زي ما كنت بدافع عن البنات وكنت حامل لواء راية الدفاع في موضوع التحرش....هنا بقا هتحول واحمل راية لواء الدفاع عن الرجالة والشباب المغتصب حقهم.
استعنا عالشقا بالله :Z
أولاً كون انك مش لاقي عروسة معناه انك لسة فيك عقل وبتدور كويس ومستسلمتش للي حواليك ولنفسك ودا في حد ذاته شيء ايجابي.
ثانياً، اعرف تماماً يا صديقي ان البنات مبيعجبهاش حاجة، ولو جبتلها قصر في الدنمارك هتقولك انت معملتليش حاجة، فلازم من دلوقتي تعرف انك مش لازم تقتل نفسك ولكن لازم تلبي مطالب ضرورات الحياة
الواحد عشان يتجوز محتاج التالي
1- شقة يعيش فيها
2- عفش جديد
3- مرتب ووظيفة ياكل منها عيش
لو توفرت فيك الصفات الماضية، روح اتجوز وبقلب جامد، لو معجبهمش طظ فيهم وشوف اللي بعدهم، لو معجبهمش طظ فيهم برضو وهكذا....
ثالثاً، الجواز مش لعبة حربية في اللي يوفر اكتر!، يعني ميبقاش كل همك انك تحاول توفر لانك أصلا مش هتعرف توفر حاجة، واي فلوس انت محوشها هتتصرف، اياك تعمل ذكي ودايما حاول تقول نعم وحاضر وياريت تعمل كشف حساب شهري ليهم عشان يعرفوا انك مفلس دايماً.
طبعا دا حساب غير حسابك الأساسي ياناصح لو معاك قرشين مخبيهم.
رابعاً، لو البنت مش عاجباك كشكل يبقى اوعى تتجنن وتفكر تخطبها، لانك مش هتنبسط في حياتك ابداً، وايوة لازم تكون عاجباك حتى لو مش عاجبة اهلك كشكل لازم تعجبك انت. وسيبك من اللي هيقولك مش هتلاقي كل حاجة الجمال والادب والدين...لاانا بقولك هتلاقي كل حاجة الجمال والادب والدين ولكن مش هتلاقيهم كلهم 100، يعني هتلاقي الادب 50%، والدين 20%، والجمال 30%، مثلا وهكذا تكمل ال100%.....وهكذا بقا ممكن النسب تختلف ولكن الاكيد انك ممكن تجمع بينهم كلهم ولكن بنسب .
خامساً، العروسة الاستبن لازم تكون جاهزة دايماً، زي ما كلنا عارفين البنات دايما بتعمل راجل استبن لحياتها، انت لازم يكونلك واحدة استبن برضو بحيث لو زهقت من دي ولا قلبتها لازم يكون عندك الاستبن اللي هيهون عليك الموضوع و مين عارف يمكن الاستبن يبقى من نصيبك وتتجوزها.
سادساً، البنات مهماش عارفين مصلحتهم، ومهما حاولت تعرفها ان في حاجات ملهاش لازمة هي طرشة يابني ومش سامعاك اساسا، هي كل همها انها تتمنظر قدام بنت خالتها وقدام قرايبها انها جابت كذا وعملت كذا وهتعمل الفرح في كذا.....فمتتعبش نفسك معاهم وحطهم قدام امر واقع، دي ظروفي ودي امكانياتي.....مش عاجبكم بلوها واشربو ميتها وخلوها تعنس بقاً.
سابعاً، متعملش فرح بكام الف جنيه عشان المعازيم ياكلو ويشربوا ويشتموكم لما يروحو، متعملش فرح غير لو هيجيلك نقطة قد الفرح مرتين،او لو ليك معارف مهمين ومجيتهم الفرح هتعملك show في الكارير بتاعك، غير كدا تبقى اتجننت رسمي وقولهم لو عايزين فرح فخم يبقى النص بالنص او بلاش منه خالص.
ثامناً، الأهالي المحترمين مش عايزين غير راجل بيخاف ربنا ويقدر يفتح بيت وعنده شقة.....فلو لاقيت ابو البنت او امها وافقو عليك لمجرد انك محترم ومتدين وتقدر تفتح بيت...يبقى لازم تمسك فيهم بإيدك وسنانك وتعرف انهم ناس محترمين وصعب تلاقيهم الايام دي ومتغامرش وتسيبها لاي سبب غير لو احد التحذيرات في النقاط السابقة.
تاسعاً واخيراً.....اوعى خطيبتك تحاول تخنقك وتقولك بتكلم مين ومبتكلمش مين.....لازم تديها بالشلوت من أول يوم وتعرفها انك انت الراجل وانك ليك زمايل واصدقاء من الجنسين ولو مش عاجبها يبقى تروح تتجوز واحد من كفر ابو جبل.
وشكراً ولاداعي للتصفيق الحار :)