الموضوع: تسقيط موتور للكروز

المشاركة الأصلية كتبت بواسطة mariner2020

يبعت يجيب ايه من الخليج يا عم انت كمان .. أشهر مواقع البيع عن طريق الانترنت امريكية لو مش اخد بالك .. ده يجيب اي حاجة جديدة زيرو من ebay او amazon أو اي موقع امريكي متخصص في قطع الغيار .. وعن طريق شركة شحن مصرية ليها فرع هناك وتكلفة الجمارك 10% بس ويجيب بالكود حاجة تركب بدل ما يتعامل مع بهايم تعمل تباديل وتوافيق وتضيع الدنيا .. الحصول على قطعة لسيارة امريكية من اسهل ما يكون حتى لو العربية مفيش منها غير واحدة بس في مصر .. هيا الفكرة كلها في الحماس والتنفيذ بس .. بالنسبة لمين يسقطهاله على نضيف اي ميكانيكي امريكاني محترم ودول قليلين صحيح في كل محافظة بس في كتير يعرفوا ربنا فيهم ومش استغلالين .. زي ما في ناس عايزة الحرق .. وقبل التسقيط ممكن يجيب ابعاد الموتور بالبحث في النت والقواعد بتاعته بالصور او عن طريق اللي بيعدلوا في عربياتهم في الخليج .. مثلا جدة بويز .. منتدى محترم وفيه ناس بتعدل تعديلات مهولة .. كل ده بسيط هيا الفكرة كلها مين اللي يتحمس ويكون ليه السبق في التعديل ده .. على اد ما هوه حلو .. على اد ما يخوف لان محتاج ميزانية بالاضافة لانك هتكون اول من يجرب ودي مصيبة اصلا عايزة قلب ميت

بدون الكلام بطريقة "يا عم انتا" و الأسلوب ده, ما علينا, اولا انتا مقرتش ردد المواضيع كويس, اولا كروز واخدة اسم شيفروليه فقط لا غير, لكن مفيش اى حاجة فيها منتمية لشيفورليه هيا داييو لاسيتى تصميم و موتور و شاسيه و شالو اسم دايوو وعلامتها و بدلوه بشيفروليه, فده مش معناه ان عربيات شيفروليه الأصليه (مثل اللومينا) ينفع تنزل على حوض الكروز اساسا او قواعد العربية تقبلها من الاساس, يعنى مينفعش مثلا اجيب موتور m3 و اسقطه فى حتة جولف 5 , ده الانت عاوز تعملو.

ثانيا انا بتكلم بالمنطق و العمليه, انا توقعت لما هوا راح اشترا كروز يعنى اشترا عربية حديثة شبه زيرو, فده معناه انها غالبا العربية الاساسية لاستخدامو, يعنى لو حاجة عطلت او باظت يبقى محتاج اروح انزل اشتريها و اطلع على الميكانيكى و اصلح العربية و امشى, مش ادخل على النت و ادور على الحاجة بالكود و ادفع بالفيزا و استنى بأه يشحونهالى و اركن العربية تحت البيت اسبوعين ولا شهر.

لكن الأفهمو انى لو عايز اركب عربية لمزاجى غالبا ممكن يبقى معايا عربية جنبيها , و اروح اجيب عربية قطع غيارها متوفرة و موجودة, لو العربية عطلت و احتست فى قطعة غيار انزل اشتريها جديد او استيراد و الاقى الشغال فى العربية و اركب و شكرا اروح بعريتى البيت تانى.

مثال بسيط عشان اوريك انك عايش فى الأحلام:

معايا عربية بورا, شاريها قريب, اول ما جبتها كانت شغالة زى الفل و فجاه بدأت تهيس, وانا ماشى تطفى منى فجأه و يا دور يا مادورش, و طبعا ممكن تعملها و انتا ماشى فى شارع زحمة او و انا معايا مراتى, روحت للميكانيكى المعتاد جربنا الطرمبة و نضفنا البوابة و غيرنا الكونترول (طبعا مع توافر قطع الغيار ديه كلها حوالينا),روحت أنجزت و روحت لاشهر واحد بتاع فولكس بدون ذكر اسماء, كشف و استنا لما العربية بطلت, و راح شايل حاجتين و بدلها بقطعة استيراد من المحل الجنبو و هوب العربية اشتغلت زى الفل حتى السحب بتاعها فرق, بس انا كنت قلقان قالى انسى خلاص خلصت و فعلن (طلع فى الأخر موزع الدينامو و حساس الكهرباء).

تخيل بأه السيناريو العظيم ده حصل فى عربية كروز بماتور لومينا ولا كابريس (ده لو ركب اساسا), مين بأه هيكشفلك و يا ترى هيحتاج يجرب قطع غيار ولا لأ و فى الأخر تطلع هيا ولا لأ و هتستنى قد ايه لما تجيلك قطعة الغيار و بكام؟؟؟؟؟.

الكلام سهل اوى, لكن على ارض الواقع التنفيذ صعب و المشاكل البعد التنفيذ ممكن تبقى اكتر, و لو معندكش واحد فاهم فى عربيتك و الفيها كويس و تكون ضامنو و كمان قطع يارها تكون متوفرة, يبقى ربنا معاك.

الا لو هتجيبها جنب عربيتك الاساسية و تكون ركوبة كده للخروج و للمزاج و لو عطلت نركنها فى الجراج تحت البيت مش هيفرق معايا.