التكييف بيسخن العربية !

**abdo_2812** · 06-05-2012 04:32 PM

السلام عليكم ورحمة الله وبركاته

الوحوش الأحباء أرجو منكم المشورة في هذه المشكلة

التكييف لما بشغله وأمشي شوية أحيانا بيسخن العربية ومؤشر الحرارة يعلى جامد ولما أطفي التكييف الحرارة ترجع طبيعية فورا !

حد حصله كده قبل كده ؟!

العربية ميجان 2008

**habib47** · 06-05-2012 05:12 PM

المروحة مش بتشتغل علي السرعة الثانية يعني السريعة مع التكييف

**shawkylotfy** · 06-05-2012 06:31 PM

لو السرعة الثانية شغالة يبقى شيل ثرموستات الكوعة
لو السرعة الثانية بتاعت المروحة مش شغالة يبقى هى السبب

**aboharb** · 06-05-2012 06:34 PM

هم يبكى وهم يضحك انا اول ما التكيف بشتغل العربيه بتبرد سريع يعنى لو مشيت بيه كيلو مؤشر الحراره يجيب الصفر واضطر اقف واطفى التكيف

**shawkylotfy** · 06-05-2012 06:52 PM

المشاركة الأصلية كتبت بواسطة aboharb

هم يبكى وهم يضحك انا اول ما التكيف بشتغل العربيه بتبرد سريع يعنى لو مشيت بيه كيلو مؤشر الحراره يجيب الصفر واضطر اقف واطفى التكيف

انت عربيتك اية ؟

**midofayad** · 06-05-2012 07:21 PM

مشكلة بسيطة ان شاء الله و هى بسبب السرعة التانية للمروحة و ده حلها بالتفصيل و مش هتكلفك 50 جنيه

المشاركة الأصلية كتبت بواسطة midofayad

ان شاء الله بسيطه و هتلاقيها ممكن يكون فيوز باظ فى علبة الفيوزات و هيتغير بسهولة عند اى واحد كهربائى كويس يفهم فى الرينو و هو هيفك البطارية و يطلع العلبة و يشوف ايه اللى بايظ و يغيره و مش هتكلفك كتير ان شاء الله و فى اسوء الاحوال تكون المروحة هى اللى بايظه و تحتاج انك تغيرها بس ان شاء الله تكون فيوز و بس
انا لسه الحركة دى حاصلة معايا من اسبوع بس عندى كانت المروحه شغالة بس مش بتشغل السرعة التانية و لقيت العربية بتسخن لما اشغل التكييف و انا واقف لكن و انا ماشى مفيش مشكلة و من غير تكييف مش بتسخن و رحت لواحد شافها و طلع فيوز بايظ و غيره فى ربع ساعة بالظبط و اشتغلت المروحة تانى تمام

المشاركة الأصلية كتبت بواسطة midofayad

علبة الفيوزات دى بتكون جنب البطارية من ناحية الرفرف و عشان يطلعها بيفك البطارية و يطلعها بره و بعد كده يطلع علبة الفيوزات و يشوف ايه لللى بايظ و يغيره و بيكون موجود اكتر من مكان لتثبيت الفيوز الجديد فيه يعنى الفيوز بيكون سايح و مبوظ مكانه بس بيكون جنبه مكانين كمان لتركيب الفيوز الجديد و ممكن يستخدم نفس الفيوز القديم يعنى مجرد انه ينقله من مكانه للمكان اللى جنبه لان مكان تثبيته القديم ساح و هو رخيص جداااا و الحكاية كلها مش هتكلفك اكتر من 50 جنيه ان شاء الله بس يا ريت تروح لكهربائى فاهم هو بيعمل ايه عشان يعرف يفك كل حاجة صح و يركبها تانى صح و ميبوظش حاجة و اعتقد ان اى كهربائى بيتعامل فى العربيات الجديدة هيعملها فى ثوانى و هينضفلك علبة الفيوزات كلها باسبراى عشان تبقى كلها تمام

**aboharb** · 06-05-2012 07:21 PM

المشاركة الأصلية كتبت بواسطة shawkylotfy

انت عربيتك اية ؟

اكسيل 96 1500 cc

**abdo_2812** · 06-05-2012 07:46 PM

جزاكم الله كل خير

إن شاء الله بكرة هاروح لكهربائي وأقولكم عملت ايه

**Rsarabia** · 06-05-2012 08:34 PM

لو السرعة التانية شغالة تمام هيبقى المشكلة غالبا فى كوعة الثيرموستات
بس خلى بالك
قبل ما تغيرها لازم لازم تراجع على الرادياتير فكه و نضفه كويس عند حد بتاع رادياتير لان اللى حصل عندى انى غيرت الكوعة و فضلت العربية تسخن لكن لما نضفت الرادياتير و ركبت الكوعة القديمة كل حاجة تمام التمام

**abdo_2812** · 10-05-2012 02:51 PM

المشاركة الأصلية كتبت بواسطة rsarabia

لو السرعة التانية شغالة تمام هيبقى المشكلة غالبا فى كوعة الثيرموستات
بس خلى بالك
قبل ما تغيرها لازم لازم تراجع على الرادياتير فكه و نضفه كويس عند حد بتاع رادياتير لان اللى حصل عندى انى غيرت الكوعة و فضلت العربية تسخن لكن لما نضفت الرادياتير و ركبت الكوعة القديمة كل حاجة تمام التمام

فعلا أنا لما رحت للكهربائي ركب دعامة سلك للفيوز علشان قالي انه بيهرب وبعد كده فضلت تسخن فتاني يوم قالي كده شكلنا هانغير الثرموستات والكوعة بس خلينا نجرب الأول نغسل السربنتينة وفعلا غسلها بمدفع المياه وبعدها الحمدلله العربية بطلت تسخن

جزاكم الله كل خير وياريت أي حد يجرب الغسيل قبل ما يدبس في ثمن ثرموستات وكوعة وفي الآخر يطلع مش هما

ربنا يباركلكم ياوحوش :)