قبل الــــــــــــــ 30

**Screenplays** · 21-05-2012 07:30 PM

سكرررررررررررين
انت مش مكاني علشان تعرف القررررررررررررف الي انا فيه .. لازم أجرب حاجة تانية أو مكان تاني

حرف الره حرام عليك ههههههههههههه و الله انا حاسس بيك جدا علي فكره ... عموما غير المكان ماشي لكن متغيرش المجال ... اصلك تعبت 5 سنين كليه عشان تغير المجال في الاخر ؟ انت ليك في مجالات تانيه غير الصيدله ؟ اصل بصراحه حرام تبتدي مشروع من اول في جديد في الظروف دي ... و الله انا مش عارف اقولك ايه ... ربنا يقدم اللي فيه الخير

**Screenplays** · 21-05-2012 07:40 PM

المشاركة الأصلية كتبت بواسطة ossamayk

مع إحترامي لحضرتك أنا شايفك متشائم حبتين، احمد ربنا على إللي أنت فيه وتفائل دائماً إن إللي جاي أحسن إن شاء الله، كلنا محطوطين تحت ضغوط كبيرة في مجال الشغل والمعاملة مع الناس والطرق الغير أمنة دا حتى الواحد بقى يكره يخرج بالعربية عشان هم الركنة.
ولكن مع كل ده لازم دايماً نحمد ربنا حمداً كثيرا كما ينبغي لجلال وجهه وعظيم سلطانه و(إن مع العسر يسرا) وإللي جاي أحسن إن شاء الله والحمد لله حالنا أحسن من ناس كتييييييييير.
متخليش الشيطان يتمكن منك ويوصلك لدرجة القنوط
وربنا ييسرلنا جميعاً كل خير

معلش ارد انا

لا مش متشائم و لا حاجه ... الراجل مجتهد بزياده في بلد عايزه صيع و عيال توتو و بلطجيه ... علي رأي عادل امام " البلد مش عايزه اللي ينجح فيها " ... ان شاء الله فرجه قريب

**mazher_m** · 21-05-2012 07:42 PM

المشاركة الأصلية كتبت بواسطة a7med_pharma

السلام عليكم

.
كان نفسي قبل ماوصل التلاتين
اعمل مليوووووووووون حاجة

هي حاجات في نظري..تخليني مبسوط
حاجات أنا بحبها.... وإن ناس تانية شافت إنها هايفة

.
بما إني (تقريبا) مش ناوي على جواز أو إرتباطات تاني
فكان نفسي أسافر بره أي مكان
أنا دلوقتي عندي 28 سنة
وماخرجتش بره المحروسة ولا مرة

كان نفسي أسافر تركيا ولو أسبوع..أو أي بلد أوروبي
كان نفسي أكمل لعبة الحديد بشكل إحترافي .. علشان اعمل جسم كويس
كان نفسي أركب عربية إيفووو .. أو حتى عربية معدلة تعديل extreme
كان نفسي أوصل للإستقرار المادي..إلي ماكنش فيه خايف أو مقلق
وإني أقدر أجيب أي حاجة أنا عاوزها وقت ماحب..من غير ماراجع حساباتي واشوف ينفع ولا ماينفعش

.
كان نفسي يكون عندي خيل .. بس الله يرحمه .. مات فزاع

كان نفسي أعيش وسط ناس عاقلة بتفهم .. بس للأسف دي أصعب حاجة

.
كان نفسي قبل ماكمل التلاتين ..إني أكون حجيت أو عملت عمرة على الأقل
.
كان نفسي قبل ماعدي التلاتين .. إني أكون أب (لكن مش عاوز أكون زوج) ماحدش يسألني إزاي ؟
.
كان نفسي شغلي يكون كبير .. ومن غير قرف ولا وجع دماغ ولا مناهدة كل يوم
.
بس
مين بقا كان نفسه في ايه ؟
وحققه ولا محققوش

لو عايز الخلاصه
لو انت عايز فتاكد انك هاتعمل فعلا
واكيد اكيد كل اللي انت عايزه هتعمله
ثق في الله

**Screenplays** · 21-05-2012 07:48 PM

احنا واثقين في الله و في رحمته و في عدله

بس برضه واثقين ان البلد دي عمر ما حلها هيتعدل و كله هيفضل مظلوم فيها و السيئه بتعم

ربنا يطلعنا منها علي خير

**Ghosts** · 21-05-2012 08:15 PM

كان نفسى يكون ليا زوجة تعوضنى كل عذابات العالم و تملى عليا حياتى و يجمعنا حب مابينتهيش ....
وأكيد كان نفسى يبقى عندى أولاد أربيهم كويس و أسعدهم ....
وكان نفسى أكون صاحب عمل مش عبد أجير يروح شغلة عشان يتمرمط وياخد أوامر من ناس ملهاش أى 60 لازمة ....
كان نفسى أعيش فى بلد تانى غير مصر ....

حد فينا يقدر يشكل حياتة زى ما هو عايز؟؟!!
حد فينا يقدر يختار والدية أو البلد اللى هيعيش فيها أو عقيدتة اللى هيؤمن بيها و يبقى متعصب ليها
أو بيختار شكلة هيبقى عامل أزاى ولا صحتة عاملة أية ولا هيتجوز مين ولا هيخلف ولا لأ و هيموت أمتى؟؟!!

تخيل كدة لو حققت كل اللى نفسك فية و مبقاش فى حاجة ناقصاك ....
هترفع عينك للسما وتقول يارب؟؟!!

أحنا كلنا ما بين أيدين ربنا و مفيش حد فينا بيختار أى حاجة ....
أنا زيك بالظبط نفسى فى حاجات كتيييييييييييير أوى بس غصب عنى مش قادر أحققها ....

فسلمت أمر لله و مابقولش غير يارب ....

**A7MED_PHARMA** · 21-05-2012 08:30 PM

ياجماعة انا مش طماع
انا تعبت كتير.. وربنا يعلم إني تعب .. والتعب في البلد دي للأسف مالوش مقابل طالما ماشي مستقيم
طالما ماشي مستقيم..يبقا يدوب هتلاقي تاكل وإحتياجاتك الأساسية بس

لكن لما تتعب
محتاج شوية رفاهية
مانا مش عايش علشان أكل وأشرب وألبس بس

والحمد لله على كل حال

لكن لما تبص لواحد في سني في أي بلد تاني
عمرك شوفت بلد فيها شاب (راجل) عنده 28 سنة
ولسه على باب الله غير في مصر

**A7MED_PHARMA** · 21-05-2012 08:48 PM

المشاركة الأصلية كتبت بواسطة maserati

السلام عليكم و رحمة الله و بركاته

أنا من رأى أنك (أن تبدأ متأخرا أفضل من أن لا تبدأ على الاطلاق).

و بالنسبة للتعب, فالتعب هو أنك تعمل الحاجة اللى أنت مش عاوز تعملها و أنك تيجى على نفسك و تعملها, أنت سواء قاعد وسط أهلك و ناسك و اشتغلت فى صيدليات عند أى حد و بعدين اشتغلت فى صيدليتك بعد كده, فأنت اشتغلت آه, بس ماعملتش الحاجة اللى أنت مابتحبهاش عشان عاوز توصل لهدف معين و أنت ماحرمتش نفسك من حاجة أنت نفسك تعملها عشان توفر تمنها, زى تلاقى اتنين صيادلة, واحد قاعد هنا فى مصر و بيشتكى من ضيق الحال, و كل ماتجيله فرصة سفر للسعودية ما يرضاش يسافر و يقولك "لا ياعم, أنا ماستحملش حد يتأمر عليا" و التانى جه على نفسه و سافر السعودية مثلا و لا أى بلد تانية و استحمل رزالة الخلايجة عشان القرش و عشان يحقق اللى نفسه فيه و اللى هو على الأقل أنه هيحج هو و أسرته و يعمل عمرة لما يزهق, الأول متهيأله أنه بيتعب و لكنه مابيتعبش لكن التانى فلا تعب.

أنا كان ليا زميل أكبر منى شوية و كان خريج علوم لأنه ماجابش مجموع فى الثانوية العامة, و لما اتخرج من علوم, لقى أنه أكيد مالهوش فرصة فى مصر و لا بره مصر, قرر, أنه ياخد دبلوم أغذية فى جامعة عين شمس على أساس أنه يحسن من فرصته فى أنه يلاقى شغل فى أى مصنع أغذية و كان بيسافر القاهرة من المنصورة كل يوم اتنين, قعد فى الدبلوم دى سنة و لا اتنين مش فاكر, فجأة و بدون مناسبة -لأنه انسان مجتهد و بيعمل اللى عليه, لازم ربنا يوفقه- فيه كليات صيدلة أعلنت سنة 1995, أنها هتقبل خريجى علوم, كانت أسيوط و حلوان و القاهرة على ماعتقد, الأولانية كانت رسومها قليلة و التانيين, كانوا عاوزين فلوس, قرر أنه يدخل صيدلة أسيوط و فعلا راح هناك من سنة أولى و قعد سنتين و برضه لأنه مجتهد و بيعمل اللى عليه و مابيدورش على الحاجة اللى بيحبها بس عشان يعملها, ربنا يسرله أنه يحول صيدلة المنصورة من سنة تالتة و قضى فى المنصورة سنتين, و بعد ماتخرج, اشتغل سنة تقريبا فى صيدليات فى القاهرة و لأنه انسان مجتهد و بياخد بالأسباب و بيعمل اللى عليه, كسب سنة 2000 فى هجرة أميركا و سافر و هناك بدأ من الأول بياع سندوتشات هوت دوج فى محل و بعد كده مساعد صيدلى لحد ماخلص معادلة الصيادلة و بقى صيدلى و الحمد لله دلوقتى مرتاح و وصل للى عاوزه, النوع ده من الناس, حتى لو ماكانشى كسب فى هجرة أميركا, كان هيدور على أى فرصة فى أى مكان و يقبل بيها حتى لو مش عاجباه.

الفكرة, أن ناس كتير بتفكر أن التعب, أنك تعانى و بس, بس التعب, أنك تعمل اللى أنت مابتحبهوش عشان توصل للى أنت عاوزه, أكيد كووووووووووول الناس اللى سافرت الخليج و سابوا أهاليهم فى مصر, ماكانوش بيعملوا كده, عشان بيحبوا كده, بس هما مضطرين عشان يحققوا اللى هما محتاجينه من أساسيات الحياة فى مصر.

و بالنسبة للشغل فى الصيدليات, فأنا كنت بقف فى صيدلية والدتى من و أنا فى سنة تانية ثانوى و لحاد مادخلت طب و أنا فى الكلية برضه كنت واقف فى الصيدلية و كنت كل يوم بقفل بعد ماقفل أدور ألف على المخازن لحد الساعة 3 بالليل عشان أجيب الدوا اللى ناقص و أصحى تانى يوم أروح الكلية و هكذا و هكذا و لحاد ماجاتلى نيابة فى الجامعة و بعد ماخلص النيابة, رجعت أقف فى الصيدلية تانى لحاد ماسافرت السعودية 3 سنين و بعد كده رحت كندا و أكيد الأرض مش مفروشة بالورود هنا و عندى استعداد أنى أبدأ من الأول تااااااااااااانى عشان أحقق اللى أنا عاوزه, و عندى استعداد أنى أبدأ أدرس من الأول سواء طب و لا غيره, عشان اللى أنا عاوزه, و هكذا الحياة, اللى بيتعب بجد فى الأول بيرتاح فى الآخر و اللى بيرتاح و يأنتخ فى الأول, لازم يتعب فى الآخر.

و أنت لسه 28 سنة و لسه صغير و عندك خبرة فى شغلك, و أنا قلتلك قبل كده أن كندا كانت فاتحة باب الهجرة للصيادلة السنة اللى فاتت, لو عاوز تتعب و فى الآخر تلاقى نتيجة, تعالى كندا زى ماصيادلة كتير جم و بدأوا من الأول و بيشتغلوا شغلانات casual و بيذاكروا المعادلة فى نفس الوقت, و اللى بيتعب ربنا بيوفقه, و على فكرة, فيه صيادلة كانت عاوزه تيجى كندا هجرة و لأن ممعهاش الفلوس اللازمة للهجرة, قرروا أنهم يسافروا الأول السعودية, سنتين تلاتة يلموا قرشين و يطلعوا منها على كندا, هو ده التعب و الشقا, لكن ماينفعش واحد يفضل قاعد فى بلده وسط أهله و ناسه و يقول بتعب, ده مش منطقى طبعا.

بالتوفيق ان شاء الله و لكل المسلمين.

ربنا يكرمك على رد الواسع
ومين قال اني بعمل حاجة بحبها.. تفتكر إني حابب أقف في صيدلية ومعظم الناس هنا تعاملني على إني بياع
تفتكر إني حابب جهل المصريين حواليا
تفتكر إني حابب إني أقف أبيع حباية بربع جنيه... والناس تفاصل معايا في الحاجة أم جنيه
تفتكر إني مستحمل القرف ده كله ليه ؟
يمكن أعمل منه حاجة .. لكن للأسف لو كان هينفع يتعمل منه حاجة .. كنت عملت من 4 سنين وكام شهر شغل تقريبا 16 ساعة في اليوم..ليل ونهار

مش هينفع أفضل قاعد أكتر من كده..أنا زي مانا

لازم خطوة
أي خطوة
في أي إتجاه...وطالما الحمد لله حملي خفيف..لاعندي زوجة ولا ورايا عيال
هتبقا الخطوة مش خطيرة
علشان الضرر هيبقا عليا أنا لوحدي... وأقصى ضرر مش هيخليني أشحت يعني

أنا عرضتها للبيع .. أو الإيجار علشان يطلعلي منها مبلغ معقول
أقدر أبدأ بيه في أي مكان تاني...أو حتى أي مجال تاني
ونفسي أبدأ في أي حاجة تانية ...وأنا في العشرينيات ( حتى لو في أخرها )

.
مستني أول عرض كويس فيها .. وهخلص منها
وأشوف صيدلية تعملي دخل كويس في مكان راقي .. ودخل أفضل
وإلا بعد كده
السبيل الوحيد ... هيكون الهجرة
أنا ماليش حد في مصر ..... والدي ووالدتي ربنا يديهم طولة العمر قاعدين في البلد وسط العيلة
يعني وجودي من عدم وجودي..مش هيكون مشكلة

ماعنديش واحدة في مصر .. مستنياني
تقريبا كل أصحابي..إلي منهم إستندل معايا..وإلي منهم مسافر
ورجالة نايل موتورز معايا كل يوم على المنتدى

.
ربنا ييسر الأحوال
انا لو سافرت...مش راجع