الموضوع: هام: تحذيرات مختلفة من ظواهر أجرامية منتشرة اليومين دول

المشاركة الأصلية كتبت بواسطة solycar

تصدقوا بالله

انا بقيت اتخنق ادخل على المنتدى من كتر المواضيع المقرفة اللى تخنق و تحرق الدم

من سرقة الى ضرائب الى كوارث الى فساد الى الى الى ...................

مفيش اى حاجة تدعو الى التفاؤل

كلها حاجات نكد

و بردو مش قادر اقولكوا خفوا منها شوية لانها موجودة فعلا
يلا

ربنا يصبرنا على ما بلانا

لا داعى للخنقة ولا حاجة ريح نفسك ولا تدخل 000 لان هذه الامور مهمة فى حياتنا جميعاً وتعطى انذار للجميع وليس لفئة معينة ، ولكن الرجاء فى اى حكاية او قصة تحكى بالمنتدى ان يكون راويها وكاتبها غير مبالغ فى قصتة لان هناك اناس تتوهم وتخاف بصدق من هذه القصص
ولكن العيب اصبح فى الجانب الشرطى فى مصر وهوعدم الاهتمام بالجانب الجنائى ، والذى توارى بجانب الناحية السياسية ! واتمنى من الناس جميعاً ان تعود اليهم الشهامة والمروءة ولا يتفرج على مصيبة غيرهم ويقف مكتوف الايدى ( ويقول وانا مالى ) بالله عليكم هل هذا هو شعب مصر المعطاء الذى يمتلء بالشهامة والرجولة

لا حول ولا قوة الا بالله.
زمان مش زمان اوي يعني كنت لما اسمع عن الحاجات دي مرتين تلاته كل كام شهر اقول يا رب ارحمنا وكنت اتهكم واسخر واقول هو احنا في شيكاغو ولا ايه !! الكلام ده بره لكن جوه مافيش الكلام ده احنا في بلد الامن والامان.

مابقتش اقول الكلمتين دول بعد ما بقيت اسمع عن الحاجات دي مرتين تلاته كل يوم مش كل كام شهر وبقيت حاسس ان الجماعه اللي في شيكاغو دول هايقولوا يا عم انت فاكرنا في مصر القتيل يتقتل والناس ماشيه عادي !! مش عاوز اكون متشائم اوي لكن والله انا في حاله نفسيه زي الزفت ومن يومين حصللي موقف هاحكي عليه كنت ناوي اسكت عشان ماخاوفش الناس لكن طالما الموضوع كده هاقول ...اول امبارح كنت راجع من مشوار بعيد شويه على 10 بالليل وقلت اريح شويه من السواقه المهم كنت في شارع المرغني قلت ادخل ناحية الشارع بتاع كلية البنات واريح شويه واهو لا شارع في مكان نائي ولا مقطوع ولا اي حاجه المهم فضلت 5 دقايق كده سرحان شويه بس لفت انتباهي اتنين على بعد امتار من عربيتي بيبصولي اوي ونظراتهم مريبه فانا قلت اخلي زجاج العربيه تلته مفتوح كفايه واتأكدت ان السنتر مقفول وقلت اجمد قلبي واشوف انا ليه قلقان وايه ممكن يحصل وفضلت اقرأ قرآن لغاية ما تأكدت ان هايحصل حاجه من الشباب دي فضلوا يلفوا حوالين العربيه مرتين تلاته قلت بلاش تلت الزجاج المفتوح ده كمان اقفله ونشوف وتعمدت والعيال دي قريبه من العربيه اعمل اني باتكلم في التليفون واعلي صوتي قال يعني باكلم النجده وقصدت اسمعهم ( يا فندم في في شارع كذا كذا شباب شكلهم مريب ومش عارف اعمل ايه ) تخيلت انهم هيخافوا مثلاً لكن مافيش وعي تقريباً المهم بعدوا شويه ولقيت واحد جاي من باب اليمين ورا وبيفتحه مافتحش وانا طبعاً مش عارف اعمل ايه هانزل من العربيه ولا اعمل ايه اختفوا على طول اول ما باب العربيه ما فتحش وانا مستحملتش ومشيت اصلاً .

الخلاصه مش قصدي احكي حكايه ونقول حسبنا الله ونعم الوكيل وبس ...تعالوا نساعد بعض احنا اكيد خبراتنا متفاوته واعمارنا متفاوته برضه وثقافاتنا صحيح كلنا مصريين وقريبين لبعض في الطباع لكن اكيد مننا اتعرض لمواقف علمته حاجه وهكذا.

موقف زي ده مفروض نعمل ايه فيه ؟ هل نجري ولا ننزل من العربيه والله اعلم بقى ناخدلنا ضربه بمطوه ولا اي حاجه ويتاخد اللي معانا ؟ ولا نكلم النجده ومفروض نقول ايه ؟ والنجده دي هاتنجدنا ولا مش هيردوا علينا اصلاً ولا ايه بالظبط ؟ طب احنا في عربيات وممكن نقفل على نفسنا ونطلع نجري ...........اللي ماشي على رجله ده مفروض يعمل ايه ؟ الناس بقت سلبيه بطريقه غريبه وصدقوني والله انا نفسي كمان حسيت ان صابني مرض التبلد ده في حاجات كتير من سنين كنت بانفعل لما بتحصل قدامي دلوقتي بقى عادي وحالي حال الناس كلها مفروض نعمل ايه والله ما عارف انا بجد مخنوق جداً ومش عارف اعمل ايه ولا افكر ازاي الحاجه الوحيده اللي كانت مصبراني على السيرك اللي عايشين فيه ده هو الامن اللي عايشين فيه هل ممكن نرجع الامان ده زي زمان ؟ هل ممكن طيب نحس بيه تاني ؟ وهل دي مشكلتنا احنا ولا مشكله حكومه وداخليه ؟ على فكره من اسبوعين تلاته كان في مشاكل في مدينة نصر وكانت اللجان والكماين للتفتيش كل شبر في عباس العقاد ومكرم عبيد ومصطفى النحاس......يعني تواجد امني موجود ايه المشكله ؟ صحيح كان مكثف لوجود مشكله الله اعلم بيها لكن اه موجود المشكله فين بقى ؟ انا حاسس اني بعد شويه هاحبس اهل بيتي والله العظيم وانا بس اللي هانزل بس وبعدين مش في اشغال ....بناتنا يروحوا فين امهاتنا واخواتنا هانعمل فيهم ايه ؟ مفروض نسلح كل واحده منهم ببازوكه مثلاً . عارفين انا جربت بس افهم والدتي انها تمشي بي صاعق كهربائي او حتى سيلف ديفينسر جالها صرع وقالتلي ايه يابني ده !! هو انا ماشيه في الشارع لوحدي الناس كتير حواليا .........المشكله ان الناس بقت موجوده ومش موجوده والله ايه اللي حاصللللللللللللللللللل ؟

انا آسف على انفعالي بس بجد انا في حاله نفسيه صعبه جداً وموضوع احمد ده خلاني انفجر وبصراحه ماليش مكان تاني اتكلم فيه واشكي حالتي النفسيه دي. جزاكم الله خير وربنا يبارك فيك يا احمد على الموضوع ويجعله في ميزان حسناتك ان شاء الله ويحفظك انت واهلك وكلنا اجمع ان شاء الله.

إذا ضاقت الدنيا بك .. فصرت جائعاً .. خائفاً من الغد .. لا تجد مكاناً يؤويك ، ولا عمل ، ولا ضمير ، ولا تشعر بآدميتك .. فطبيعي أن تكون واحداً من ثلاث :
1. تحاول أن تصلح حال البلد بالتغيير السياسي .. ولأن منافذ التغيير السلمي تقريباً مغلقة وسكتها طويلة .. فلن تجد أمامك إلا التغيير القسري يعني تبقى إرهابي ، ووقتها هتلاقي الداخلية والحكومة كلها فوق دماغك .. وتموت بلا دية أو تروح ورا الشمس .

2. تحاول أن تحصل على حقك مستخدماً ذات الأساليب التي تعاني منها .. فتسرق وتنهب وتبلطج فتخيف الناس حتى تطمئن ، وتجوع الناس حتى تشبع ، وتاخذ ثمرة عمل الناس وشقاهم لأنك لا تعمل ، وتشعر بذاتك وأنت ترى أكابر الناس يستعطفونك أو يسلموك كل ما تريد والخوف في أعينهم فتحقق لذاتك ما تتمناه ، وتشبع غريزة التشفي والانتقام .. فتصير مجرماً في بلد لم تعد تتصدى للمجرمين من هذا النوع وتفرغت لمكافحة النوع الأول .

3. إنك (سوري يعني ) تتنيل على عينك .. وتقعد تتفرج ، وتنأى بنفسك عن الدخول في أي مشاكل أياً كان نوعها ، وتمشي جنب الحيط ، وتختفي منك قيم الشهامة والمروءة ونصرة الضعيف ، فتصير سلبياً وتقول دائماً : " أنا مش معاهم " .. وحين تختار النوع الثالث كما اخترناه جميعاً فلا يحق لك الشكوى ولا تنتظر لأبناءك مستقبل أفضل .. ووطن أجمل ..

تقبلوا خالص مودتي