الحمد لله علي نعم الله وفضله علينا
بسم الله الرحمن الرحيم وبه نستعين
طبعا معظم الاعضاء متزوجون ولديهم اولاد ربنا يحفظهم من كل شر دي حكايتي مع مرض ابني محمد
في شهر 2 اللي فات وتقريبا بعد 10/2/2012 محمد جاله دور برد وسخانه عادي جدا اخد مضاد حقن واخد دواء شرب وخافض فضل عيان حركه اسبوع المهم انا اول يومين والتالت اخدت الدور ورقدت وامه اخدت الدور ورقدت وهي حامل طبعا قمت وديتهم عند امها علشان يلاقوا رعايه لاني مريض وملازم الفراش
المهم الواد خف الحمد لله ورجعنا البيت بس محمد مش مظبوط حركته اقل من الطبيعي قلنا عادي طالع من دور شديد وعدي يومين او تلاته ولقيت الواد بيتدهور وخصوصا رجليه يمشي زي السكران اتصلت بكام دكتور اصحابي وكله يقولي اكله كويس هو ضعيف ورفيع علشان كده خليه ياكل كويس وهو هيفوق
المهم الواد تعبان وبيصحي يقعد علي السرير وبطل جري خالص خالص
اخدته وطلعت علي دكتور شاطر في الاطفال كشف عليه وقاللي ده عنده اللتهاب في الاعصاب واداله كورتيزون لمده اسبوع وطلب تحليل دم وتحليل براز
بعد يومين قلقت ورحت بيه دكتور عظام طمني انه كويس ومفيش حاجه والدنيا تمام
وبعد يوم واحد قلقت اكتر وكلمت كام دكتور معرفه بس مش من زمايلنا ناس كبيره وليه خبره اكتر قالولي ده تروح بيه لدكتور اعصاب المهم شويه وانا في الشغل بالليل اتصلت بيا المدام من بيت امها بتقوللي الواد ضايع خالص ومش قادر يوقف (انا اتجنيت ودماغي طارت) لحسن الحظ كان معايا الدكتور اللي ماسك الصيدليه بتاعه المستشفي الدولي قاللي يلا ناخد محمد نطلع علي المستشفي
قلتله خلينا بره عند حد متخصص قاللي الدكتور فلان مش موجود مسافر والدكتورعلان مش موجود برضه قاللي الموجود في المستشفي هيكون افضل من اللي بره تعالي معايا رحنا وقابلنا دكتور شاب وفحص محمد وقاللي كويس بس اديله فتره وهو هيخف لوحده
في لبفتره دي محمد كان بقاله 5 ايام بياخد كرتيزون والتحاليل المطلوبه طلعت وانا مش قادر استني رحت حاجز تاني عند دكتور الاطفال المهم شرحناله رحنا فين وفين وعملنا ايه وشاف التحاليل
طلع فيها انيميا بسيطه وعنده اميبا متكيسه المهم بطلنا الكرتيزون وادالنا حديد وكالسيوم ودواء للاميبا
وبعد جدال شويه قاللي اديله 10 ايام وهتلاقيه بيتحسن وبعد شهر بالكتير هيخف ان شاء الله
وسط الكلام ده قابلت واحد صديقي عنده مشكله مع بنته وبيعالجها اعصاب في سوهاج المهم قاللي معلش تعالي نكلم الدكتور بتاع سوهاج اللي بيتابع بنتي قلتله مقدرش اسافر المدام خلاص داخله في التامن وندي الواد فرصه علشان الدواء يجيب مفعول وبعدها بيومين جاني تحت البيت ورن عليا ونزلتله قاللي خد الدكتور معاك كلمته وقعد يسألني شويه اسئله وفجأه وقعت في ودني كلمه (شلل رخوي) طيب يادكتور ايه العمل قاللي روح لدكتور الفلاني ده زميلي ولو فيه حاجه احجز وتعالالي ضروري
مطلعتش البيت ركبت مع صاحبي ورحنا للدكتور وحجزنا تاني يوم ورجعت البيت وانا بقول الواد كويس ان شاء الله وبطمن نفسي والدنيا عادي وخير ومفيش حاجه
كلمت المدام قلتلها بكره معانا كشف وبتاع معترضدش وتاني يوم بالليل رحنا برغم ان احنا حجزنا بالنهار وانا رايح رجل ورا ورجل قدام دخلنا وكشف الدكتور وبعد كده راح بصصلنا وقالنا ده اشتباه بحاله شلل رخو
طبعا المدام سمعت الكلمه ووشها مش قادر اوصف تعبيره ايه (المدام معاها اخ جاله شلل بسبب جرعه فاسده)
وبدانا نناقش الدكتور بهدوء وده راح مكشر فينا وانتوا فاكرين الشلل ده ايه واهو فيرس وبيعمل التهابات في الاعصاب بس الفكره انه مبيخفش والواد هيفضل كده
طبعا المدام انفجرت في البكاء وانا عنيا رغرغت (وبيني وبين نفسي عمال اقول الحمد لله لو ليه نصيب الحمد لله ولو خف الحمد لله ربنا اعلم بمصلحته فين ) المهم مسكت اعصابي بكل برود وسلمت علي الدكتور وشكرته ومشينا من عنده نزلنا في العربيه وانا اهدي فيها واقولها ده حمار مبيفهمش ثم هو قال احتمال مش اكيد واحتمال ضعيف كمان
المهم طبعا حياتنا اتغيرت 180 درجه بعد الكشف ده
اشترينا الدواء اللي كاتبه الدكتور الذكي وكان طالب اكتر من طلب اولا لازم نبلغ الصحه لان التحليل بتاع الشلل في الصحه فقط ورسم اعصاب ورسم عضلات
اتصلت بصديقي الدكتور الحسيني (علاج طبيعي) وحكيت معاه اللي حصل من طقطق الي سلاما عليكم المهم الراجل اتصل بمديره الصحه الوقائيه وبعدها كلمني قاللي تجيللي هنا حالا
................نتابع بالليل لاني بجد تعبت من الكتابه
(الحمد لله محمد بدأ يتحسن لاكن كان عنده ايه هنعرف كمان شويه)
احنا كده في شهر 3