بعد إجبار كافيهات الإنترنت على أخذ إسم ورقم بطاقة كل من يستخدم الإنترنت واجه جهاز مباحث أمن الدولة و مباحث الإنترنت واجه مشكلة جديدة وهي كافيهات أولاد الذوات اللي فيها واي فاي مفتوح زي اللي جنب الجامعة الأمريكية وفي المولات الكبيرة والزمالك واللي فيها الشباب بيروح ياخد اللابتوب ويقعد على الإنترنت
ويظهر الشباب ولاد الذوات الوحشين الأشقيا بقوا هما كمان بيشتغلوا في السياسة وبيستخدموا الإنترنت لأغراضهم دي
لكن طبعا مش ها يبقى شيك خالص إنك تخش ستارباكس أو سيلانترو أو بينوز أو كوستا أو بوتري أو وات إيفر كافيه فتلاقي جارسون بيقولك بطاقتك يا كابتشين
طب تعمل إيه يا عبرحيم يا أمني تعمل إيه يا عبرحيم يا أمني
ها نسيب الحبل على الغارب للعيال دي كده ولا إيه
مافيش كنترول
لازم نحزمه لازم نكتفه على رأي مرقص افندي في مسرحية حسن ومرقص وكوهين
أه
نقفل الواي فاي ونخليه بباسوورد
أوكيه قشطة فكرة كويسة بس مش حل برضه
وبعدين إنت عاوز الناس تفتكر إن إحنا عندنا حسن نيه وواثقين فيهم
لأن كده برضه مش ها نعرف مين اللي داخل ومين اللي خارج وإزاي ها تجبره إنه يعرف عن نفسه ماهو أي باسورد يستخدمها أي حد ويرمي الكارت وخلاص
لا بص بقى احنا ها نزود مرحلة في الموضوع
إن الباسوورد والتسجيل مش كفاية
أيوة يا حلو ده انت ها تعمل كونفيرميشان عن طريق ان تدينا رقم تليفون جنابك واحنا نبعتلك أكتيفيشان كود
وطبعا إنت زي الشاطر اجبرناك تسجل معلوماتك كاملة عن خط تليفونك المحمول ولا إنت نسيت لما هددنا بإيقاف أرقام المحمول اللي مالهاش معلومات
طبعا بكده إحنا عرفنا انت مين بالظبط وكمان ها نقدر نعرف انت دخلت انهو مواقع وعملت ايه فيها يا لئيم ماهو كل العملية دي أساسا لازم تحصل عن طريق بروكسي ومن وظايف البروكسي انه بيسجل الترافيك وكمان ممكن يتعمل - سنيف - لباكيتات الداتا بتاعة حضرتك
طبعا الكلام ده مش ها يفهمه غير الهاكرز بس ما علينا مافيش متسع للشرح
المهم إن العقلية الأمنية لازم هي كمان تطور نفسها وتجاري العصر
ومش عاوز أي واحد يرد عليا ويبررلي هذه الخطوة الغير مبررة أصلا
المفضلات