الغباء والاستهتار كان هيتسبب في كارثة على الدايري لولا ستر ربنا !!
السلام عليكم ورحمة الله وبركاته
الواحد بدا يحس انه دمه تقيل وكل مواضيعه عن الحوادث !!
لكن نعمل ايه القدر هو اللى بيجبرني اني اسوق بشكل يومي على الدايري من صفط اللبن لحد اكتوبر !! وياكمية المهازل اللى بشوفها على الطريق ده بشكل يومي
بشكل يومي حوادث ابشع من بعضها ربنا يسترها معانا
النهارده حصل موقف غريب كان هيتسبب في حادثة او كارثة بمعنى اصح لولا ستر ربنا
هقولكم على الموقف لانه فيه اكتر من سبب من اسباب الحوادث اللى بتحصل بشكل يومي لكن للاسف الناس مش بتاخد بالها
بتلاقي كارثة او حادثة مميتة حصلت بسبب حاجة بسيطة جدا !
اللى حصل وانا ماشي على الدايري بعد دريم بارك بحجات بسيطة متوجه نحية نزلة الصحراوي
طبعا الطريق ده زي ماحضراتكم عارفين مكون من ثلاث حرات واغلبه ملفات وياكثرة العربيات النقل والترلات على الطريق ده
انا واخد الحارة الشمال وماشي بسرعة 90/100 تقريبا
في الحارة اللى على اليمين بي ام معدي من جمبي
وقدامنا في الحارة اللى في النص عربيتين نص نقل تلاجة ماشيين ورا بعض
اول ما البي ام عدت من يميني قعدت ابص عليها كدة واقول بسم الله ماشاء الله البي ام شكلها وهي بتجري روووووووووعة "كانت 320i"
مكملتش الكلمة ولقيت بتاع النص نقل اللى كان قدامنا في الحارة اللى في النص يرمي يمين على البي ام !
البي ام مسك فرامل ومافيش اي مشاكل بالنسبة ليه
الكارثة فين بقى !!! زي ماقلت لحضراتكم فيه 2 نص نقل ورا بعض
لما الاولى رمت يمين على البي ام اللى وراه يتفاجأة بعربية تويوتا ياريس قدامه وماشية في نص الدايري على سرعة لا تزيد عن 30/40 كم !!! ماتفهمش ده ماشي في النص بالشكل ده ليه
طبعا مسك فرامل جامد وراح حاااادف شمال ! والحمد لله اني كنت في الشمال بس وراهم بحبة والا كان زمانه طيرني على الاتجاه التاني
العربية النص نقل مع الفرملة والكسرة الجامدة بدات تلف وتنحرف عن مسارها وكانت هتطلع عكس اتجاه لولا ان ربنا ستر واتعدلت في اخر لحظة !!
طبعا كل ده حصل في حوالي ثانيتين تلاتة بالكتير
عديت انا من الشمال وببص على الياريس اللى ماشية بتتمختر في نص الدايري على سرعة 30 دي عايز افهم بيعمل ايه !!؟
اتاري الاخ الفاضل صاحب النص نقل اللى كان هيتقلب وقف على الشمال وتقريبا نازل يتخانق مع بتاع الياريس ! وانا طبعا باصص للياريس ومش واخد بالي من الطريق
مرة واحدة ببص قدامي لقيت النص نقل واقف !! مسكت فرامل جامد وايدي على الكلاكس راح هو رامي يمين وفاتحلي حارتي والحمد لله ربنا سترها والموقف عدى على خير
مما سبق نستنتج ان كان هيحصل كارثة لا قدر الله لو كانت النص نقل طلعت عكس اتجاه !! او لو كان في اي حد في اللحظة دي جاي من الشمال كانو هيتعملو ساندوتش :oops2:
وان حجات بسيطة جدا كانت هتتسبب في كارثة وانا لخصتها لحضراتكم في التالي :
1- واحد حمار ماشي على الديري وفي النص وبسرعة لا تتجاوز 30/40 كم !! طبيعي يتسبب في كارثة لو عربيته فيها حاجة ياخد اليمين ويدي انتظار ويمشي براحته انما في النص وبالمنظر ده !!!
2- واحد اخر حمار سايق عربية نص نقل ولازق في العربية اللى قدامه لدرجة ان لما العربية اللى قدامه غيرت اتجاها لبست هو في اللى قدامها لانه مش سايب مسافة امان !!
3- واحد تالت حمار زيي كدة بالظبط سايب الطريق وبيتفرج على الياريس وبيشوفها ماشية براحة ليه <<<< انت مالك يابني ماتخليك في حالك !! يخربيت الفضول اللى عند الشعب المصري :fun_10_9_134[1]:
وطبعا رقم 3 دي بتحصل كتيير بغض النظر عن السبب في الانشغال عن الطريق !! اما واحدة بتعدي السكة وشاب بيتفرج عليها ! عربية جامدة عدت من جمبه ومركز معاها ومنشغل عن الطريق ! بياكل بيشرب بيكتب message على الموبايل ... الخ !!
كل دي اسباب بتتسبب في كوارث وللاسف الكوارث بتحصل في ثانية وماحدش بيلحق ياخد باله من حاجة
بس تفتكرو مين اللى يلام اكتر !! الياريس عشان ماشي في النص على سرعة هادية ؟؟ ولا النص نقل عشان مش سايب مسافة امان بينه وبين اللى قدامه ؟
منتظر تعليقاتكم
وربنا يسترها معانا ويحفظنا