بسم الله الرحمن الرحيم


النهارده موعدنا مع تقرير تغير طقم الدبرياج بالكامل للاكسيل بتاعتى بس قبل ان ابدأ التقرير احب اشكر كل الاعضاء اللى ساهمو فى تقدم قسم هيونداى وبث الروح الجميلة اللى فى القسم حاليا وبتمنى من ربنا انو يوفقنا كأعضاء داخل القسم ونستكمل مجهوداتنا على اكمل وجه واننا نقف بجانب القائمين عالقسم وندعمهم دائما ( هيونداى تيم - المنسق - المنسق المساعد ) .......


الحقيقه بعد ما عملت عمرة للموتور والحمد لله خلصت على اكمل وجه كنت غيرت طقم دبرياج مع العمرة دسك واسطوانة وبلية اشتريتهم من محل فى الهرم للاسف طلعو مش تمام وباظو بعد 4 شهور بالظبط وللاسف غيرتهم بس مش عند الميكانيكى اللى عملى العمرة رجعت للميكانيكى بتاعى لانى لما جيت اعمل العمرة الميكانيكى بتاعى قالى انو زوجتو اتوفت ومش هيقدر يعمل العمرة روحت لميكانيكى تانى اخو صاحب ليا وظبطنا الدنيا فى الموتور بس طقم الدبرياج اللى جيه وحش المهم رجعت للميكانيكى بتاعى وطلع جرب العربية وقالى هنغير الطقم كلو لان الvolam شكلو معووج وهو اللى بيأثر على الاسطوانه وبيبوظها والطقم كدا كدا وحش هنجيب الاصلى وهنخرط ال volam عند متخصص لخراطتهم قولتلو تمام بس قالى هتغسل الموتور والعفشه الاول علشان نشتغل بمزاج قولتلو تمام .....

المهم نبدأ بالحاجات اللى اشتريتها .....

طقم دبرياج كامل ودى شكل العلبة بتاعتو ....


ويحتوى على الاسطوانة ودى شكلها ....


والدسك ودى صورتو ....


والبلية ودى صورتها ....


وبعدين طلعت على بنزينة توتال اشتريت 3 كيلو زيت فتيس مانيوال متعدد 85-140 تقيل علشان يمنع الونة بتاعة الفتيس الكيلو ب 20 جنية ودى صورة العلبة ....


واشتريت منظف انجكشن علشان ننضف الكربيراتير بعد مانخلص... الموضوع ده انا بعملو بأيدى وليه تقرير مخصوص ان شاء الله وده شكل المنظف اسمو gunk ودى من احسن الانواع اللى استعملتها العربيه بتبقا ناعمه جدا وصوتها اهدى بعد التنظيف ودى صورتو ....



المهم نزلت فى يوم اشتريت الحاجه وبعدين جيه يوم التركيب طلعت بالعربيه الساعه 9 الصبح غسلتها عفشه وموتور ودى صورها







وروحت للاسطى نبيل رفع العربيه وفك العجل وطلع الكبالن برة علشان نشوفهم لو فيهم حاجه وكانت المقصات سايبة خالص وعاوزه تتربط كويس وبعدين بدأ فك الفتيس وبعد ما اتشال وشال الفولام اتبقى الموتور بس وحيدا ودى الصور بعد ما الفتيس اتشال



وبعدين الفولام راح للخراط ورجع كالجديد تمام والراجل بتاع الخراطة قال انو كان معوج جدا واتزبط تمام واخد 40 جنية خراطة وده الفولام بعد ما اتخرط



بعدين بقا الحاج الفتيس طلع كان كلو طينة وبلاوى سودا المفروض الميكانيكى اللى عملى العمرة لما طلعو كان غسلو وزبطو لاكن معملش فيه حاجه المهم الاسطى نبيل بعتنى اجيب 4 لتر بنزين من البنزينة روحت مرضاش يدينى فى جركن وقفت عيل بتاع توكتوك قولتلو عاوز جركن بنزين انا عارف انو بيبقا معاهم ادانى جركن 4 لتر ب 10 جنية 92 ... المهم الفتيس اتغسل بالبنزين 3 -4 مرات لحد مابقا فابريكة وبقا شكلو كدا كأنو جديد ....



وبعدين تم التركيب بنجاح واحتاجنا 2 اولسية فتيس جبت الواحد ب 15 جنية بس ملحقتش اصورو

المهم انطباعى على العربية بعد الحوار ده العربيه بقت عاوزة تطير طيران وبتجمع اسرع بكتير وطلعت اجربها عالمحور شديت مع شاب راكب سيراتو بصراحه هو لاقانى بجرى وغرز كنت 140 لقيتو معدى من جمبى وانا دوست عالدواسة لحد 160 والعربيه بقت بتجمع ببطىء لحد ماجيبتو كان اتزنق قدام عالشمال وانا ماشى على اليمين مفتوح كنت 175 عديتو وبعدين ماشوفتوش تانى بس هو جيه عمل غرزة قدامى فى الاول عرفت انو عاوز يعرفنى ان السيراتو اجمد طيب يعنى هتجيب عربيه موديل 97 لعربية موديل 2011 بصراحه احترمت الاكسيل لما جبت 175 وكانت لسه هتجيب تانى المهم اكتر سرعة كنت جايبها قبل الحوار ده 160 ومكنتش بتجمع اكتر من كدا بس دلوقتى الوضع اختلف 180 درجة طبعا رجعت حاسبت الاسطى نبيل وكان حسابة 180 جنية والمفااااجأه ببص عالعداد لقيتو منظرو غريب لقيت العربيه عملت 110000 كم


بصراحه الرقم شدنى وقولت اصورو وقولت بالمرة اجيب للعربيه هديه لمبتين للكشاف اللى قدام




المشتريات من عند ابراهيم البنا فى التوفيقية
التكلفة النهائية كانت
60 جنية زيت فتيس
و 320 طقم دبرياج
و 30 جنية اولسيهات
و 180 مصنعيه و 20 جنية شوية مسامير وورد
40 جنية خراطة
و 20 جنية غسيل
40 جنية ترصيص وتزبط زوايا
يعنى الحوار كلو دخل فى 720

وبكدا يكون تقريرنا انتهى يارب يكون عجبكم التقرير يانجوم ....

انا مش هطلب من حد انو يرد فى المووضوع بس اهم حاجه يكون استفاد ...

تحياتى ...

محمد جلال ....