الموضوع: كيف أقلعت عن التدخين

حبيت بناء على موضوع
www.nilemotors.net/Forum/viewtopic.php?t=2980
حبيت اضع تجربتي في الاقلاع عن التدخين . و ياريت اللي له تجارب مشابهة يحكي لنا عشان أعتقد هي دي الحاجة اللي ممكن تشجع المدخن و تديله امل :)

انا كنت مدخن لمدة 10 سنين بشراهة . و أي حد بيقعد معايا لازم يعلق على حاجتين: كمية السجاير اللي باشربها و طريقة شربها! لأني كنت فعلا زي ما اكون بانتقم من ضغوط الحياة و تعب الشغل في السجاير . حاولت اكتر من مرة ابطل و ياما رميت علب مليانة و كسرت سجاير لكن اطول مدة اقلاع كانت 15 يوم و رجعت عشان ضغوط جامدة في الحياة . بدأت يبقى كل تركيزي في الدعاء على اني ابطل السجاير و العيلة كمان بدئت تدعي لي .

بقدر الله قريت موضوع في منتدى خليجي عن لبان اسمه نيكوريت و صاحبه حكى انه بطل عن طريق اللبان ده . فعلا قررت في ليلة اني اجرب . و نزلت صيدلية العزبي لقيت عنده جبت التركيز الاقل (2مل) و الميزة ان فيها طعم لسعة قريب من تأثير طعم السيجارة . الطريقة اني امضغ اللبانة دقايق لغاية ما طعم السجاير و تأثير النيكوتبن يوصل و اقوم راكن اللبانة من غير مضغ . ربع ساعة كمان لما تطلب مرة تانية اكرر العملية . كنت باستخدم بتاع 3 او 4 لبانات في اليوم . ماشاء الله لا قوة الا بالله على اخر الشهر بدأت احتاج لبان اقل و بعد اسبوع كمان بطلت السجاير تماما و انتهت عندي الحاجة للسجاير و كمان عادة السجاير .

الحمد لله بقالي سنة ونص ما فكرتش و لا احتجت اشرب سيجارة . و هو ده اللي عاجبني . اني مش مبطلها و ح اموت عليها لا . مبطلها و مش عايز و لا محتاج اشرب تاني . مع اني والله كنت باقول: طب انا لو بطلت سجاير ح اعمل ايه في الوقت اللي كنت بادخنها فيه؟ ح افكر ازاي؟

انا قلت لاكتر من واحد على الموضوع ده . الاخطاء اللي بعضهم ارتكبها كانت مثلا:
1- واحد اخد لبان تركيز اكبر (4 مل) ما اتحملوش و جاب اللي في بطنه و حلف ما يجرب تاني :)
2- واحد بقى يمضغ اللبانة و لما تخلص يشرب سيجارة على اساس انه كده بيخفف :)

اتمنى الموضوع ده يفيد اللي عايز يبطل . و لو فيه حد عرف يبطل يحكي لنا ياريت . ربنا يكفينا و يكفيكم شر التدخين .

انا ايضا من الله على بنعمة الاقلاع عن التدخين ...
الحمدلله الاسباب والدوافع كانت صحية ونفسية واجتماعية ...
الاسباب الصحية هيا بالطبع موضوع النهجان والكلام دة وانى احس انى عجزت ومعدش فيا حيل ...
الاسباب النفسية هوا استيائى من نفسى لشعورى بان هذه العادة تستعبدنى ولاننى مؤمن ان الحر لا تستعبده عادة .
الاسباب الاجتماعية هيا نفور العديد من الاصدقاء منك بسبب رائحة السجائر ونفور زوجتى من رائحتها اثناء فترة الحمل كل هذا جعلنى افكر ماذا عندما اصبح ابا وينفر من ابنائى بسبب هذه الرائحة الخبيثة ؟؟؟
وسرعان ما اتخذت القرار وساعدنى الله فاقلعت عنها نهائيا بدون الحاجة الى ما يمضغ او ما يلصق او اى شىء من هذا القبيل والحمدلله اشكر ربى على هذه النعمة العظيمة.
رحمكم الله من هذه اللعنة .