انا عمري ماشفت عفاريت ههههههههههه بس مؤمن بوجود الجن وانه ممكن يلبس الأنسان ويؤذيه وده عن خبره وحالات شفتها بعيني لناس قرايب جدا ليا وشفت منظرهم بيبقي عامل ازاي وقت الصرع

اما عن العفاريت اللي تكلمك بقي في العماره والجوارات دي فمش مقتنع قوي بس ليه لآ عادي وممكن تكون موجوده

ممنساش ان الشياطين في عصر الرسول كانت بتتمثل في شكل الأنسان وفي عصرنا هذا ممكن تتمثل في شكل حيوان

الناس بقي اللي بتحب تعمل حواديت علي حاجات كتيير زي مثلا بيت رايا وسكينه ماهو في الأخر واحد وعروسته راحو سكنو فيه ومحصلش حاجه مع ان البيت اندفن فيه كتيير

طيب تصدقو بقي ان في الفلاحين زمان كان الاطفال الصغيرين لحد سنتين كمان لما كانو بيموتو مكانوش بيدفنوهم في المقابر وكانو بيدفنوهم في البيت ؟
طيب تصدقو ان البيت اللي اتربيت فيه وكبرت فيه كان مدفون فيه ولاد عمي الاتنين ؟

طيب تصدقو ان وانا صغير كنا مره راحين الغيط وكان في قريه بعيده عننا وكنا بنروح بدري وعمي لقي بنت صغيره وليده محطوطه علي جرف الترعه وميته طبعا وعمي اخدها وسال عليها في القريه كلها ولما محدش قال انها تبعه حفر حفره في جرف الترعه ودفنها ؟

احكي كمان ؟