شحنت التكييف و لسه ضعيف

**eyeswizard** · 05-05-2012 12:55 PM

من حوالى شهر و نص كده شحنت تكييف العربيه
اشتريت 1 كيلو فريون 134 من اولاد رزق
كان تقريبا عامل 95 جنيه
مش عارف ده كتير ولا قليل
المهم روحت و شحنت التكييف و الراجل ظبطه على 30
كان عاوز يظبطه على 28 بس انا قولتله خليه على 30
دلوقتى التكييف فى الزحمه و الشمس مش بحس بيه
مجرد هوا شبه ساقع حتى على اعلى درجه
بس بالليل لما بشغله بيبقى الهوا بارد جدا
كمان الثرموستات مش بيفصل الكومبرسور يعنى شغال علطول
تنصحونى بايه ؟؟؟
العربيه هيونداى فيرنا 1500 سى سى

**shawkylotfy** · 05-05-2012 06:31 PM

شغل التكيف بالنهار وتاكد ان مروحة المكيف الى جمب مروحة الراديتير شغالة كويس

**wera** · 05-05-2012 08:05 PM

لو الكومبريسور مش بيفصل بالنهار بس (لما بيكون الهوا مش ساقع) دا طبيعى لانة ماوصلش لدرجة الحرارة المطلوبة اما لو مش بيفصل حتى بالليل لما بيكون الهوا ساقع زى ما بتقول يبقى فى مشكلة فى الثرموستات ياما اسلاك الكهربا بتاعتة مش واصلة كويس ياما عايز يتغير
اما بالنسبة لسقوعية التكييف روح للراجل تانى خلية يراجع على ضغط الفريون لو نقص عن 30 يبقى فى تهريب فى دورة الفريون لو الضغط زى ما هو يبقى راجع على المواسير لان ممكن يكون العزل بتاعها فك ولو طلع العزل سليم خلية يبص على الثلاجة الى ورا التابلوة ممكن تكون مملحة اعتقد ان دى كل الاحتمالات الواردة وطبعا ما تنساش موضوع المروحة زى الاخ العزيز ما قالك

**eyeswizard** · 06-05-2012 12:30 PM

طيب و لو موضوع الثلاجه ده صح
هحتاج انى افرغ الشحن و اشحن تانى ولا هتنفع تتنضف من غير الشحن ما يطير ؟

**engwael** · 07-05-2012 01:17 PM

لازم هاتشحن تانى بس نصيحة ماتسبش الصنايعي لوحده يفك التابلوه لان الموضوع ده صعب وعايز طولة باااااااااااااااااااااااا ل وطالما هاتفك يبقي تكبس دائرة الفريون الداخلية والخارجية وقبل كده غير كل الاورنجات الخاصة بالثلاجة الداخلية

**dr.hazem** · 07-05-2012 01:53 PM

الفريون الزياده يعمل نفس المشكله على فكره
ياريت حضرتك تتأكد عربيتك بتتظبط على كام وتظبطه بالظبط

وحاجه كمان

قيس الضغط من بلف الضغط الواطي وشوفه عالي على طول ولا بيقل لما تكبس بنزين لو مبيقلش كده الكباس كبسه وحش وليها حل انك تلغي بلف الضغط العالي ونسبة نجاحها 80%

تحياتي

**eyeswizard** · 07-05-2012 03:52 PM

اه ياريت توضح حضرتك موضوع بلف الضغط العالى و الواطى لان اللى انا شوفته فى العربيه هو بلف واحد اللى هو لما بشغل التكييف بيكون ساقع جدا ده
لكن معرفش التانى فين الحقيقه و غالبا مش موجود