هوا أنتم ليه في قسم ديهاتسو زعلانين من تويوتا ومبتكلومناش !!! @

اعزائي احبابي واخواني .... تحية طيبة لقسم ديهاتسو الي مخاصمنا ومبيكلموناش. ولا بيجو عندنا حتى يشقروو ويسلموا على اخواتهم في قسم تويوتا ويشوفوا عاملين ايه واخبركم ايه ... فقلت اجي بنفسي اسلم عليكم والقي التحية عليكم فرداً فردا ونكاً نكاً واسماً اسماً

واشوف حبايبنا اذا محتاجين حاجة ناقصهم حاجه. عاوزين اي حاجة في القسم هنا قولوا على طول ومتتكسفوش تحبو نبعتلوكم موضوع موضوعين من عندنا انا معنديش اي مانع ....
ياجماعة شركة تويوتا. وشركة ديهاتسو شركة واحدة وتوكيل ديهاتسو في مصر هوا هوا توكيل التويوتا في السعودية التريوس هيا هيا الراف فووور. والسريون هيا هيا اليارس بس دي بشنطة ودي هاتش باك فينفع كده تخاصمونا ومنوطدش العلاقات الاجتماعية فيما بينا

لو حد زعلكم في القسم عندنا قولولي على طول وانا اشدلكم ودانو واخصم عليه مشاركتين واللهِ ... وطبعاً لانسى ادحرك التماسي على كل اعضاء ديهاتسو المحترمين. واشقائنا وأولاد بلادنا حبايببنا وانا جي بنفسي النهرده. عاوز اعزمكم على مقابلة يوم الخميس وهيا مش مقابلة بمعنى الكلمة لكن مبادرة للقاء المجاني لدردشة الاعضاء ونتعرف ببعضينا ونتعرف بمشاكلنا اكتر واكتر ياريت يا جماعة تشرفونا وتنورونا هنكون سعداء بيكم جداً جداً
http://www.nilemotors.net/Nile/287047-6.html
ياريت يا جماعه تأكدو حضوركم وتنورونا. وتشرفونا لان تويوتا وديهاتسو ايد وحدة ... وشركة وحدة وقطع غيار وحدة وتحياتي ليكم يا غاليين

عندك حق يا ميدو يا حبيبي والله

فعلا القسم هنا مش واخدين بالهم خالص من اخواتهم فقسم تويوتا

اتمني انهم ينورا ......

تحياتي ..

اه واللهِ يا بوحميد. يعني انا مبطلبش منهم مثلاً يجبو حاجة وهما جاين عندنا مثلاً صنية بسبوسة بالمكسرات ولا كيلو يوستفندي او حتى يخشو علينا ببطيخة كده حمرة وشوية جبنة بيضة ونديها لا لا لا اطلاقاً ده كفاية والله ِ انهم يجو ويخوشوا عندنا كده وينورونا انشالله حتى يجو كده ونحط العشا في قسم تويوتا على الطبلية ونقعد على الارض ونتعشى سوى والجودة بالموجودة .... ده كفاية في وسطيكم ابو عبدالله. الراجل الي زي السكر الي كل الناس عندنا في قسم تويوتا بل المنتدى بحالو بيحترمو وبيحبو وبيقدرو. ، يعني انتم هتبقوا من ريحة الحبايب. ومن طرف حبيبنا أبو عبدالله الغالي

ملكش دعوة بقسم ديهاتسو
اصل انا عارفهم وكنت وماظلت منهم يسكتوا ويغيبوا بس بيرجعوا اجمد من الاول
وحوش وحوش يعنى

لا ياعم محمد ازاي بقة مليش دعوة بيهم ههههههه وبعدين ان مكنتش انا اسئل عليهم اومال مين الي هيسئل عنهم بس يا بوحميد ، وعلى فكرة ياجماعه ميدو سريون ده جاسوس معاه كورولا بس مش راضي يقلكم. ههههههههههه. حبيب قلبي يا ميدو باشا احنا على ميعادنا انشاء الله يوم الخميس انشاء الله

كفاية ميدو يا ميدو علينا
ومازلت اتمني المزيد لان القسم ده نصنا التاني
...

انا صعبان عليا واللهِ يابوحميد انهم قاعدين كده وقافلين عليهم الباب. .... ده حتى شبابيك القسم ولا حتى الشيش. مفيش مره لقيت حد بيخووش يفتحو هنا في القسم ، ويهوية ، وولا مرة شفت عيل كده واقف قدام باب القسم ماسك جردل وبيرش مية كده قدام ديهاتسو زي زمان ، المرة الي فاتت وقفت ساعة قدام باب قسم ديهاتسو وقعدت ارن الجرس ارن الجرس ان حد يفتحلي. لدرجة اني قلت ألله هو مفيش حد جوووه ولا ايه فانا بس لازم اسئل واطمن عليهم ده حتى النبي وصى على سابع جار ، وعمر ما الكوتش يطلع من جنطوووووو ...... ولا البانزين يبقى مية ابداً ابداً لازم نحافظ على علاقات الود فيما بينا ولا ايه !!!

عندك حق يا ميدو والله

هنعمل ايه بقي

لازم يظهروا ويقولوا جاين احنا موجودين

وكما قال الشاعر المجهول الي هو انا :

--- انا هحضر مقابلة ميدو اذن انا مــوجــود ---

ههههههههههه ااااااااااااا الله صح لسانك يا معلم على قولت اخونا السعوديين حكم واللهِ حكم يابوحميد ، بس مش ملاحظ ياباشا ان كانو مفيش حد في القسم هنا غيرنا احنا بتوع تويوتا ، يمكن هنا في ديهاتسو. بينامو بدري مش زينا بتووع الليل واخرو هههههه طيب يالله بينا نمشي من هنا لاحد يجي الصبح يلاقي حاجة متاخده من الموضوع بتاعو او من مشاركتو ويقولك اه مين الي كان موجود هنا امبارح في القسم. بالليل ااااه اكيد. هما بتوع تويوتا دخلو كركبولنا الدنيا .... حتى بص بص قشر الفستق واللب والسوداني واكلينو ورامينو على الارض ههههههه

علي رايك يا ميدو يلا بينا
انا مش عاوز الاقي نفسي ممسوك بطاسات سيريون ولا كاوتش بتاع تريوس
ويقولوا احمد وميدو بالليل
كانوا هنا والباب مفتوح ومفيش حد
وتيجي فينا احنا ....