الموضوع: في حد هنا من الزقازيق

السلام عيكم يا جماعة

باختصار أنا معجب جدا بالعربية بروتون بيرسونا وكنت بفكر أجيبها، لكن عايز أسأل لو في حد هنا من الزقازيق بيعمل ايه في موضوع قطع الغيار ولو احتاج يصلح حاجة في العربية بيلاقي حد يعرف يشتغل فيها ولا لأ.

ياريت برضة الناس اللي من أماكن تانية غير القاهرة واسكندرية والمنصورة اللي معندهمش مراكز صيانة معتمدة، يجاوبوني برضة بيلاقوا قطع غيار ولا لأ وبيلاقوا حد بيفهم في العربية ولا لأ.

أنا عارف ان أنا لازم أعمل صياناتي في التوكيل أو حتى مركز عصام وصفا أحسن، لكن أنا بتكلم على الحاجات المفاجأة اللي ممكن تحصل زي ان حاجة تبوظ وتحتاج اصلاح أو تغيير وأنا معنديش وقت أسافر اصلحها.

ياريت الناس تفيدني بخبرتها عشان أنا محتار جدا بين النيسان صني والبيرسونا ولو اني ميال أكتر للبيرسونا بس قلقان من الحاجات اللي أنا سألت عليها.

المشاركة الأصلية كتبت بواسطة mido_soliman

انا من الزقازيق بس مش مقيم فيها حاليا مقيم فى اكتوبر
بص يا سيدى

اى حاجة مفاجئة زى اية ؟
تغيير زيت الموتور ..........اى حد بيعملة
تغيير زيت الفتيس الاوتو تحديدا علشان عربيتى ............ اى ميكانيكى بيغيرة لانة فتيس كريستالة معروف عند اى ميكانيكى
تغيير التيول ............نفس الكلام والكلام على ان التيل الخلفى محتاج التوكيل والكلام دة مش صحيح هوة كل ما هنالك ان التيل الخلفى بيحتاج مفتاح معين علشان يضغط البستم وبالتالى يعرف يغير التيل لكن اللى عرفتة وعن تجربة
ان الميكانيكى بيتصرف :) بيعملوا مفتاح عمولة اخو اللى فى التوكيل بالظبط وشغالين بية زى الفل وانا عن نفسى مغير التيل برة

اللى عايز اقولهولك ان العربية مش معقدة ميكانيكيا خالص
وفى تشابة كبير جدا بينها وبين الكريستالة فى كل حاجة تقريبا وتحديدا موتور ميتسوبيشى بكون 4g92 باستثناء وش السلندر او الكامبرو ومعرفش دة بتاع انهى موديل بصراحة بس دى معلومة من اكتر من واحد فى الحرفيين

يعنى لا قدر الله لو فى حاجة مفاجئة حيتم تداركها بسهولة بس تروح لميكانيكى بيفهم عندك زى ابو زيد مثلا اللى فى الاحرار

غير كدة باة انا عايز اقولك ان العربية باذن الله مبتعملش دقات نقص خالص
يعنى عيوبها او مشاكلها دايما هايفة متوقفش او تخليك تعطل
المشكلة اللى فيها بتخلى العربية ماشبة عادى جدا بس مخليلاك مقريف مش اكتر ان وجدت
غير كدة متقلقش مش حتعطل وتغنى جنبها ظلموة :)
والعربية بسم الله ما شاء الله مش منتشرة فى الزقازيق اوى انا كل اللى شفتهم 5 او 6 جين على بيرسونا فانت حتكون من الصفوة :)))
توكل على الله ومتسمعش كلام الفتايين الله يكرمك

الف شكر لرد حضرتك أكيد هيفدني قوي لأني بحاول أوصل لقرار في خلال أيام لأني ناوي أشتري بعد اسبوع ان شاء الله.

حضرتك وضحتلي حاجات في العربية مكنتش أعرفها، أنا برضه ناوي على أوتوماتيك ان شاء الله، وربنا يسهل لأن فعلا موضوع اختيار نوع العربية ده صعب قوي.