مشكلة صعبة الوصف ....(:

**asom_6** · 30-04-2012 03:25 PM

المشكلة صعبة الوصف لأنها تتعلق بصوت فى العربية مش عارف أوصفه هل هو زنة ولا وره ولا أيه ...

العربية شيفرولية لانوس 2011 ... وصيانة ال 10 ألاف تمت فى التوكيل من حوالى شهرين ... وحطيت زيت موبيل وان تخليقى بدل xhp المعدنى ... وبصراحة هما نفضوا العربية ومسابوش حاجة مظبطوهاش حتى الطاسات ركبولها كوليهات بلاستيك (((بس حسبوها فى الفاتورة الواحد بنص جنيه))).
الملاحظ بعد الصيانة ان رجلاش الفرامل الخلفية خللى دراع فرامل اليد يوقف بعد تلات تكات بعد مكان بيقف على حوالى ستة او سبعة والمهندس قاللى ان مع الاستعمال عدد التكات هيزيد ونرجع نرجلش تانى .

المهـــــــــــم ::: المشكلة ان انا بسمع صوت فى اخر الغيار الاول والتانى عند حوالى 3000 لفة ولما بنقل يروح الصوت ... وده مش بيحصل فى باقى الغيارات ولا لما أطلع بالعربية ولا لما أرجع مارشيدير ... الغيار الأول لما العربية توصل 3000 لفه تقريباً بسمع صوت الوره دى ... ولما بنقل للتانى يروح الصوت ويرجع تانى برضه لما اوصل تقريباً ل 3000 لفة ولما انقل بعد كده يروح الصوت خالص فى باقى الغيارات من التالت للخامس.
وعلى فكرة ال 3000 لفه دول انا بعتبرهم اصلا نهاية الغيار لان انا بسوق سواقة اقتصادية مش رياضية اطلاقا وغيارات العربية على 2500 الى 3000 بحد اقصى.

برجاء المساعدة وشكراً لحسن استماعكم......

**mailo** · 30-04-2012 06:09 PM

جرب كمل لحد 4000 على أي واحد فيهم وشوف هيفضل الصوت ولا هيكمل معاك ولا هيروح

**walaaeldeen** · 13-05-2012 10:04 PM

السلام عليكم
احتمال يكون فيه حاجه سايبه في الحوض ممكن يكون ذراع تسبيت الكبوت عند الفتح مش محطوط مكانه في الكلبسه وممكن تكون الكلبسه مكسوره المهم بص في الحوض ممكن تلاقي حاجه سايبه
والله المستعان

**asom_6** · 13-05-2012 10:34 PM

Mailo
الصوت دلوقتى بيروح وييجى ... لسه برضه فى الغيارين الاول والتانى بس مش فى وقت معين فى نهاية الغيار ولكن فى اى وقت انا وسايق كده الصوت يجيي شويه وبعدين يروح ... ومش عارف ليه مخى رايح ناحية اسطوانة الدبرياج او الديسك او الحاجات الميكانيكية اللى بتمثلى لوغاريتمات مبهمة

walaaeldeen
راجعت على حوض الموتور وكل حاجة متثبتة فى مكانها ومفيش حاجة بتلعب وعموماً الصوت مش كركبة حاجة سايبة ... لأ ده صوت صفارة أو تقدر تقول تزييقة ... صح هى تزييقة ... بسمعها وأنا على الغيار الأول أو التانى

شكرأ لأهتمامكم والرد

**mero100** · 14-05-2012 01:37 AM

الصوت ده عندي ....عربيتي لانوس 2011 ..... الصوت اللي بتقصده هوه صوت حاجه بترن او بتشخلل خفيف في اخر تشبيع الغيار و مصدر الصوت من عند عصايه الفتيس ....

انا قلتلهم عليه في التوكيل و كشفوا علي العصايه و الفتيس و قالولي مفيش حاجه مش طبيعيه .

و بالمناسبه الصوت مش متكرر .....يعني بيحصل كل فتره و في غيارات مختلفه ....ممكن في الاول و ممكن في الثاني ....تقريبا مبسمعوش في الثالث و الرابع و الخامس و المارشدير .

**asom_6** · 14-05-2012 10:02 AM

المشاركة الأصلية كتبت بواسطة mero100

الصوت ده عندي ....عربيتي لانوس 2011 ..... الصوت اللي بتقصده هوه صوت حاجه بترن او بتشخلل خفيف في اخر تشبيع الغيار و مصدر الصوت من عند عصايه الفتيس ....

انا قلتلهم عليه في التوكيل و كشفوا علي العصايه و الفتيس و قالولي مفيش حاجه مش طبيعيه .

و بالمناسبه الصوت مش متكرر .....يعني بيحصل كل فتره و في غيارات مختلفه ....ممكن في الاول و ممكن في الثاني ....تقريبا مبسمعوش في الثالث و الرابع و الخامس و المارشدير .

بالظبط كده وواضح أن موديل 2011 ده عملوه وهما نايمين ولا أيه مش عارف

**mailo** · 14-05-2012 11:52 AM

لأ مش كده لو صوت شخلله زي مابتقولوا يبقى صفيحة الفرن أو الشكمان مش عارف اسمها إيه
دي اللي بتبقى على وش الموتور

جرب وإنت واقف وزود بنزين جامد لو سمعتها تبقى هي أنا عندي الزنة دي بتيجي على 4500 تقريبا
أتأكد بس إنها من اللي بنقول عليه

**tarek_2005** · 14-05-2012 12:28 PM

الصوت دا غالباً احتكاك خرطوم مياه السربنتينة السخنة مع عقربية الفتيس لانك بتقول في الاول والثاني فقط
ابعد خرطوم دخول المياه الساخنة لسربنتينة السخن بتاع التكيف عن عقربة الفتيس

**tarek_2005** · 04-07-2012 01:52 AM

راجع علي خراطيم المياه الي حولين عقربة الفتيس
هتفتح الكبوت وتبص خلف البطارية وامام صدر السيارة وانتا واقف جنب الرفرف الشمال الامامي وتبص لتحت هتلاقي الخراطيم والعقربة