الموضوع: قبل الــــــــــــــ 30

موضوع رائع وقريته كومنت كومنت لحد اخره

بص ياباشا هتكلم من وجهة نظرى المتواضعه جدا

أناسنى زيك تقريبا برده ( 29 سنه) ومتجوز الحمد لله وعندى جاسر كمان وبأمر الله أخته جايه فى السكه إن شاء الله

ممكن كلامى يكون هيزود خنقتك بس انت جيت على حاجه وجعه ناس كتير أوى واتكلمت فيها............

للأسف فعلا مصر بلد طارده للشباب اللى من سن 25 لحد 35 انا بتكلم عن الفتره الحاليه

انا مهندس مدنى على فكره وبرده كنت بشتغل وانا فى الجامعه ومعايا دبلوم دراسات عليا فى ادارة الانشاءات\

لحد سن 26 سنه كنت حاسس نفس احساسك بالظبط انى تعبت ومعملتش حاجه خالص وان اليوم ماشى بيومه

لحد لما قابلت فى يوم مش هسناه راجل كبير فى السن على القهوه بتاع 55 سنه - مكنتش اعرفه ولا يعرفنى يا دكتور أحمد والله - كان قاعد سامعنى وانا بكلم واحد صاحبى فى الموبيل وبقوله انا قرفان من الشغل وعاوز اهاجر وبتاع، لقيته بعد ما قفلت بيشاورلى بايده تعالى اقعد معايا بصراحه استغربته بس اللى طمنى انه شكله شيك اوى يعنى ومحترم وبيه زى ما بنقول ، رحت قعدت معاه وبدون مقدمات قعد يحكيلى حكايته ، الراجل يا أحمد وهوا بيتكلم بين كل كلمه عربى وكلمه عربى بيقول كلمه انجليش وطبعا بيبان اوى ان كان اللى قدامك بيصتنع الموضوع ولا لأ وباين من الاكسنت بتاعته انه بيتكلم انجليش بطلاقه.

الراجل ده يا دكتور أحمد طلع مهندس مدنى وعنده شركة مقاولات كبيره فى السويد بص يا سيدى قصة حياته، ابوه كان حلاق وامه ربة منزل ومش بيعرفوا يقروا ولا يكتبوا وفى اخر الثمانينات - كنت انا وانت لسه فى حضانه - ابوه وامه ماتوا فى حادثة قطر وكان لسه متخرج تقريبا ومعندوش اى مصدر دخل.......الراجل يا أحمد بيقسم بالله انه كان بيشتغل مهندس مدنى مع مقاول بجلبيه الصبح وكان بيجيب كتب وابحاث عن الأساسات والتربه لأنه كان حابب المجال ده وبيقعد يقراها بليل وكان بيقسملى بالله انه بياكل مرتين فى اليوم عشان يعرف يشترى الكتب دى ويتعلم منها........وبالصدفه البحته فى يوم المقاول ابو جلبيه ده جاتله شغلانه فى السعوديه وخده معاه لأنه كان بيصعب عليه وضعه وسافر السعوديه وفى اول عمره ليه قعد يدعى ربنا دعاء غريب أوى قدام الكعبه " يارب افح لى أبواب رزقك كما باعدت بين الأرض والسماء" أنا مش ناسى الدعاء ده واتعلمته من الراجل وبقيت بقوله وانا بصلى على طول ، الراجل جاله فرصة سفر بالصدفه برده وراح السويد فى دورة مع منظمة ابحاث سعوديه ، وهوا فى السويد فى احدى المحاضرات كان موضوعها اساسات التربه ( اللى كان بيتشرى الكتب والابحاث بتاعتها بتمن وجبة الغداء) - قعد يتناقش مع المحاضر - كان دكتور انشاءات سويدى كبير - ويراجعه فى حاجات ويعترض عليه ويتناقش معاه - بعد المحاضره الدكتور السويدى قاله تعالى اشتغل معايا هنا وراح السويد وبقى صاحب شركه كبيره هناك.

بعد قعدتى مع الراجل ده - قبلها كنت رافض فكرة السفر للخليج نهائيا - بداعى انى محبش حد يتحكم فيا والجنيه فى بلدى ولا الالف جنيه ببهدلتى بره - سافرت الامارات بعدها بشهرين وقعدت سنتين بس ، والحمد لله الحمد لله بفضل ربنا عملت فى سنتين اللى معملتهوش فى 10 سنين هنا والله.

ليييييه حكتلك القصه الكبيره دى....................الخلاصه يعنى اتعب واتعب واتعب واتعب واتعب وراعى ربنا فى شغلك ومتقولش انا لسه معملتش حاجه وبقيت 29 سنه وتعبت كتير وبرده ماشى ياليوم بيومه ، متستناش نتيجة تعبك السنه دى او السنه الجايه.....نتيجة تعبك جايه جايه وهتحقق اللى انت بتحلم بيه هتحققه بأمر الله......بس امتى بقى.......؟؟ انا ولا انت ولا العالم كله يعرفها..........علمها عند ربنا......لأن ربنا عمره ما هيضيع تعب حد بيراعى ربنا فى شغله وبيعمل اللى عليه والرزق ده أبوابه كلها عند ربنا.

أنا طولت عليك أوى...........بس نفسى أشيل من عندك حتة الإحباط دى والله وربنا سبحانه وتعالى قال" إن الله لا يضيع أجر من أحسن عملا " صدق الله العظيم

وكل ما تكتاب وتحس ان الدنيا سودة

افتكر انك عندك حاجات (وان كانت بسيطة) بس غيرك بيتمنى 1/10 منها

مياة سخنة من الحنفية، بطانية فى عز البرد، صحة والحمد لله

واللى مش عندك، ثق فى الله انه مديك القدرة (واللى ناس كتير بتتمناها) على انك تحقق اللى ناقص لك

وان شاء الله خير

المشاركة الأصلية كتبت بواسطة mr_vampire

لفارما:::

نصيحتي ليك من الاخر: شوف فرصة شغل برا ( مش هجرة ) فرصة شغل لان فعلا السفر في حد ذاته بيعلمك كتير....

وعلي فكرة وانتا خارج من مصر بتبقي فرحان ومش عايز ترجعلها بس سنة بالكتير وهتتمني تنزل اجازة يوم واحد بس واسال اي حد من الرجالة المغتربين...

لتانى مره يا Mr.Vampire بيعجبنى تعليقك أوى ........- ممكن بعيد عن الموضوع اتشرف باسمك لو مفيش مانع.

بص يا أحمد - مع حفظ اللقب طبعا انت على راسى من فوق - للأسف معظمنا ( وأنا كنت واحد من معظمنا دول) بيقول مش هسافر ومروحش الخليج عشان الناس هناك بيعاملونا معاملة العبيد وليه أسافر واتهان.....؟؟ وأنا هنا عمرى ما هموت من الجوع...... والكلام اللى انت عارفه أكتر منى ده كله.

بس ليه الإنسان المصرى - برده بقول تانى معظمنا - زى ما بيقولوا ستى وستك بيقدر البلاء قبل وقوعه ، طيب مهو ممكن تسافر يابن الحلال على شركه كويسه أو عقد كويس وتروح تلاقى نفسك بتتعامل مع ناس محترمه ونضيفه وتلاقى صوره عكس ما كنت متخيل فى دماغك وراسمها فى احلامك من الذله والمهانه والبهدله من اهل الخليج...

يعنى الإنسان يتوكل على الله ويستخير ربنا ويعمل اللى عليه ويتعب واللى جاى ده كله بتاع ربنا وبس.....

السفر يا Mr.Vampire زى ما تكرمت وقولت كله فوايد فى فوايد فى فوايد.......

أنا قعدت فى الامارات سنتين كنت رايح نقدر نقول نسبة خبرتى الهندسيه 60% ووالإنجليش عندى 70% والحاله الماديه نقول 50% ، مش بعرف اعمل أكل لنفسى أخرى الشاى والقهوه ، بخاف مووووووت من موضوع الوحده فى الشغل وانى الاقى جنسيات كتير ولغات كتير ، كنت خايف اننى معرفش اثبت نفسى وسط المهندسين هناك وشهر ويقولولى ارجع على بلدك.....و .......و.........و........وحاجات كتيييييييييييير أوى.

رجعت الحمد لله خبرتى الهندسيه بقت 85% والإنجليش بقى 85%والحاله الماديه 85% ، وبعمل أكل أحسن مراتى كمان - مش أوى طبعا بهرج - و......و............ووحاجاااات كتييييييير أوى إيجابيه بفضل الله ونعمته عليا وبرده زيك انا 29 سنه.

مش عاوز أدخل فى موضوع تانى ......أنا معرفكش شخصيا ولا عمرنا اتقابلنا......بس والله العظيم أنا عاوزلك الخير لأننا كلنا أخوه فى الله هنا ، ولو فكرت تسافر يا أحمد اعمل لنفسك تارجت بمعنى .........أنا مسافر ليه؟؟؟؟؟؟عاوز أحقق ايه؟؟؟؟؟؟؟عاوز أقعد كام سنه؟؟؟؟عاوز أضمن لنفسى ايه للمستقبل؟؟؟؟وربنا يارب يعملك اللى فيه الخير وتتجوز وحده تراعى ربنا فيك وتحفظلك بيتك ويرزقك بالذريه الصالحه يارب.