازدا في الغالب كانت صيني والموضوع اتهرش بالصدفه لانه كان عامل اتفاقيه مع شركه صييني بتصنع الموديلات القديمه من فولكس ونزلت مصر وحصلت مشكله والناس دخلت الموقع بتاع الشركه الصيني لقت انها بتصنع المازدا والتويوتا واغلبيه الياباني ورجع سحب عربياته من السوق تاني

---

________________________________________________
شكرا يا حماده علي كلامك.......اهوه الي مضايقني انهم لو كانوا قالوا انها تقفيل بولندي ....كنت هسيبهم و همشي بردو....

العربيه و الله جميله و مريحه جداااا...هوه طبعا شايل منها حاجات زي البلوتوث و حساسات الركن و USB في الفئه الاولي ....بس بجد العربيه ما شاء الله جميله..السحب بتاعها مش هقولك جامد بس هوه معقول لحد 60 كيلو و بيتحسن مع الوقت ( العربيه لسه بتلين و معملتش 1000 كم) بس لو قرصت العربيه Responsive

..انا و الله عملت كده علشان يبطلوا يخدعوا ناس غيري انا عارف ان ممكن دمهم يتحرق لو قروا موضوعي ده

اقتباس:

---

المشاركة الأصلية كتبت بواسطة Land_Cruiser

للاسف التلىسيلز دول كارثه و بيدوا معلومات مضلله و حتى كمان اللى بيبقوا واقفين فى المعارض اغلبهم ما بيفهموش فى الحاجه اللى بيبيعوها و على فكره معروف ان المقصود بالاتحاد الاوروبى ده اوروبا الشرقيه عمر ما المانيا و لا بلجيكا و لا سويسرا و لا هولندا مثلا هيكتب على منتجاته صنع فى الاتحاد الاوروبى أبدا و فعلا الاحسن ان حضرتك تدور على العربيه ب ال vin بتاعها و تشوف متصنعه فين لان اللى بيبعلك يا اما جاهل او غشاش و الاتنين اسوأ من بعض :hitwall3:

---

علي حد علمي دول الإتحاد الأوروبي EU هي كل الدول إللي تابعة للإتحاد الأوروبي سواء غربية أو شرقية ولها عملة موحدة (اليورو) ولها برلمان وكمان لها قوانين موحدة وتخضع لإشتراطات جودة ومواصفات صناعة واحدة يعني مقاييس وجودة الصناعة في ألمانيا زي بولندا زي النمسا نفس الرقابة ومش هتخرج العربية من المصنع إلا إذا كانت مطابقة لمواصفات الإتحاد الأوروبي NCAP New Car Assessment Programme ومعناه برنامج تقييم السيارات الجديدة وده بدأ من 2009 وهو كمان مسئول عن إعطاء درجات السلامة للسيارات (عدد النجوم من 1-5) ولهذا لا تقلق وإستمتع بسيارتك الجديدة.

انا اول مره اعرف ان الاوبل الاسترا مش المانى ؟!!!

وتقريبا 99% السيلز اللى فى المعارض فى منصور او بره منصور فاكرين انها المانى
الموضوع ده مستخبى من الاداره نفسها هى اللى مش قايله عليه وخليك وراء اوبل المانيا و حمايه المستهلك وشوف النتيجه ايه
بس انا ركبت العربيه دى الصراحه بجد مفهاش غلطه فى التقفيل

الاسترا الشكل القديم السيدان برازيلي
ومتهيقلي معروف ان الاسترا بالزات مش بتبقي تقفيل الماني زي الفيكترا
......
بص حضرتك ماتحطش في دماغك والله العظيم العربيه تحــــفه ومن العربيات اللي ناوي اجيبها بعدين ان شاء الله
عربيه محترمه جدا وشكلها تحفه فنيه ( بالزات لو لونها سيلفر ) وموتورها حلو وسريعه
اهم حاجه انك تهتم بالصيانه الدوريه بتاعتها عشان العربيات المحترمه دي بتبقي محتاجه اهتمام عشان تريحك
وأي مشكله تلاقبلك لا قدر الله تعالي قسم اوبل و هنفيدك
..
وبردو كمل في موضوعك مع التوكيل عشان تديهم علي عنيهم شويه
ومنه لله منصور اللي ضيع سمعه اوبل في مصر
وعلي فكرة لو مش عايز تتعامل مع التوكيل.. في مراكز صيانه أوبل محترمه جداا ممكن تتعامل معاهم

اقتباس:

---

المشاركة الأصلية كتبت بواسطة melagouze

________________________________________________
شكرا يا حماده علي كلامك.......اهوه الي مضايقني انهم لو كانوا قالوا انها تقفيل بولندي ....كنت هسيبهم و همشي بردو....

العربيه و الله جميله و مريحه جداااا...هوه طبعا شايل منها حاجات زي البلوتوث و حساسات الركن و usb في الفئه الاولي ....بس بجد العربيه ما شاء الله جميله..السحب بتاعها مش هقولك جامد بس هوه معقول لحد 60 كيلو و بيتحسن مع الوقت ( العربيه لسه بتلين و معملتش 1000 كم) بس لو قرصت العربيه responsive

..انا و الله عملت كده علشان يبطلوا يخدعوا ناس غيري انا عارف ان ممكن دمهم يتحرق لو قروا موضوعي ده

---

صدقني متوجعش دماغك خالص خالص خالص العربييه ممتازه

وهو ده دلوقتي مبدا التصنيع ف العربيات لان خلاص صعب تلاقي عربيه كل مكوناتها الماني او ياباني مثلا هوه ده اتجاه الصناعه حاليا العماله في المانيه غاليه جدا والسياره تكلفتها هتغلى وبرضو مفيش ضامن لعدم وجود عيوب صناعه اكيد هيبقى فيه مع انها العماله رقم واحد في العالم

ف ده اتجاه تصنيع العربيات كلها دلوقتي كل الشركات عندها مصانعها في الدول الناميه وبتصنع فيها العربيات بدون مشاكل خالص اوفر ليهم ولينا

اقتباس:

---

المشاركة الأصلية كتبت بواسطة حماده المصري

صدقني متوجعش دماغك خالص خالص خالص العربييه ممتازه

وهو ده دلوقتي مبدا التصنيع ف العربيات لان خلاص صعب تلاقي عربيه كل مكوناتها الماني او ياباني مثلا هوه ده اتجاه الصناعه حاليا العماله في المانيه غاليه جدا والسياره تكلفتها هتغلى وبرضو مفيش ضامن لعدم وجود عيوب صناعه اكيد هيبقى فيه مع انها العماله رقم واحد في العالم

ف ده اتجاه تصنيع العربيات كلها دلوقتي كل الشركات عندها مصانعها في الدول الناميه وبتصنع فيها العربيات بدون مشاكل خالص اوفر ليهم ولينا

---

انا فاهم كلام حضرتك كويس.....و انا راجل عايش في البيزنس و فاهم استراتيجيات الشركات دلوقت ....و كلام سيادتك ده مظبوط......100 % .....

بص يا بن حتتي
اولا ربنا يديك خيرها و يكفيك شرها و يبعد عنك العين
ثانيا خليك وراهم و لو عرفت تاخد حقك متسيبوش بس فنفس الوقت حاول تتمتع بالعربيه لأن لو كرهتها فاولها مش هترتاحلها بعد كده
و ربنا يباركلك فيها

اقتباس:

---

المشاركة الأصلية كتبت بواسطة haitham2011

بص يا بن حتتي
اولا ربنا يديك خيرها و يكفيك شرها و يبعد عنك العين
ثانيا خليك وراهم و لو عرفت تاخد حقك متسيبوش بس فنفس الوقت حاول تتمتع بالعربيه لأن لو كرهتها فاولها مش هترتاحلها بعد كده
و ربنا يباركلك فيها

---

شكرا يا هيثم لذوقك و نصيحتك

برافو عليك اللى عملته معاهم
وياريت ما تسيبش حقك وتفضحهم على النصب

حاجه محزنه فعلا توكيل زي دا يعمل بالعربيه زي اوبل كدا

واضح اتباعهم نفس الثقافة والسياسة حتى فى بيع قطع الغيار والفيصل النهائى حيكون مدى معرفتك بالسيارة ومعلوماتك عنها كمجمل كانك حتمتحن للاسف التوكيلات غير جديرة بالسيارات البتنزل مصر ولا فى اى رقابة من اى جهة

النهارده اتصل بيه مدير فرع اوبل المهندسين....هو راجل محترم جدا ....قلتله انا مش واحد عايز اعمل عليكم نمره علشان اطلع بقرشين منكم.....و مش هتقدر تضحك عليا ب MUG و T shirt ههههههههه........الموضوع موضوع مبدأ مش اكتر....و انا عامله مش بس علشان اجيب حقي ...لا ده انا عامله علشان امنع الضرر عن ناس تانيه....قاللي احنا هندرس التعويض المناسب لسيادتك ....و هنرد عليك بعرضنا .........( طبعا بعد ما اقسم بايمانات المسلمين ان الموضوع ده مش مترتب له و ان كلام المبيعات هيتغير بعد كده عن بلد المنشأ)........المهم ما حدش يسيب حقه و يطلع للشركه الام و يشتكي و يعمل دوشه لحد ما يجيب حقه

جزاك الله كل خير وأن شاء الله يرجعلك حقك لأن من الأخر دي عالم حرامية ....لو واحد بيشتري حاجة بألف جنيه والبياع قاللو دي ألماني وبعدين طلعت مش ألماني بيرجع ينفخ البياع ويتخانك معاه ...
ما بالك بعربية ....
خليك وراهم وأن شاء الله ينصرك لأن هما واضح أنهم مقلقين وإلا ما كانوش رجعولك تاني وبيقلك هيعودوك ...
دة غير الثواب بتاع أنك نبهت الناس ....