مش ضرورى نعرف وظيفتك ....
أحنا عايزين نعرف أنت أستفدت أية من حياتك العملية؟؟!!
ياريت كل واحد يقولنا عن خبراتة ....
عشان نقدر نفيد بعض ....
عرض للطباعة
مش ضرورى نعرف وظيفتك ....
أحنا عايزين نعرف أنت أستفدت أية من حياتك العملية؟؟!!
ياريت كل واحد يقولنا عن خبراتة ....
عشان نقدر نفيد بعض ....
اولا ان التعليم ملوش اى 30 لازمه و الكورسات و التدريب هما اهم حاجه
قذارة التعامل فى سوق العمل
1- ان الشغل شغل محدش حيديك مرتب جنيه من غير ما يشغلك ب10
2- الفلوس لغه العالم واللي معاه قرش يسوي قرش
3- مهم اوي تبقي امين في شغلك مهما حصل
4- ميملاش عين البني ادم غير التراب
استفدت اني اغير نشاط شغلي حسب الوضع ومتمسكش بشغله بتقع وافكر فى الجديد
محدش بيتعلم ببلاش و مفيش حاجة اسمها تعليم مجاني
أستفدت من حياتى العملية أن عدوك أبن كارك ....
و أن زميلك عمرة ما هيتمنى لك الخير لأنة أما أنة هيحسدك :O_stupid[1]: أو هيفسدك ....
وأن مفيش حاجة أبدآ أبدآ أسمها صداقة عمل ما بين راجل وست :dontudear: ....
فى زمالة وأحترام داخل مكان العمل فقط لا غير لكن برة الشغل :no1: ....
غلط أننا نحكم على الأشخاص و الأشياء بالمظاهر ....
و أجرى يا أبن دم جرى الوحوش غير رزقك لن تحوش ....
كل ما سبق
كلام فى الصميم ....
بس أنا عندى أستفسار بخصوص العمل بأمانة وأتقان ....
تحس بأية يا Mickey لما تلاقى نفسك شغال بضمير و جهد متواصل و مفيش أى تقدير من صاحب العمل أو الأدارة و فى الوقت نفسة تلاقى اللى مابيشتغلش زية زيك فى التقدير المادى والمعنوى ....
بالذمة مش دى حاجة تغيظ و تسد النفس وتخلى اللى بيشتغل يبطل شغل ويكبر دماغة زى الناس التانين؟؟!!
- بلاش نخسر الى فدامنا علشان حاجات بسيطة و لازم نخلى علاقتنا كويسة بكل الناس علشان الايام بتدور و ممكن تحتاج لاى حد
-الشغل عبارة عن حرب شرسة و صراعات قوية جدا داخلية بين الزمايل و خارجيا بين الشركة الى بتنافس شركتك
- الواحد يحاسب على اى كلمة تخرج منه لانه بيتحاسب عليها و بتتحسب عليه
بالنسبة للنقطة الأولى أنت طبعآ عندك حق فيها بس أنا مبعرفش أعمل كدة ....
أصل الواحد لما يلاقى أسلوب غبى فى التعامل من شخص ما لازم هيقفش علية علشان ميديش فرصة لية أو لغيرة أنة يتمادى فى الغباوة ....
أما بالنسبة للنقطة التانية فأنا عايز أقولك أنى بطلت أتكلم خاااااالص عشان الواحد ياما أتكلم وندم بعد كدة ....
ان التميز ساعات بيضر الانسان اكتر ما بيخدمه
وفى احيان كتيرة السير مع القطيع او تكبير الدماغ بيكون افضل حل لعمل هادى بدون مشاكل
(الكلام ده فى مصر بس)
عرفت ان اللي كنا بندرسه كله من اول أبتدائي غير العربي والحساب والأنجليزي والعلوم ملوش اي لازمه خصوصا التاريخ والجغرافية والتربيه الوطنيه علشان معظم المواد دي فتي وكدب ملوش لازمه في الحياه العمليه.
أخلاقك ومظهرك ولسانك ودماغك ودراعك وصحتك هما الأساس شهادتك ممكن تساعد لكن لو عندي وظيفه واتقدملها اتنين واحد بدون خبره معاه شهادة عاليه والتاني معاه خبره وشهادة أعدايه هختار التاني علشان معاه خبرة واشتغل قبل كده الأولاني هيجي يجرب ويا يعجبة يا يقولي شهادتي ومؤهلاتي وسلطاتي للأسف انا مبقتش اثق في شهادات ومؤهلات يعني ايه بكلوريوس وميعرفش يستخدم برنامج اكسل ويعمل جدول ولا ميعرفش يعمل مقابلة بالأنجليزي ولا بالفرنساوي والاسم محاسب ولا مهندس ولا حتي دكتور ومن الواضح ان الكوسه كانت شغاله علشانه في الدراسه لكن في الحياه العمليه الصح كله بيبان انا احيانا بيجيلي طالب او طالبة شغل مجهزين ملف ولا خمسين صفحة شهادات ودورات وتوصيات وجاي يشتغل موظف في فندق عالمي نبدأ المقابلة يطلع أبيض عقلية تلميذ في أعدادي كل اللي يعرفوه عن الكمبوتر محادثة وتصفح !!!! طيب الانجليزي شويه كلمات من أفلام مع عوجة لسان هبله وشكرا !!!
بجد لازم نبدأ بالتعليم ونوفر فلوسنا علي الدروس وندرس لهم المواد العمليه أكتر ونضيف مواد من الواقع عن الأخلاق و التجاره و الصيانة والأمن والسلامه والأسعافات وحق الغير وندرسلهم الدين صح مسلم أو مسيحي بدون تعصب والتاريخ الفرعوني وكمان الأخلاق الرياضية يشجع بأدب ويطمح للنجاح ويتقبل الهزيمة والفشل اللي بتكون الخطوة ألأخيرة قبل أي نجاح ونلغي فكرة ان المصري فقط اي مصري أحسن واحد في الدنيا وباقي البشر مالهمش لازمه طيب بأمارة أيه !!!!
ونبني أطفالنا صح بحيث من أعدادي يكونو جاهزين للحياه العملية بكل جديتها وقسوتها مش بعد الجامعة والجيش يبدا يفكر في مستقبلة اللي بيكون خلاص تقريبا ابتدا يكون ماضي !!!!!
تحياتي من مكه (:
لو فضلت في نفس الوظيفة من غير أي ترقية فترة 5 سنين ، لازم تغير المكان و تشوف حالك في مكان تاني .... التغير صعب بس مطلوب
متخليش حد يسحبك في معركة من غير متكون جاهز ..... لو فيه إجتماع و أنت عارف انك مش جاهز ، حاول تكون جاهز أو إنت ألي تحدد الوقت
لو داخل إجتماع مش خاص بك بس فيه top management... لازم تكون جاهز بالرد علي أي حاجة علشان كدة كدة مش هتتساب و رجلك هتيجي في أي موضوع
أوعى ترد علي أي ايميل و أنت متنرفز ، خد وقتك و رتب أفكارك و دايماً علي طول - stick to facts
أخر حاجة
life is not fair
استفدت الأتي
من جد وجد وان الله لا يضيع اجر من احسن عملا
لاضاع حق وراءه مطالب او زي مابيقولها يعني
ساعات لازم تطلب حقك ومتستناش اللي فوقيك يجيبهولك علي اساس انه هيقدر مجهودك
طريقة الكلام مع الأخرين ممكن تطلعك السما او تخسف بيك الأرض وبدون نفاق او اي شيء غلط
اوعي تخلي شغلك يطغي علي بيتك وصحتك
1- قلت الأدب
2- اعمل نفسك بتشتغل حتى لو معندكش شغل أصلا
3- أي مدير شغله إنه يعمل مشاكل عشان يبان إنه شغال عند اللي فوقه
4- مش مهم إنت شغلك صح ولا غلط المهم تعك عشان ترضي الزبون
5- مديرك دايما بيفهم أحسن منك ويعرف أكتر منك حتى لو مش مجاله
6- أكتر حاجة مشتركة فالناس هي عقدة النقص
7- النصب مش زي ما احنا فاهمين دي اسمها شطارة
لازم تتعلم تقول لآ
متفرحش باللي يفضل يمدح فيك وفي الأخر يشيلك شغل قد اللي المفروض تاخده مرتين وتاخد فوقهم شغل زمايلك وفي الأخر لو فيه تقدير بتاخد اكتر منهم حاجات بسيطه جدا متجيش واحد من الالف من الشغل اللي انت عملته ومع اول موقف وحش بتعمله كل ده بيضيع
1- دافع عن شغلك ما دام واثق فيه
2- اسلوبك و طريقة حوارك مع الناس هى الى بتجبرهم على احترامك
3- اهتم بالعلاقات الانسانية مع شركاءك فى العمل
4- فعلا لا تؤجل عمل اليوم الى الغد
5-الانطباع الى بيتاخد عنك انك جاد و خايف على مصلحة العمل بيوفر عليك مشاكل كتير
6- الراحة النفسيه اهم كتير من الماديات بفرض ان الماديات مححقة الحد الادنى من الرضا
الكلام ده من خبرة 6 سنين عمل فى القطاع الخاص
أسمح لى أرد على النقاط دى:
1.مش من الضرورى أنك تلاقى الناس بتحترمك عشان أسلوبك معاهم راقى وشيك ....
فى ناس فى الشغل فعلآ واطية ومهمآ كنت كويس معاهم مش هتلاقى منهم غير السفالة دة يمكن الناس اللى زى دول مابيخافوش غير من اللى يديهم على دماغهم :khd: (صوابعك مش زى بعض) ....
2.لازم الواحد يهتم بالعلاقات الأنسانية مع زمايلة فى الشغل بس أبعد عن الستات لأن العلاقات الأنسانية معاهم ساعات بتتحول إلى كوااااااااااارث أنسانية و حتى زمايلك الرجالة كمان لازم بردوا يكون فى حدود بينك وبينهم وماتتعشمش فيهم أوى عشان ماتتصدمش وماتقولهومش على كل حاجة عنك عشان ماتتحسدش:O_stupid[1]: ....
3. ساعات كتير بتلاقى صاحب العمل بيبقى مش فارق أوى معاة أنة يشوفك خايف على الشغل أهم حاجة عندة أن الشغل يمشى وهو جيبة يبقى عمران :049: واللى بيشتغلوا معاة مايطلبوش فلوس كتير فمفيش داعى توجع قلبك مع ناس ماتستاهلش (معظم أصحاب العمل فى بلدنا كدة) ....
4. زمان كنت بقول زيك كدة أن الراحة النفسية أهم من الماديات بس دلوقتى بقول لأااااااااا :dontudear:
و ألف لأااااااااااااا كمان لأنى أكتشفت أن الماديات أهم مليون مرة من الراحة النفسية فى الشغل
يعنى لو قلت لك أنك فى المكان دة هتلاقى ناس هترتاح معاهم جدآ وهتخرجوا مع بعض و هتسألوا على بعض كل شوية وهتحس أن دول أقرب لك من أهلك بس هتقبض 1000 جنية فى الشهر
ولا هتختار مكان شغل تانى مفيهوش كل اللطافة دى ومش هتبقى مضايق ولا مبسوط
(الناس اللى حواليك أبرد من التلج) بس هتقبض 10000 جنية فى الشهر
أوعى تقول لى أنك هتختار اللطافة وال 1000 جنية عشان الحالة النفسية ....
الكلام دة عن خبرة 12 سنة فى القطاع الخاص ....
طيب انا هرد على كلامك بردة الى جايز يكون صح بس مش فى كل الاماكن او المجالات
1-زمان واحد قالى حكمة ... الناس المحترمة بتجبر اى حد بينهم انه يكون محترم عشان ميبقاش منبوذ
2-الناس مش هتحترمك عشان انت بتديهم بالجزمة و الطريقة ديه فى التفكير جايز هى الى بتوصل الناس انها تتعامل معاك بطريقة متكونش حاببها.. احترامك بيفرضه شخصيتك و اسلوبك و كفائتك فى عملك و حط تحت الكفائة ديه خطوط كتير
3-ماهو احساس صاحب العمل انك خايف على الشغل مش هيجيله غير لما يلاقيك فعلا شايل الشغل م وبتسلم المطلوب منك فى معادة وبالتالى هو هيقدرك على الاقل عشان ميخسركش... طبعا ديه بتختلف من شخص للتانى ممكن واحد يقدرك ماليا و واحد تانى يبقى تقديرة معنوى وطبعا انا معاك ان ديه مش قاعدة عامة..
4- انا معاك فيها فى حالة ان الفرق يكون 10 اضعاف طبعا... بس ده فرق صعب تلاقية بين مكان و التانى فى نفس الكارير لنفس الخبرة ... الفروق بتبقى مش مبلغ كبير ممكن تتنازل عنة لصالح الراحة النفسية
واخيرا مش كلامى ولا كلامك ممكن يتاخد قاعدة عامة لان زى ما انت قولت فى عنوان الموضوع كل واحد بيحكى تجربتة الشخصية وديه تجربه 6 سنين عمل فى القطاع الخاص منهم سنه فى مصر و الباقى برة مع ادارة مصرية واستاف مصرى كامل .....
أنا بعمل اللى عليا و أجرى عند اللة و مش منتظر حاجة من صاحب العمل لأنهم بيقولوا بلاش نشجع الموظف دة ولو حتى بكلمة حلوة بالرغم أنة مجتهد جدآ عشان مايتمرعش علينا (دى النوعية اللى أنا أتعاملت معاهم)
يمكن حضرتك يكون حظك أفضل و أتعاملت مع نوعيات أنضف من كدة ....
استاذ Ghosts حضرتك شكلك شغال في مكان غلط والناس اللي من النوعيه دي انسب حل البعد عنهم عشان ياما هيخنقوك او هتتطبع بطبعهم
بعد 12 سنة فى الحياة العملية فى مصر عرفت أن لة ضهر مابيضربش على بطنة ....
ممكن تلاقى المدير ماسك واحد موظف عندة و بيمسح بكرامتة الأرض عشان غلطة بسيطة عملها ....
وفى نفس الوقت نلاقى موظف تانى عامل غلطة أكبر بكتييييييييييير أوى من زميلة الغلبان الأولانى بس محدش يقدر يفتح بقة معاة عشان مسنود على أبوة الموظف الكبير فى الحكومة :nemoflow: ....
أمتى الواحد يحس فى البلد دى بالعدل والمساواة؟؟!!
ماهو عشان كده العيشة في البلد دي المفروض ناخدها وضع مؤقت وان السف ر للخارج في دولة محترمة هو الحل الأنسب
لاني نفسي اعيش بكرامتي ومحسش اني متهان
والبلد اللي متحافظش علي كرامة ناسها متستاهلش انهم يعيشوا فيها
مش هتقدر تعيش بكرامتك برة مصر إلا إذا كان معاك رأس مال محترم ....
أى حد بيسافر عشان يلاقى فرصة عمل غالبآ تلاقية بيشتغل فى وظايف مش أد كدة ....
يعنى لو أشتغل فى محطة بنزين يبقى كدة ربنا كرمة أوى ....
المهاجرين المصريين اللى بيسافروا برة للأسف بيشتغلوا الأشغال اللى سكان البلد بيرفضوا يشتغلوها ....
للأسف الشديد الشهادات المصرية غير معترف بها فى الخارج خاااااااااااااالص ....
يعنى أنت برة بتعامل على أساس أنك عمرك ما دخلت لا مدارس ولا جامعة ....
هو التعليم المصرى دة تعليم؟؟!!
دة تضيع وقت و جهد وفلوس على الفاضى ....
مش كله ياباشا
اللي بيبقي مسافر علي عقد او وظيفه من هنا بيروح ليه مكانته واحترامه
انا كان زماني ملك في كندا دلوقتي وبغبائي وبنشيد بلادي بلادي لكي حبي وفؤادي ضيعت من ايدي فرصه كان زماني دلوقتي عندي اتخنها شقه في مصر واحلاها بي ام ولا ميرسيدس ده غير مكانتي في الشركه هناك
بس تقول ايه بقي النصيب
ان من زرع حصد ولابد من الاجتهاد والجديه فى اى عمل
وان الوظيفه ما بتأكلش عيش
والى حلمه يبقى موظف حيفضل طول عمره موظف
والحمد لله على النعمه
بالراحة بس شوية يا أخ mohdamin ....
بيقولوا أية اللى رماك على المر قال اللى أمر منة ....
يعنى فى ناس فى مصر مش لاقية شغل خاااااااااااالص ....
تفتكر حضرتك لما يسافر برة و يلاقى شغل دون المستوى هيقول لأ؟؟!!
أكيد لازم هيوافق لأن هو دة بس الموجود أدامة و مفيش أدامة أى أختيار تانى ....
أنا أعرف ناس كتييييييييييير أوى سافروا برة وكان معاهم شهادات عليا وكان من ضمنهم واحد خريج كلية طب
عارف كان شغال أية هناك؟! كان تمرجى و أعرف اللى أشتغل سايس واللى كان مدرس أنجليزى و أشتغل security يعنى بواب من الأخر و اللى كان شغال فى شركة سياحة أشتغل فى بنزينة فى أمريكا
و مراتة اللى كانت مدرسة فرنساوى أد الدنيا أشتغلت فى مغسلة ....
فى ناس بتقعد شوية برة وبترجع تانى و فى ناس مبترجعش ....
دى التجارب اللى أنا شوفتها ....