الموديلات الحديثه غير مرغوب فيها ياجماعه نظرا لاعطال كبيره ومكلفه فى الفتيس بتاعها سواء كانت باسات او بديل البورا اللى هيا بقت جيتا
عرض للطباعة
الموديلات الحديثه غير مرغوب فيها ياجماعه نظرا لاعطال كبيره ومكلفه فى الفتيس بتاعها سواء كانت باسات او بديل البورا اللى هيا بقت جيتا
شكرا لرايك يا مان عموما هوا ف اكتر من عربيه وربنا المستعان انى الاقى حاجه تكون كويسه
الباسات 1999 موديل مش حديث دي نفس جيل البورا ومشتركه مع البورا فى الموتور والفتيس لكن تزيد عن البورا فى الوسع الداخلى وانها فئه اعلى من البورا وكمان انتشارها اكتر من البورا وبرغم كده سعرها 65 الف
وبالنسبه للجيتا فأول موديلين نزلو مصر كان بالفتيس الاستيبترونيك الموجود فى الاوكتافيا غير الفتيس المانيوال العادي وبعد كده نزل الفتيس dsg الى فيه المشاكل
و للعلم انا كنت بدور على اوكتافيا a5 او جيتا او جولف 5, موديلات 2005 او 2006 و دول الحالات منهم بتتكلم من 87 ل 95 الف, المشكلة انى جبت ورا بسبب مشكلة عقل الفتيس المنتشرة, و اتنصحت انى لو اشترى ابتدى ادور من اول موديلات 2008 مفترض انهم حلوا حوارعقل الفتيس ,و دول بيعدوا ال 100,000 ج الحالات النضيفة منهم.
و بالتالى انتقلت للبورا, بس طبعا دخت 3 - 4 حباات عشان الاقى حالة, وطبعا دفعت فيها بردو اعلى من السوق تقديرا ليها, لان معظة الفى سوق رتش او مش اد كده و الحمد لله على توفيقه.
عموما الحل فى البورا يتصبر لغاية ماتوقع حالة و فى منها بس قليل و سعره مرتفع شوية, ياما تجيب واحدة واقعة و بسعر واطى (بس اهم حاجة تبقى سليمة دواخل و شاسيه), و تعمرها بالكامل, يعنى تشترى ماتور بفتيس بعافشة بالكامل. بس ده عشان يتم لازم يبقى ليك ناسك التشترى منهم و التضمنهم فى التسقيط عشان ميضحكش عليك فى الأسعار و فى حالة الحاجات الهتشتريها و فى جودة التركيب.
متفق مع كلامك ياباشا بس ده برضو ده ميمنعش ان سعر البورا بقى مبالغ فيه واغلى من اختها a4 الى نفس الموديل بـ 10 الاف جنيه واغلى من اختها التالته التوليدو بـ 20 الف جنيه
مثال تانى الباسات المفروض انها فئه اعلى من البورا يعنى المفروض انها تكون اغلى منها على الاقل ب 10 الاف الواقع انها ارخص منها ب 10 آلاف يعني فرق 20 ألف وحتى لو الباسات كان فيها مشكله فى العفشه فحضرتك بنفسك ذكرت انها بتتحل ب 2000 جنيه
انا شايف ان البورا عربيه ممتازه وكنت بفكر فيها جديا لكن لما جيت احسبها لاقيت الي حالتها متوسطه " واساسيتها سليمه " بتكون فى حدود الـ 70 الف لو خدتها بعدها بفتره هلاقى الفتيس بدأ يخرف - اعرف ناس غيرو الفتيس الاتوماتيك على 120 وناس غيروه على 110 - وبعديه بفتره هتلاقى الموتور خف خصوصا ان موتور البورا بيأكل بطبيعته زيت وأغلب البورا الموجوده حاليا كبس موتورها بين 60 - 70%
ولو حبيت اريح دماغك واشد العربيه اول ما اجبها زي ما حضرتك ذكرت هلاقى نفسي دفعت 70 الف تمن العربيه و 20 الف تمن الموتور 1800 بالفتيس الـ 6 نقلات بتاعه " طالما تغيير بتغيير:3mla: " والعفشه وشوية تظبيطات تانيه يبقى كده دخلت فى الـ 90 الف وكسرتهم كمان
لو جينا بصينا فى الكلام ده هنلاقى ان رنج التسعينات ممكن يجيب فئه تانيه بعيده عن البورا زي مثلا 318 مو 1999
او الحاجات الحديثه a4 موديل 2009 أو جولف 5 أو سيفيك 2007 أو حتي كيا كارينز ودول كلهم هيبقو حاله وبره وجوه طبعا
وممكن كمان جيتا موديل 2006 وفى منها اوتوماتيك ومانيوال أو a5 موديل 2006 أو فيكترا c موديل 2008
هى دي وجهة نظري الى بفكر بها
خالص تحياتي
اسمحلى اصحح شوية نقط, البورا لو حالتها مش تمام, يعنى موتور و فتيس و عفشة رايحين بس اساسيات تمام, بتتكلم من 55 ل 60 (و اعتقد الموتور 1800 بالفتيس و و العفشة اقل من 20000 ج, لأن الماكينة التربو بالفتيس تخلص ب 15000), يعنى الموضوع هيدخل فى حدود 75000 ج تقريبا.
لو الماتور و الفتيس حالتهم كويسين الى حد كبير و رشة حزام مثلا او فابريقة سقف و مع شوية شغل عفشة بسيط, بتتكلم من 65 - 67و حط 5000 عفشة (و ممكن اقل طبعا), يعنى الموضوع مش هيعدى 72000 ج.
اعلى الحالات الفابريقة بالكامل و ماتور و فتيس ممتازين مش هتعدى 75000 فى جميع الأحوال و بردو شوية مصاريف عفشة بسيطة, الا لو موديل عالى زى 2005.
كان قدامى اوكتافيا a4 2006 تكييف تاتش رشة اجزاء مش فاكرها و كانت تخلص 75 او 76 الف ج, و رحت ركبت بورا بعديها م 2000, صدقنى استريحت فى البورا عنها, قعدتها و صالونها امتع.
اوكتافيا 2003 حالة معقولة تعمل فوق 72, و 2005 او 2006 بتتكلم من 77 الى 82 الف, فوق 2006 هيتكلم معاك 85 الف او اكتر.
التوليدو الضايع بيتكلم من 50 الى 56 مثلا, و النضيف على حسب حالتو و موديلو من 60 ل 65 الف ج.
الباسات مشكلتها مش العفشة بس, لأ العربية ثقيلة جدا على الموتور ,و على فكرة النضيف منها 1600 سى سى اوتو هيدخل على ال 70000 ج, و متوسط اسعارها قريب من البورا عموما.
افضل الاختيارات من كل ده لو مش فارق معاك اعادة البيع و الخسارة هى الأودى A4, و غالبا صعب تلاقى فى مصر بعد 1998 و ول الحالات بتتكلم من 60 ل 65 الف ج, و يا سلام لو بفتحة سقفو فى منها كتير, هتاخد عفشة و ثبات الباسات و العربية مش ثقيلة على الماتور زيها, و صالون داخلى افضل من كل العربيات السابقة, بس هتيجى تبيع هتغنى ظالموه.
شكرا يا فندم على الرد المفصل وانا فعلا كان كلامي على الموتور 1800 التربو بالفتيس المانيوال بتاعه الـ 6 نقلات بس لما سألت عنه لاقيت الموضوع هيعدي الـ 20 الف موتور وفتيس وعفشه - لاحظت انهردا موضوع فى قسم الفولكس عن الباسات وأحد الاعضاء قال ان الموتور 1800 بالفتيس بتاعه بـ 7 الاف جنيه معقوله فرق السعر الضعف فى التربو ولا اسعار قطع الغيار نزلت السنادي ؟
خالص الشكر ليك يا كبير الفولكساويه :Copy of m-s5:
بص أولا الأسعار بتتفاوت من تاجر لتاجر, خصوصا فى الاستيراد و أخص فى الحرفيين, يعنى مثلا كنت بجيب مراية لسيارة زوجتى (فيات سيينا) اول واحد قلى 150 و التانى قلى 200 و الثالث قالى 100 و حلصتها على 80.
و كنت بدور على دنجل لسيارتى البورا, مفروض فاضى من غير الطنابير بيعمل 600 و كامل بيقولو 1000 او 1100 بس مفروض يخلص على 900 (و منهم واحد مفروض معرفة و بشترى منو حاجات كتير بس مكنش عندو دنجل حالتو كويسة), المهم رحت للميكانيكى بتاعى هناك فى الحرفيينو خدنى و بدأنا نلف وكان فى واحد شكلو جديد شوية, المهم قالى الدنجل كامل على 500, طبعا كلبشت فيه و خدتو الحمد لله.
فلو انتا رايح تسأل على قطع غيار كده و السلام هتسمع اسعار عالية و تطفيش (من ضمنهم اسعار المواتير طبعا) لكن لو جد و هتلف كويس و تفاصل و خصوصا لو ليك حد هناك هتاخد اسعار حلوة.
كونترول البورا كنا شاكين فيه و عاوزين نغيرو لما انا سألت اتقلى 600 ج ,لما واحد صديق عزيز ليا و ليه ناسو هناك كلمهم, قالى خدو و متدفعش و لو تمام الحساب هيكون 350 ج (بص اعتقد ده كده سعره تجارى).
عموما مواتير التربو متعبة شوية فى قطع غيارها و تصليحها ,و ناس كتير بأت بتهرب منها, و على فكرة لما سالت من سنتين على الماتور التربو بفتيسو اوتوماتك تقريبا واعتقد العفشة كان الكلام على 15000 ج و لسه فيه فصال.
اعتقد العاوز يسقط فالأفضل هو الماتور ال 1800 العادى, 20 فالف و بيطلع هورس عالى (128 حصان) و ما بالك 128 حصان فعلى المانى, يعنى عندى 102 حصان و اسال على تسارع الاوكتافيا a4 و البورا على سرعات بعد ال 100 لو الماتور سليم.
و بسمع ان قطع غيارو متوفرة بس مسألتش بنفسى.
نصيحة ابعد عن المواتير التربو